Read Batak Simalungun 2 RAJA-RAJA 19 Bible Online

2 RAJA-RAJA 19 - Batak Simalungun bible

2 RAJA-RAJA 19

¹Jadi dob ibogei Raja Hiskia hata ai, irigati ma hiouni, isorungkon ma hiou guni, dob ai laho ma ia hu Rumah ni Jahowa. [327]

²Dob ai isuruh ma si Eliakim, siramotkon rumahni ai, pakon si Sebna, jurutulisni ai rap pakon malim situaan, marhiou guni marayak Nabi Jesayas, anak ni si Amos. [328]

³Nini sidea ma hu bani, “Sonon do hata ni si Hiskia, ʻAri hasosakan, paminsangon pakon habadoron do ari on; jumpah ma namin panorangni tubuh na etek-etek, tapi seng dong gogoh laho manubuhkon. [329]

⁴Ra ibogei Jahowa Naibatamu do ganup hata ni Rabsake ai, na sinuruh ni tuanni, Raja Assur, laho mangapasi Naibata na manggoluh in, andohar ibalaskon hata na hinatahonni ai, na dob binogei ni Jahowa Naibatamu; antong martonggo ma ham mangapiti simasima na manggoluh in ope.” [330]

⁵Jadi dob das juakjuak ni Raja Hiskia hu bani si Jesayas,

⁶nini si Jesayas ma hu bani sidea, “Sonon ma hatahon nasiam hu bani tuan nasiam, sonon do hata ni Jahowa, ʻUlang ho mabiar pasal hata na dob binogeimu, na dob niapaskon ni juakjuak ni Raja Assur hu Bangku. [331]

⁷Tonggor ma, Ahu do na mamberehon bani sada tonduy, ase ibogei barita, gabe mulak hu tanohni, ase Ahu mambahen rasei ia marhitei podang ibagas tanohni sandiri.ʼ ” [332]

⁸Mulak ma Rabsake, anjaha jumpahsi ma Raja Assur marporang dompak Libna; ai domma ibogei hinan, na dob misir raja ai hun Lakis. [333]

⁹Anjaha dob i bogei si Sanherib pasal si Tirhaka, raja ni Etiopia, “Tonggor ma, domma bingkat ia laho marmunsuh dompak ham, isuruh ma use suruhanni hu bani si Hiskia mangkatahon,

¹⁰Sonon ma hatahon nasiam hu bani si Hiskia raja ni Juda, ʻUlang ma ra ho paoto-otoon ni Naibatamu, na pinangunsagahkonmin marhitei na mambagahkon, na so ondoskononkon Jerusalem hubagas tangan ni Raja Assur.ʼ [334]

¹¹Tonggor ma, domma ibogei ho na binahen ni Raja Assur hu bani ganup nagori, naha paniapkonni bani ai ganup. Mintor tumaram ma maluah ia ho?

¹²Tarpaluah naibata ni bangsa-bangsa ai do sidea, ai ma bangsa-bangsa, na siniapkon ni ompungku: Gosan, Haran, Resep, pakon ginompar ni si Eden na marianan i Tilasar? [335]

¹³Ija do raja ni Hamat, raja ni Arpad, raja hun huta Separwain, raja hun Hena pakon raja hun Iwa?”

¹⁴Jadi ijalo si Hiskia ma surat ai hun tangan ni suruhan ai, anjaha ibasa ma ai; dob ai tangkog ma ia hu Rumah ni Jahowa, anjaha ipaherbang raja ai ma surat ai i lobei ni Jahowa,

¹⁵anjaha martonggo ma ia hu bani Jahowa, nini ma, “Ham Jahowa, Naibata ni Israel, na marparatas bani herubin, sahalak Ham do Naibata ni haganup harajaon na i atas tanoh on, Ham do na manompa langit pakon tanoh on! [336]

¹⁶Paeleng Ham ma Jahowa pinggol-Mu, anjaha tangar ma! Ungkap Ham ma panonggor-Mu, anjaha tonggor ma! Tangar Ham ma hata ni Sanherib ai, na sinuruh hujon, laho mangapasi Ham, Naibata na manggoluh in. [337]

¹⁷Tongon do, Ham Jahowa, domma isiapkon raja ni Assur ganup bangsa sipajuh begu-begu pakon tanoh ni sidea.

¹⁸Anjaha domma igijigkon hubagas apuy naibata ni sidea ai, ai seng tongon naibata ai, tapi bahen-bahenan ni tangan ni jolma do, hayu pakon batu, halani ai do ase isiapkon ai. [338]

¹⁹On pe, Ham Jahowa, Naibatanami, sai paluah Ham ma hanami hun tanganni, ase itanda haganup harajaon na i atas tanoh on, paboa Ham tumang hansa Naibata, Ham Jahowa.” [339]

²⁰Dob ai isuruh si Jesayas, anak ni si Amos ma na mangkatahon hu bani si Hiskia, “Sonon do hata ni Jahowa, Naibata ni Israel, ʻDomma Hutangihon tonggomu na hu Bangku pasal Sanherib, raja ni Assur. [340]

²¹On do hata na tinonahkon ni Jahowa pasalsi, ʻPis do uhur-Ni mangidah ho, i apasi anak boru, boru Sion in do ho; iupir-upirhon boru ni Jerusalem do uluni i pudimu. [341]

²²Ise do na nirehean pakon na niapasanmin? Dompak ise do na pinamalingmin soramu, anjaha ipatingkal ho matamu? Dompak na Pansing ni Israel do! [342]

²³Marhitei suruhanmu iapasi ho do Jahowa, anjaha ihatahon ho, ʻRap pakon garetangku na buei in, laho do ahu naik hu atas ni dolog, daoh masuk hu Libanon; huroboh do hayu aresni sigijangan pakon hayu marantini sijengesan. Humasuki do das ronsi suhi-suhini sidaohan, hu tombakni sipotpotan. [343]

²⁴Huhurak do parigi anjaha huinum do bah na legan, anjaha huarsik do marhitei tapak-tapak ni naheihu ganup bah ni Masir.ʼ

²⁵Seng ope i bogei ho, na dob sonai hutotapkon hun bani ari nabasaia, sipamasaonku sonari, ai ma ase i siapkon ho huta na marbatar-batar gabe tambusan batu, [344]

²⁶anjaha pangisini ai, na so margogoh ai, gabe tarsonggot anjaha gaor, gabe songon suan-suanan na i ladang anjaha songon poyon-poyon na galek, songon poyon i atas rumah, anjaha songon gandum na horahan. [345]

²⁷Tapi hubotoh do parjongjongmu pakon parhundulmu, pardaratmu pakon parmasukmu ampa pangoga-ogamu dompak Ahu.

²⁸Halani mangoga ho dompak Ahu anjaha das hu pinggol-Hu hajungkatonmu, bahenon-Ku ma halihir-Hu hu igungmu pakon kokang-Ku hu pamanganmu, anjaha paulakon-Ku ho hun dalan harorohanmu. [346]

²⁹Anjaha on ma partinandaan bamu alo Hiskia: Panganonmu ma tahun on omei sagak pakon bani tahun na paduahon; tapi patolutahunkon martidah ma hanima anjaha marpariama, manuan hayu anggur anjaha mangankon buahni.

³⁰Anjaha simasima na maluah hun bani ginompar ni Juda, marurat ma use hu toruh anjaha marbuah dompak datas; [347]

³¹ai hun Jerusalem do luar sada simasima, anjaha hun Dolog Sion sada hulanan na pinaluah. Ringis ni Jahowa Zebaot do sijadihon ai. [348]

³²Halani ai sonon do hata ni Jahowa pasal raja ni Assur. Seng anjai masuk ia hubagas huta on, barang panahkononni sada lingkit hujon, barang roh ia hulobei ni huta on margantar, barang bahenonni hubuan inggot huta on. [349]

³³Maningon hun bani dalan harorohanni ai ia mulak, tapi seng anjai masuk ia hubagas huta on, nini Jahowa.

³⁴Ai sihol ondingan-Ku do huta on laho paluahkon on, halani Ahu sandiri pakon halani juakjuak-Ku si Daud.” [350]

³⁵Anjaha bani bornginni ai, luar ma malekat ni Jahowa, gabe ibunuh ma i parsaranan ni Raja Assur saratus ualuh puluh lima ribu halak. Jadi dob puho sidea girah patarni ai, tonggor ma, haganupan ai domma gabe bangkei. [351]

³⁶Dob ai bingkat ma Sanherib, raja ni Assur mulak hu hutani, anjaha marianan ma ia i Ninive. [352]

³⁷Jadi sanggah na manumbah ia ibagas rumah ni Nisrok, naibatani ai, ibunuh anak ni si Adramelek pakon si Sareser ma ia bani podang, dob ai, maporus ma sidea hu tanoh Ararat. Jadi si Asarhaddon, anak ni ai ma gabe raja manggantihsi. [353]