Read Batak Simalungun 1 RAJA-RAJA 8 Bible Online

1 RAJA-RAJA 8 - Batak Simalungun bible

1 RAJA-RAJA 8

¹Dob ai ipatumpu Raja Salomo ma pangintuai ni halak Israel pakon ganup pambobai ni halak Israel mar sasamarga pakon mar sasaompung roh hu lobei ni Raja Salomo i Jerusalem, laho mamboan Poti Parpadanan ni Jahowa tangkog hun huta ni si Daud, ai ma Sion. [130]

²Jadi martumpu ma hu lobei ni Raja Salomo haganup dalahi i Israel bani pesta ai, bani bulan Etanim, ai ma bulan papituhon. [131]

³Jadi dob martumpu haganup pangintuai ni halak Israel, iangkat malim ai ma poti ai. [132]

⁴Dob ai iboan sidea ma tangkog poti ni Jahowa, lampolampo partumpuan pakon ganup parugas na ma pansing, na ibagas lampolampo ai hinan, jadi iboan malim pakon halak Levi ai ma ai tangkog.

⁵Jadi jongjong ma Raja Salomo rap pakon ganup tumpuan ni halak Israel, na roh martumpu hu lobeini, i lobei ni poti ai, anjaha igalangkon ma biri-biri pakon lombu, sonai ma bueini, gabe seng tarbilang barang taretong sidea. [133]

⁶Jadi das ma iboan malim ai Poti Parpadanan ni Jahowa hu bani iananni, hu ianan na tang ma pansing, i toruh ni habong ni herub na dua ai.

⁷Ai ipaherbang herub ai do habongni i babou ni ianan ni poti ai, gabe rungkub ma poti ai pakon lanja-lanjani ai ibahen herub ai.

⁸Sonai do parganjang ni lanja-lanja ai, gabe taridah ma ujung ni lanja-lanja ai hun ianan na ma pansing na i lobei ni ianan na tang ma pansing ai; tapi seng taridah ai hun darat, anjaha ijai do ai das ronsi sadari on. [134]

⁹Seng dong atap aha ibagas poti ai, sobali na dua batu panuratan ai, na ninahkon ni si Musa hujai sanggah i Horeb, sanggah na binahen ni Jahowa parpadanan bani halak Israel, bani na luar sidea hun Tanoh Masir. [135]

¹⁰Jadi dob luar malim ai hun bani ianan na ma pansing ai, roh ma hombun manggoki rumah ni Jahowa, [136]

¹¹pala seng tahan malim ai jongjong marugas halani hombun ai, ai hamuliaon ni Jahowa do manggoki Rumah ni Jahowa. [137]

¹²Nini si Salomo ma ijia, “Jahowa do na mannahkon mata ni ari i langit, tapi domma ihatahon, sihol marianan do Ia ibagas na golap. [138]

¹³Domma hupajongjong sada rumah Bamu, bahen ianan-Mu, sada ianan Bamu marparatas ronsi sadokah ni dokahni.” [139]

¹⁴Dob ai marhusor ma raja ai idompakkon ma ganup tumpuan ni halak Israel anjaha ipasu-pasu, anjaha jongjong bei do ganup tumpuan ni halak Israel ai. [140]

¹⁵Nini raja ai ma, “Pinuji ma Jahowa, Naibata ni halak Israel, na dob pasaudkon marhitei tangan-Ni na binagahkon-Ni marhitei pamangan-Ni hu bani bapa si Daud, sanggah na hinatahon-Ni, [141]

¹⁶ʻSinggan ni ari dob Huarahkon luar bangsang-Ku halak Israel hun tanoh Masir, seng ongga Hutodoh sada huta bani ganup marga ni halak Israel laho pajongjongkon sada rumah ijai; tapi domma Hupilih si Daud laho manggomgomi bangsang-Ku halak Israel.ʼ [142]

¹⁷Tapi domma namin isura-surahon uhur ni bapa si Daud sihol pajongjongkon sada rumah bani goran ni Jahowa, Naibata ni halak Israel. (2 Sam. 7)

¹⁸Tapi nini Jahowa do hu bani bapa, si Daud, ʻHalani domma isura-surahon uhurmu sihol pajongjong sada rumah bani goran-Ku, dear do namin sura-sura ni uhurmai;

¹⁹tapi seng bulih anggo ho pajongjong rumah ai, maningon anakmu na pinupusmai do pajongjong sada rumah bani goran-Ku.ʼ

²⁰Domma ipasaud Jahowa bagah-bagah na dob hinatahon-Ni ai; ai domma ahu ipabangkit gantih ni bapa, si Daud, anjaha hundul bani paratas ni Israel, songon na pinarbagah ni Jahowa hinan, anjaha domma hupajongjong sada rumah bani goran ni Jahowa, Naibata ni Israel.

²¹Anjaha domma hupajongjong ijon sada ianan bani poti in, ianan ni titah parpadanan in, na binahen-Ni hu bani ompungta, sanggah iarahkon sidea luar hun tanoh Masir.” [143]

²²Dob ai jongjong ma Raja Salomo i lobei ni anjapanjap ni Jahowa mandompakkon ganup tumpuan ni halak Israel, anjaha ipaherbang ma tanganni dompak langit. [144]

²³Nini ma, “Ham Jahowa Naibata ni halak Israel! Seng dong Naibata na songon Ham i nagori atas barang i nagori tongah, na mambahen parpadanan anjaha na maridop ni uhur bani jabolon-Mu, na marparlahou i lobei-Mu hun bani gok ni uhurni, [145]

²⁴na pasaudkon hu bani bapa, si Daud, hata na dob pinarbagah-bagah-Mu hu bani jabolon-Mu; Ham do na mangkatahon ai, anjaha marhitei tangan-Mu ipasaud Ham ai sadari on. [146]

²⁵On pe, Ham Jahowa, Naibata ni Israel, pasaud Ham ma hu bani jabolon-Mu si Daud, bapa ondi na dob pinarbagah-bagah-Mu hu bani, sanggah na hinatahon-Mu, ʻSeng anjai rotap hunbam sada halak i lobei-Hu, na hundul bani paratas ni Israel, asal ma iramotkon anakmu parlahouni, marparlahou sidea i lobei-Hu songon ho, na dob marpalahou i lobei-Hu.ʼ [147]

²⁶On pe, Ham Naibata ni Israel, pasaud Ham ma hata-Mu, songon na dob pinarbagah-Mu hu bani jabolon-Mu si Daud, bapa ondi. [148]

²⁷Tapi tene, tor ra ma Naibata marianan i atas tanoh on? Tonggor ma, gari langit ni langitan seng tarhamkamsi Ham; samintolah ma rumah na hupajongjong on? [149]

²⁸Tapi sai manatap ma Ham hu bani tonggo ni jabolon-Mu on pakon hu bani elek-elekni, Ham Jahowa Naibatangku, sai tangihon Ham ma dilo-dilo pakon tonggo na tinonggohon ni jabolon-Mu i lobei-Mu sadari on; [150]

²⁹sai tonggor ma panonggor-Mu arian pakon borngin hu bani rumah on, ianan na dob hinatahon-Mu, ʻManingon ijai do marianan goran-Kuʼ sai tangihon Ham ma tonggo na tinonggohon ni jabolon-Mu on bani ianan on.

³⁰Sai tangihon Ham ma elek-elek ni jabolon-Mu on pakon bangsa-Mu halak Israel, anggo martonggo sidea bani ianan on; sai tangihon Ham ma in bani ianan-Mu marparatas, i nagori atas; sai tangihon Ham ma, anjaha marpangulaki ma uhur-Mu. [151]

³¹Anggo mardousa sada halak bani hasomanni, pala ipabija ia halani ai, anjaha saud ia roh marbija hu lobei ni anjapanjap-Mu on, i rumah panumbahan on, [152]

³²jadi tangihon Ham ma ai i nagori atas, anjaha bahen Ham ma na madear hu bani jabolon-Mu, tapi uhum Ham ma na marsalah, marhitei mambalaskon pambahenanni bani, anjaha pintori Ham ma parpintor, marhitei na mambalaskon bani romban hu bani hapintoranni. [153]

³³Tapi anggo talu bangsa-Mu halak Israel ibahen munsuhni halani mardousa sidea Bamu, anggo mulak sidea use Bamu anjaha isaksihon goran-Mu, martonggo anjaha mangelek-elek sidea use ibagas rumah panumbahan on: [154]

³⁴Sai tangihon Ham ma ai i nagori atas, anjaha sasap Ham ma dousa ni bangsa-Mu halak Israel, anjaha boan Ham ma sidea use bani tanoh na binere-Mu hu bani ompung ni sidea. [155]

³⁵Anggo tartutup langit anjaha seng roh udan halani mardousa sidea Bamu, anggo martonggo sidea bani ianan on, anjaha isaksihon sidea goran-Mu, anjaha mulak sidea hun bani dousa ni sidea, halani domma ipatunduk Ham sidea, [156]

³⁶sai tangihon Ham ma ai i nagori atas, anjaha sasap Ham ma salah ni jabolon-Mu halak Israel (ai Ham do siajarhon bani sidea dalan-Mu na dear in, na talup sidalanan ni sidea) anjaha bere Ham ma udan bani tanoh-Mu, na dob binere-Mu bani bangsa-Mu, bahen siteanon ni sidea. [157]

³⁷Anggo masa lohei i tanoh in, sonai homa sampar, borou, antinganou, balang barang gilok-gilok; anggo ihubu munsuh sidea ibagas huta ni sidea, barang sitaronon ampa naborit na ijahanin in pe masa; [158]

³⁸sagala tonggo pakon pangindoan, na binahen ni marsasahalak barang ganup bangsa-Mu halak Israel, halani na dob mananda bei bani sambor ni hauhuronni, gabe roh sidea paherbang tanganni dompak rumah panumbahan on,

³⁹sai tangihon Ham ma i nagori atas, bani paratas-Mu in, anjaha marpangulaki ma uhur-Mu, bahen anjaha balaskon Ham ma bani ganup romban hu bani dalanni bei, marguru hu bani pananda-Mu bani hauhuron ni ganup sidea, ai pitah Ham do na mananda hauhuron ni jolma manisia, [159]

⁴⁰ase marhabiaran sidea sadokah manggoluh sidea bani tanoh na binere-Mu bani ompung ni sidea. [160]

⁴¹Sonai homa age halak na legan, na so hun bani bangsa-Mu halak Israel, na roh hun tanoh na madaoh halani goran-Mu, [161]

⁴²ai bogeion ni sidea do goran-Mu na banggal in, pakon tangan-Mu na gogoh anjaha na gostong in; anggo roh ia anjaha martonggo ibagas rumah on, [162]

⁴³sai tangihon Ham ma i nagori atas, bani paratas-Mu in anjaha bahen Ham ma romban hu bani haganup na pinangindo ni halak na legan ai Bamu, ase ibotoh haganup bangsa na i tanoh on goran-Mu anjaha ihabiari Ham songon bangsa-Mu halak Israel, anjaha ase ibotoh sidea, na marpanggoranan Bamu do rumah na hupajongjong on. [163]

⁴⁴Anggo luar bangsa-Mu laho marporang dompak munsuh ni sidea, barang sonaha pe parsuruh-Mu bani sidea, anjaha roh sidea martonggo bani Jahowa hu huta na dob pinilih-Mu pakon hu rumah na dob hupajongjong bani goran-Mu,

⁴⁵sai tangihon Ham ma tonggo pakon pangindoan ni sidea i nagori atas, anjaha pasintong Ham ma uhum bani sidea.

⁴⁶Anggo mardousa sidea ai, seng dong jolma na so mardousa, anjaha manringis Ham bani sidea, anjaha iondoskon Ham sidea bani munsuh, gabe tarbuang sidea hu tanoh ni munsuhni daoh barang dohor, [164]

⁴⁷dob ai ipaulak sidea uhur ni sidea hubagas i tanoh habuangan ni sidea, anjaha ipaubah sidea uhur ni sidea, anjaha martonggo sidea Bamu i tanoh habuangan ni sidea ai, nini, ʻDomma mardousa hanami, domma marsalah hanami, anjaha hajahaton do horjanamiʼ [165]

⁴⁸anggo mulak sidea Bamu hun bani gok ni uhur ni sidea pakon hun bani gok ni tonduy ni sidea i tanoh ni munsuh ni sidea, na mambuangkon sidea, anjaha martonggo sidea Bamu, dompak tanoh ni sidea, na binere-Mu hu bani ompung ni sidea, dompak huta na pinilih-Mu, pakon dompak rumah, na hupauli bani goran-Mu, [166]

⁴⁹sai tangihon Ham ma i nagori atas, bani paratas-Mu in, tonggo pakon pangindoan ni sidea, anjaha pasintong Ham ma uhum bani sidea, [167]

⁵⁰anjaha sasap Ham ma dousa ni bangsa-Mu, na mardousa dompak Ham, sonai homa ganup panlanggaron ni sidea, na binahen ni sidea Bamu; anjaha bahen Ham ma, ase dapotan idop ni uhur sidea i lobei ni halak na mambuangkon sidea, anjaha iidopi sidea, [168]

⁵¹ai bangsa-Mu pakon parbagianan-Mu do sidea, na dob niarahkon-Mu luar hun tanoh Masir, hunbagas panlalaan bosi. [169]

⁵²Sai tonggor ma panonggor-Mu manatap elek-elek ni jabolon-Mu pakon elek-elek ni bangsa-Mu halak Israel, sai tangihon Ham ma sidea pasal haganup na pinangindo ni sidea Bamu. [170]

⁵³Ai domma pala ipapulig Ham sidea hun tongah-tongah ni ganup bangsa na i tanoh on, bahen parbagianan-Mu, songon na dob pinarbagah-Mu marhitei juakjuak-Mu si Musa, sanggah na niarahkon-Mu ompungnami luar hun tanoh Masir, Ham Tuhan Jahowa.” [171]

⁵⁴Jadi dobkonsi itonggohon Raja Salomo bani Jahowa haganup tonggo pakon pangindoan ondi, jongjong ma ia hun lobei ni anjapanjap ni Jahowa, ai ijai do ia manrogop anjaha paherbang tanganni dompak langit;

⁵⁵jadi jongjong ma ia, anjaha ipasu-pasu ma ganup tumpuan ni halak Israel marhitei sora na gogoh, nini ma, [172]

⁵⁶“Pinuji ma Jahowa, na mambere hasonangan hu bani bangsa-Ni halak Israel, romban hu bani ganup na pinarbagah-Ni ai; seng dong na labuh hun bani haganup hata na madear, na dob pinarbagah-Ni ai marhitei si Musa juakjuak-Ni ai. [173]

⁵⁷Sai ihasomani Jahowa, Naibatanta in ma hita, songon na dob hinatahon ni ompungta; sai ulang ma itadingkon barang iambungkon hita; [174]

⁵⁸sai itarik ma uhurta hu Bani, ase marparlahou hita bani ganup dalan-Ni, anjaha iramotkon hita tonah-Ni, titah-Ni pakon uhum-Ni, na dob tinonahkon-Ni hu bani ompungta.

⁵⁹Anjaha ganup hata pangindoan, na dob husombahkon on hu bani Jahowa, sai tong ma in namin i lobei ni Jahowa arian pakon borngin, anjaha ipasintong ma uhum bani jabolon-Ni pakon bani bangsa-Ni halak Israel, songon na talup ganup ari; [175]

⁶⁰ase ganup bangsa ni tanoh on mambotoh, Jahowa do Naibata, anjaha sobali-Si seng dong. [176]

⁶¹Halani ai sai gok bani Naibata Jahowa in ma ganup uhur nasiam, marparlahou ma nasiam ibagas titah-Ni, anjaha ramotkon nasiam ma ganup parentah-Ni, songon sadari on.”

⁶²Dob ai igalangkon raja ai rap pakon bangsa ai ma galangan i lobei ni Jahowa.

⁶³Igalangkon si Salomo ma galangan pardameian hu bani Jahowa, dua puluh dua ribu lombu pakon saratus dua puluh ribu biri-biri. Sonai ma pangondoskon ni si Salomo pakon ganup bangsa ai bani rumah panumbahan ai bani Jahowa.

⁶⁴Bani ari na sasada ai ma iuras raja ai parsitongahan ni alaman na i lobei ni Rumah ni Jahowa, ai ijai do igalangkon galangan situtungon pakon galangan sipanganon pakon taboh-taboh ni galangan pardameian, halani maetektu do anjapanjap tombaga na i lobei ni Jahowa, bahen panggalangan ni galangan situtungon, pakon galangan sipanganon pakon taboh-taboh ni galangan pardameian. [177]

⁶⁵Sonai ma pamestahon ni Raja Salomo bani pesta ai ijia, rap pakon ganup halak Israel, sada tumpuan bolon, na roh hun Hamat nari das hu Bah Masir, hu lobei ni Jahowa Naibatanta, pitu ari dokahni. [178]

⁶⁶Bani ari paualuhkon isuruh ma mulak halak simbuei ai; ipasu-pasu sidea ma raja ai, lanjar mulak ma sidea hu rumah ni bei ibagas malas pakon sonang ni uhur halani haganup na madear, na binahen ni Jahowa hu bani Raja Daud, juakjuak-Ni ai, pakon hu bani halak Israel, bangsa-Ni ai. [179]