Read Batak Simalungun 2 RAJA-RAJA 18 Bible Online

2 RAJA-RAJA 18 - Batak Simalungun bible

2 RAJA-RAJA 18

¹Patolutahunkon dob gabe raja i Israel si Hosea, anak ni si Ela, bangkit raja ma i Juda si Hiskia, anak ni si Ahas. [300]

²Marumur dua puluh lima tahun do ia sanggah na bangkit raja ai, anjaha dua puluh siah tahun do ia manrajai i Jerusalem; ia goran ni inangni si Abi do, boru ni si Sakarya. [301]

³Ihorjahon do rosuh ni uhur ni Jahowa, usih songon na binahen ni si Daud ompungni ondi. [302]

⁴Ia do na parseda panumbahan na i atas buntu-buntu, na mambolahi gana-gana, na manroboh Ashera pakon na manrosaki ulog tombaga, na pinauli ni si Musa, ai ronsi panorang ai, sai manutung dahupa do halak Israel hujai, anjaha igoran do ai Nehustan. [303]

⁵Marhatengeran do ia hu bani Jahowa, Naibata ni Israel, anjaha seng dong songonsi raja hun bani raja-raja ni Juda na i pudi ni, barang raja na parlobei hun bani. [304]

⁶Sai marsijoloman do uhurni hu bani Jahowa, seng ipadaoh uhurni hun Bani, anjaha iramotkon do tonah-Ni, na binerehon ni Jahowa hu bani si Musa. [305]

⁷Halani ai sai ihasomani Jahowa do ia; barang huja pe ia manlangkah sai manjadi do. Ilawan do raja ni Assur, seng ra ia mambalosisi. [306]

⁸Italuhon do halak Palistim das ronsi Gasa pakon nagorini, singgan ni manara panjagaan das hu huta na binatar-bataran. [307]

⁹Paompattahunkon dob gabe raja si Hiskia, ai ma papitutahunkon dob gabe raja i Israel si Hosea, anak ni si Ela, tangkog ma si Salmanasar raja ni Assur marporang dompak Samaria, anjaha ihubu ma ia, [308]

¹⁰anjaha dob salpu tolu tahun itaban ma ai. Paonomtahunkon dob raja si Hiskia, ai ma pasiahtahunkon dob raja si Hosea, raja ni Israel, ijai ma tartaban Samaria. [309]

¹¹Ibuangkon Raja Assur ma halak Israel hu Assur, anjaha ibahen ma sidea marianan i Hala, pakon bani Bah Habor, bani bah ni tanoh Gosan pakon i huta-huta ni halak Madai,

¹²halani na so tinangihon ni sidea sora ni Jahowa, Naibata ni sidea, tapi ilanggar do padan-Ni pakon ganup na tinonahkon ni si Musa juakjuak ni Jahowa; seng itangihon anjaha ibalosi sidea ai. [310]

¹³Pasapuluhompattahunkon dob gabe raja si Hiskia, tangkog ma si Sanherib, raja ni Assur, marporang dompak ganup huta ni Juda na marbatar-batar, anjaha italuhon ma ai.

¹⁴Dob ai isuruh si Hiskia, raja ni Juda ma suruhanni hu Lakis marayak raja ni Assur, nini ma hu bani, “Domma mardousa ahu, surut ma ham hun bangku; barang aha na pinabobankonmu bangku, sai galaronku do ai.” Jadi ipabobankon raja ni Assur ma hu bani si Hiskia raja ni Juda tolu ratus talenta pirak pakon tolu puluh talenta omas. [311]

¹⁵Jadi ibere si Hiskia ma ganup pirak na jumpah ibagas Rumah ni Jahowa pakon na ibagas kamar parartaan ni rumah ni raja ai. [312]

¹⁶Bani panorang ia ma ilikliki si Hiskia raja ni Juda sagala omas hun labah ni Rumah ni Jahowa pakon hun bani tiang na nilampisni sandiri, anjaha ibere ma ai hu bani raja ni Assur. [313]

¹⁷Tapi isuruh Raja Assur ma Tartam, Rabsaris pakon Rabsake rap pakon buei bala hun Lakis hu Jerusalem marayak Raja Hiskia. Jadi tangkog ma sidea, anjaha das ma sidea dohorhon bondar ni bongbongan parhuluan ai, i lambung ni dalan na bolon hu ladang pamurihan. [314]

¹⁸Dob dilo-dilo sidea hu bani raja ai, mintor luar ma marayak sidea si Eliakim, anak ni si Hilkia, siramotkon rumah ai, pakon si Sebna, jurutulis ai, ampa si Joah, anak ni si Asap panuturi ai. [315]

¹⁹Nini Rabsake ai ma hu bani sidea, “Hatahon nasiam ma hu bani si Hiskia, sonon do hata ni raja na bolon in, raja ni Assur, ʻAi aha do hatengeran, na pinangunsagahkonmin? [316]

²⁰Nini uhurmu gakni sungkup ma hata ni bibir tumang gabe haputusan ampa kuasa hamunsuhon? On pe, hu bani ise do ho marhatengeran, ase pag ho marbalik hun bangku?

²¹Tonggor ma, marhatengeran do ho hu bani tungkot tolong na marosak, ai ma Masir, na manolpusi tangan ni jolma na martungkotkonsi. Sonai do pambahen ni Parao, raja ni Masir, hu bani haganup halak na marhatengeran hu bani.ʼ [317]

²²Tapi anggo ihatahon ho hu bangku, ʻMarhatengeran hu bani Jahowa Naibatanami do hanami, ai lang Ia do ai, na dob iparseda si Hiskia panombahanni na i buntu-buntu, sonai anjapanjapni, anjaha na mangkatahon hu bani Juda pakon hu Jerusalem, ʻManingon i lobei ni anjapanjap on do nasiam marsombah i Jerusalem?ʼ [318]

²³On pe, martaruh ma ho pakon tuanku Raja Assur, hubere ma bam dua ribu huda, naha sungkup do tarbere ho halak na mangajak ai?

²⁴Naha ma panahanmu mangimbang sahalak gelah hun bani juakjuak ni tuanku sietekan? Marhatengeran hu Masir do ho tene, halani gareta pakon bala siajak hudani? [319]

²⁵Ambahni ai, na so marhasoman Jahowa gakni ahu laho tangkog hu tanoh on, laho maniapkon on? Jahowa do mangkatahon hu bangku, ʻTangkog ma ho hu tanoh on, anjaha siapkon ma in!ʼ ”

²⁶Dob ai nini si Eliakim, anak ni si Hilkia pakon si Sebna ampa si Joah ma hu bani Rabsake ai, “Mahua hata Aram ma hatahon ham hu bani juakjuakmu on, ai iarusi hanami do in; ulang ma hatahon ham hata Jahudi bannami i lobei ni halak na mabuei, na i atas tembok in.” [320]

²⁷Tapi nini Rabsake ai ma hu bani sidea, “Ai hu bani tuanmu gakni pakon hubam ahu isuruh tuanku mangkatahon hata on, ai lang dihut do hu bani dalahi na i atas tembok in, na maningon mangankon ginagatni anjaha na manginum bah niinumni rap pakon hanima?”

²⁸Dob ai jongjong ma Rabsake ai ipagogoh ma sorani mangkatahon ibagas hata Jahudi, “Tangihon nasiam ma hata ni raja na bolon on, raja ni Assur!” [321]

²⁹Sonon do hata ni raja ai, “Ulang ma ra nasiam paoto-otoon ni si Hiskia, ai lang tolapsi paluahkon nasiam hunbagas tanganku.

³⁰Anjaha ulang ma ra nasiam ojur-ojuron ni si Hiskia marhatengeran bani Jahowa, marhitei na mangkatahon, ʻSai paluahon ni Jahowa do hita, seng anjai ondoskonon-Ni huta on hubagas tangan ni Raja Assur.ʼ

³¹Ulang ma tangihon nasiam hata ni si Hiskia, ai sonon do hata ni Raja Assur, Mardamei ma nasiam pakon ahu, anjaha luar ma nasiam manjumpahkon ahu, ase ganup nasiam bulih mangan hun bani hayu anggurni pakon hun bani jambuni, anjaha ganup nasiam bulih minum hun bani parigini, [322]

³²paima roh ahu mangalop nasiam hu tanoh na songon Tanoh nasiam on, hu tanoh hatubuhan ni gandum pakon anggur, hu tanoh na lobihan bani ruti pakon pohon anggur, bani hayu jetun pakon manisan ni huramah, ase manggoluh nasiam, ulang matei. Sai ulang ma tangihon nasiam si Hiskia, ai paoto-otohon nasiam do ia anggo ihatahon, ʻSai paluahon ni Jahowa do hita!ʼ [323]

³³Naha, mintor tarpaluah naibata ni bangsa sipajuh begu-begu ma nagori ni sidea bei hun tangan ni Raja Assur? [324]

³⁴Ija do naibata ni Hamat pakon Arpad? Ija do naibata ni Separwaim, Hena pakon Iwa? Ai tarpaluah sidea do Samaria hun tanganku? [325]

³⁵Ise ma hun bani naibata ni nagori ondi na tolap paluahkon tanoh ni sidea hun tanganku? Mintor tarpaluah Jahowa ma Jerusalem hun bani tanganku?”

³⁶Jadi sip bei ma halak na mabuei ai, anjaha sakkababah hata pe lang ibalosi sidea ia, ai domma iparentahkon raja ai, “Ulang balosi nasiam ia!”

³⁷Dob ai roh ma si Eliakim, anak ni si Hilkia, haondosan ni rumah ai, pakon si Sebna jurutulis ai ampa si Joah, anak ni si Asap, panuturi ai, marayak si Hiskia marhiou na marigat, laho patugahkon hu bani haganup hata ni Rabsake ai. [326]