Read Batak Simalungun 2 RAJA-RAJA 12 Bible Online

2 RAJA-RAJA 12 - Batak Simalungun bible

2 RAJA-RAJA 12

¹Marumur pitu tahun do si Joas, sanggah na bangkit raja ia. [185]

²Papitutahunkon dob jadi raja si Jehu, ijai ma bangkit raja si Joas, anjaha ompat puluh tahun do ia manrajai i Jerusalem; si Sibia do goran ni inangni, hun Berseba.

³Ihorjahon si Joas do rosuh ni Jahowa sadokah manggoluh ia, ai Malim Joyada do mangajarisi.

⁴Tapi seng iparseda anggo ianan parsumbahan na i atas buntu-buntu, sai manggalang anjaha manutung dahupa ope halak simbuei i atas ianan parsumbahan na i buntu-buntu. [186]

⁵Nini si Joas ma hu bani malim-malim ai, “Sagala duit, na binoan hu Rumah ni Jahowa songon sibere-bere na pinapansing, ai ma duit, na binere ni halak bahen guguanni, sonai homa sagala duit, na binoan ni sada halak hun bani niojur ni uhurni hu Rumah ni Jahowa, [187]

⁶bulih do jaloon ni malim ai, ganup malim hun bani na tinandani, anjaha ipakei ma ai padearhon rumah ai, atap ija na porlu sipadearon.”

⁷Ai domma pala dua puluh tolu tahun dob raja si Joas, tapi seng dong ope hun bani na maseda ipadear malim ai i rumah ai.

⁸Jadi idilo Raja Joas ma Malim Joyada pakon malim-malim na legan, nini ma hu bani sidea, “Mase ma seng ipadear nasiam ope na maseda i rumah ai? Halani ai seng bulih simpanon nasiam duit na ijalo nasiam hun bani na tinanda nasiam, maningon berehon nasiam do ai, laho padearhon na maseda i rumah ai.”

⁹Jadi ibalosi malim ai ma hata ai, na so jaloon ni sidea be duit hun bani halak simbuei ai, anjaha seng be sidea padearhon na maseda ai bani rumah ai.

¹⁰Dob ai ibuat Malim Joyada ma sada poti, anjaha ituhak ma tutupni ai, inahkon ma poti ai i lambung ni anjapanjap ai hampit siamun laho masuk halak hu Rumah ni Jahowa; anjaha inahkon malim na marjaga i lambung ni molmolan ai ma hujai ganup duit na binoan hu Rumah ni Jahowa. [188]

¹¹Dob iidah sidea na dob buei ma duit ibagas poti ai, roh ma jurutulis ni raja ai rap pakon sintua ni malim ai, ibilang anjaha ibaluti sidea ma ibagas parduitan duit na dapot i rumah panumbahan ai.

¹²Iondoskon sidea ma duit na dob tinimbang ai hu bani kopala ni sibobahon horja ai, na niangkat mardimata Rumah ni Jahowa, ase sidea ma na mambere gaji hu bani tuhang, na marhorja i Rumah ni Jahowa,

¹³pakon hu bani tuhang batu pakon sibarbar batu, sonai homa mamboli parhayu pakon batu na dob binarbar laho padearhon na maseda i Rumah ni Jahowa, haganup tene harugian na porlu, laho padearhon Rumah ni Jahowa.

¹⁴Tapi seng ipauli sidea bani Rumah ni Jahowa pinggan pirak, pisou, mangkuk parburihan, tarompet, barang parugas omas atap pirak pe hun bani duit na binoan hu Rumah ni Jahowa,

¹⁵tapi ibere do ai bani halak parhorja hansa na padearhon Rumah ni Jahowa. [189]

¹⁶Anjaha seng pala mambahen parhiraan sidea pakon halak haondosan ni duit ai, na padaskon ai hu bani parhorja, ai martenger ni uhur do sidea samah sidea. [190]

¹⁷Tapi anggo duit hun bani galangan parsalahan pakon hun bani galangan pardousaon, seng iboan ai hu Rumah ni Jahowa, ai bani malim do ai. [191]

¹⁸Tangkog ma ijia si Hasael, raja hun Aram, laho marporang dompak Gat, anjaha talu do ai ibahen. Dob ai idompakkon si Hasael ma bohini laho tangkog hu Jerusalem; [192]

¹⁹jadi ibuat si Joas, raja hun Juda ma sagala sibere-bere, na pinapansing ni ompung ni si Josafat, si Joram pakon si Ahasya, raja-raja ni Juda pakon sibere-bere pinapansing ni sandiri ampa omas na jumpah i parartaan ni Rumah ni Jahowa pakon na i rumah ni raja ai, anjaha itongoskon ma ai hu bani si Hasael, raja ni Aram, gabe mundur ma ia hun Jerusalem. [193]

²⁰Barita na tading ai ope pasal si Joas pakon ganup na hinorjahonni, ai lang tarsurat do ai ibagas buku barita ni Raja-raja ni Juda?

²¹Jadi mambahen partahi-tahian ma juakjuakni mangimbangsi, anjaha ibunuh sidea ma si Joas i rumah Milo. [194]

²²Juakjuak ni si Josahar, anak ni si Simeat, pakon si Josabad, anak ni si Somer do na mambunuhsi; anjaha itanom sidea ma ia i lambung ni ompungni, i huta ni si Daud, anjaha si Amasia, anakni ai ma bangkit raja manggantihsi. [195]