Read Batak Simalungun 1 RAJA-RAJA 5 Bible Online

1 RAJA-RAJA 5 - Batak Simalungun bible

1 RAJA-RAJA 5

¹Si Salomo do na manggomgom ganup harajaon singgan ni Bah Eufrat das hu tanoh ni halak Palistim, das hu parbalogan ni tanoh Mesir; iboan sidea do sohei anjaha pambalosi do sidea bani si Salomo sadokah goluhni. [86]

²Bohal na porlu bani si Salomo ibagas sadari, ai ma tolu puluh kor nitak na lumat pakon onom puluh kor nitak na somal, [87]

³sapuluh lombu na pinamombur, dua puluh lombu na hun sampalan, saratus biri-biri, legan ni ursa, bedar, balua pakon pinahan marbagei-bagei na pinamombur.

⁴Ai igomgomi do ganup tanoh na hampit dipar ni Bah Eufrat, singgan ni Tipsa das hu Gasa, igomgomi do haganup raja na hampit dipar ni bah ai; mardamei do ia ampa na inggotsi ganup.

⁵Jadi marhasonangan ma Juda pakon Israel marianan, ganup i toruh ni hayu anggurni bei pakon i toruh ni hayu arani, singgan ni Dan das hu Berseba, sadokah manggoluh Raja Salomo. [88]

⁶Ambah ni ai adong do ompat puluh ribu huda sitarik gareta pakon sapuluh dua ribu bala parhuda.

⁷Anjaha juakjuakni sipangatur ondi pasirsirhon bohal bani Raja Salomo pakon bani haganup halak na roh mangan ampa raja Salomo, ganup sabulan bei, seng dong na hurang. [89]

⁸Sonai homa gandum pakon gagaton bani huda sitarik gareta pakon huda ajakan, iboan sidea do bani ianan na mangkaporluhon ai, ganup romban hu bani na dob pinarentahkon bani.

⁹Anjaha ilayak-layakkon Naibata do hu bani si Salomo hapentaran pakon pangarusion na bagas tumang pakon buei pambotoh, usih songon horsik na i topi ni laut bueini, [90]

¹⁰gabe i atasi hapentaran ni si Salomo ma hapentaran ni sagala halak parhapoltakan pakon hapentaran ni halak Masir. [91]

¹¹Pentaran ia tene hun bani ganup jolma, pentaran hun bani si Etan halak Esrahi, pakon si Heman, si Kalkol ampa si Darda anak ni si Mahol, gabe tarmurmur ma ia bani ganup bangsa sipajuh begu-begu inggot.

¹²Adong do tolu ribu umpamani, anjaha saribu lima do buei ni dodingni. [92]

¹³Ibotoh do mansahapkon pasal hayu, hun bani hayu ares na i Libanon das hu bani isop na dong tubuh bani tembok; ibotoh do homa mansahapkon pasal pinahan-pinahan, manuk-manuk, gilok-gilok pakon dengke.

¹⁴Jadi marrohan ma halak hun bani ganup bangsa sihol mambogei hapentaran ni si Salomo, hun bani ganup raja na i tanoh on, na mambogei barita ni hapentaranni ai. [93]

¹⁵Dob ai isuruh si Hiram, raja ni Tirus ma juakjuakni marayak si Salomo, dob ibogei, na dob iminaki ia gabe raja gantih ni bapani; ai holong do uhur ni si Hiram mangidah si Daud sadokah manggoluh ia. [94]

¹⁶Jadi martonah ma si Salomo hu bani si Hiram, nini ma,

¹⁷“Ibotoh ham do, na so tarbahen bapangku si Daud pajongjong sada rumah bani goran ni Jahowa, Naibatani, halani hamunsuhon hun bani munsuhni inggot, paima mangunduk sidea ganup ibahen Jahowa hu toruh ni jampal ni naheini.

¹⁸Tapi anggo nuan domma marhasonangan ahu inggot ibahen Jahowa Naibatangku; seng dong be imbang barang hasunsahan.

¹⁹Halani ai marsura-sura do ahu pajongjong sada rumah bani goran ni Jahowa Naibatangku, songon na pinarbagah ni Jahowa hu bani bapa, si Daud, sanggah na hinatahon-Ni, ʻAnakmu, na sihol pahundulon-Ku bani paratasmu bahen gantihmu, maningon ia do pajongjong sada rumah bani goran-Ku.ʼ [95]

²⁰Antong, hatahon ham ma halak na manroboh bangku hayu ares hun Libanon, husuruh pe juakjuakku mangkasomani juakjuakmu, anjaha hubere pe upah ni juakjuakmu songon na hinatahonmu; ai ibotoh ham do, seng dong i tongah-tongahnami na mambotoh manroboh hayu, songon halak Sidon.”

²¹Jadi dob ibogei si Hiram hata ni si Salomo ai, malas tumang ma uhurni, nini ma, “Pinuji ma Jahowa sadari on, halani na dob binereni hu bani si Daud sada anak na pentar, manggomgom bangsa na bolon on.” [96]

²²Dob ai isuruh si Hiram ma suruhanni marayak si Salomo, mangkatahon, “Domma hubogei tonah na pinadasmu; sirsir do ahu mambahen ganup sura-sura ni uhurmu, ai ma pasal hayu ares pakon hayu ingul ai.

²³Juakjuakku pe patuadkon hayu ai hun Libanon hu laut; dob ai husuruh pe na manrakitkon ai i laut das bani ianan na sihol hatahononmu bangku, ase ijai ipadarat ai anjaha ijalo ham; tapi maningon bahenonmu do na pinangindo ni uhurhu, ai ma mambere bohal bani pangisi ni rumahku.” [97]

²⁴Jadi ibere si Hiram ma hu bani si Salomo hayu ares pakon hayu ingul ansa pinindoni ai,

²⁵anjaha si Salomo pe ibere ma hu bani si Hiram dua puluh ribu kor gandum anjaha dua puluh bat minak na pinoroh. Sonai ma ibere si Salomo ganup tahun hu bani si Hiram. [98]

²⁶Ilayak-layakkon Jahowa do hapentaran hu bani Raja Salomo, songon na pinarbagah-Ni hinan hu bani; anjaha mardamei do si Salomo pakon si Hiram, mambahen parpadanan do sidea na dua. [99]

²⁷Dob ai iharah Raja Salomo ma parrodi hun ganup Israel, buei ni parrodi ai tolu puluh ribu halak do.

²⁸Jadi isuruh raja ai ma sidea margantih-gantih hu Libanon, sapuluh ribu ibagas sabulan; sabulan ma sidea i Libanon dob ai dua bulan i rumahni bei; si Adoniram do kopala ni parrodi ai. [100]

²⁹Ambahni ai adong do bani si Salomo pitu puluh ribu halak siparlanja anjaha ualuh puluh ribu halak sibarbar batu i dolog; [101]

³⁰sobalini ai adong ope mandur na pinabangkit ni Raja Salomo mangatur horja ai, tolu ribu tolu ratus halak, na mardiateihon halak na marhorja ai.

³¹Isuruh raja ai do homa sidea mangkurak batu na banggal anjaha na maharga, sibarbaron bahen onjolan ni rumah panumbahan ai.

³²Jadi rap marhorja ma tukang ni Raja Salomo rap pakon tukang ni Raja Hiram ampa halak Gebal mambarbar hayu pakon batu bahen haporluan ni rumah panumbahan ai. [102]