Read Batak Simalungun 1 RAJA-RAJA 9 Bible Online

1 RAJA-RAJA 9 - Batak Simalungun bible

1 RAJA-RAJA 9

¹Dob ipajongjong Raja Salomo Rumah ni Jahowa pakon rumah bolon ai ampa haganup na legan, na pinarsintani paulionni, [180]

²ipataridahkon Jahowa ma diri-Ni hu bani Raja Salomo paduahalihon, songon na dob pinatalarni diri-Ni bani i Gibeon. [181]

³Dob ai nini Jahowa ma hu bani, “Domma Hutangihon tonggo pakon pangindoanmu, na sinombahkonmu Bangku; domma Hupapansing rumah on, na pinajongjongmon, bahen ianan ni goran-Ku ronsi sadokah ni dokahni; sai dompak jai do mata pakon uhur-Hu tongtong. [182]

⁴On pe, anggo marparlahou do ho i lobei-Hu, songon parlahou ni bapamu, si Daud, hun bani gok pakon pintor ni uhurmu, ihorjahon ho romban hu bani na Hutitahkon bam, anjaha iramotkon ho aturan-Ku pakon uhum-Hu, [183]

⁵jadi pajonamon-Ku ma paratas ni harajaonmu manggomgom halak Israel sadokah ni dokahni, songon na dob Hubagahkon hu bani bapamu si Daud, ningku, ʻSeng anjai rotap hunbam sada halak i lobei-Hu, na hundul bani paratas ni Israel.ʼ [184]

⁶Tapi anggo marbalik hanima hun bani na mangirikkon Ahu, ho pakon ginomparmu, anjaha seng iramotkon hanima titah-Ku pakon aturan-Ku, na dob Hupajongjong i lobeinima, tapi laho hanima mambalosi naibata na legan anjaha marsombah hujai, [185]

⁷jadi siapkonon-Ku ma Israel hun tanoh, na dob Huberehon bani sidea; anjaha rumah, na dob Hupapansing bani goran-Ku, padaohon-Ku ma in hun lobei ni bohing-Ku; gabe umpama pakon salig-salig ma Israel i tongah-tongah ni sagala bangsa. [186]

⁸Gabe gugunan batu ma rumah on; ganup halak na mamontas hunjin gabe longang ma anjaha manrisai, nini sidea ma, ʻMase ma sonon ibahen Jahowa hu bani tanoh on pakon hu rumah on?ʼ [187]

⁹Dob ai nini ma, ʻHalani na tinadingkon ni sidea do Jahowa, Naibata ni sidea ai, na mangarahkon ompung ni sidea luar hun Tanoh Masir, gabe marpangunsandeian sidea bani naibata na legan, marsombah sidea hujai anjaha ibalosi; halani ai do ase iparoh Jahowa ganupan on hu bani sidea.ʼ ”

¹⁰Jadi dob salpu na dua puluh tahun ai sadokah ai ma ipajongjong Raja Salomo rumah na dua ai, ai ma Rumah ni Jahowa pakon rumah bolon ai, [188]

¹¹anjaha si Hiram, raja hun Tirus do na mamberehon hu bani Raja Salomo hayu ares pakon ingul ampa omas, barang sadiha nini uhurni ijia ma ibere Raja Salomo hu bani Raja Hiram dua puluh huta i Nagori Galilea. [189]

¹²Dob ai bingkat ma Raja Hiram hun Tirus laho manorih huta ai, na dob binere ni Raja Salomo hu bani, hape lang ipangan uhurni ai.

¹³Jadi nini ma, “Huta aha ma, na dob bineremu on bangku, saninangku?” Halani ai igoran ma ai nagori Kabul ronsi sadari on.

¹⁴Anjaha itongoskon Raja Hiram ma bani Raja Salomo saratus dua puluh talenta omas.

¹⁵Sonon do ruhut ni panrodion, na tinampeihon ni Raja Salomo, laho paulihon Rumah ni Jahowa, rumah bolon, Milo, tembok ni Jerusalem pakon na patoguhkon Hazor, Megiddo pakon Geser. [190]

¹⁶Ai tangkog do sapari Parao, raja ni Masir manaluhon Geser, lanjar isurbuy bani apuy; ibunuhi do halak Kanaan, na marianan i huta ai, ibere ma huta ai bahen parpaingkatni bani boruni, parinangon ni Raja Salomo. [191]

¹⁷Dob ai ipajongjong Raja Salomo ma use huta Geser pakon Bet-Horon parbornoh. [192]

¹⁸Baalat pakon Tamar i halimisan na i tanoh Juda, [193]

¹⁹ambahni ai sagala huta panimpanan, na adong bani si Salomo, huta partumpuan ni gareta porang pakon huta ni bala siparhuda, pakon sagala na hinarosuhkon ni Raja Salomo sipajongjongon ni i Jerusalem, i Libanon pakon bani haganup tanoh, na ginomgomanni ai. [194]

²⁰Sagala halak na tading hun bani halak Amori, Heti, Peresi, Hewi, pakon Jebusi, na so hun bani halak Israel,

²¹pakon ginompar ni sidea, simasima ni sidea i tanoh in, na so siap hinan ibahen halak Israel, hu bani sidea ma itampeihon Raja Salomo horja rodi ronsi sadari on. [195]

²²Tapi anggo hu bani halak Israel seng dong itampeihon raja Salomo horja rodi, gabe tentara do sidea, gabe gamot-gamot, kopala, puanglima, kopala ni bala pargareta pakon bala siparhuda. [196]

²³On ma kopala, na mambobahon horja na hinatahon ni raja Salomo: lima ratus lima puluh halak, na mangonjapkon halak simbuei ai mangkorjahon horjani bei. [197]

²⁴Jadi dob tangkog boru ni Raja Parao hun huta ni Raja Daud, masuk hu rumahni, na dob pinajongjong ni raja ai bani, mintor ipajongjong Raja Salomo ma Milo. [198]

²⁵Tolu hali ibagas satahun igalangkon Raja Salomo galangan situtungon pakon galangan pardameian i atas ni anjapanjap, na dob pinajongjongni ai bani Jahowa, anjaha manutung dahupa do homa ia i lobei ni Jahowa. Sonai ma pandobkonni bani rumah panumbahan ai. [199]

²⁶Isuruh Raja Salomo do homa na paturei kapal i Ezion-Geber, dohor hu Elat, i topi laut ni Sigerger, i tanoh Edom. [200]

²⁷Dob ai isuruh Raja Hiram ma juakjuakni siparhorja i kapal, halak na somal i laut, mangkasomani juakjuak ni si Salomo; [201]

²⁸jadi laho ma sidea hu Opir, anjaha iboan sidea ma hunjai omas ompat ratus dua puluh talenta, ipadas sidea ma ai bani Raja Salomo. [202]