Read Batak Simalungun 2 RAJA-RAJA 4 Bible Online

2 RAJA-RAJA 4 - Batak Simalungun bible

2 RAJA-RAJA 4

¹Dob ai roh ma sada naboru, parinangon ni sada susian ni nabi-nabi mangadu-adu hu bani si Elisa, “Domma matei juakjuakmu, paramangonku; anjaha ibotoh ham do, marhabiaran do juakjuakmu ondi bani Jahowa. Hape roh ma siparidou ai laho mambuat anakku na dua ai gabe jabolonni.” [37]

²Jadi nini si Elisa ma hu bani, “Aha ma bahenonku bamu? Patugah ham ma bangku, atap aha dong bamu i rumah!” Nini ma, “Seng dong bani jabolonmu naboru on i rumah, sobali sada gusi na marisi minak otik.” [38]

³Dob ai nini si Elisa ma, “Laho ma ham mangindo hudon na lumei hun bani hasoman na dohorhon rumahmu, tapi ulang maetektu.

⁴Masuk ma ham hu rumahmu rap pakon anakmu, anjaha tutup ham ma labah ai i pudimu, dob ai useihon ham ma minak ai hubagas ganup hudon ai; dob gok sada, palambung ham ma ai.”

⁵Dob ai laho ma naboru ai hun bani, anjaha ioruk ma labah ai i pudi ni pakon i pudi ni anakni ai; ia do mangisi hudon ai anjaha anakni ai mamberei hudon ai.

⁶Jadi dob gok hudon ai ganup, nini ma hu bani anakni ai, “Boan hujon sada nari hudon in! Tapi nini ma hu bani, ʻSeng dong be hudon na legan.ʼ Jadi maronti ma minak ai manjalir.”

⁷Dob ai laho ma naboru ai patugahkon ai hu bani halak ni Naibata ai, jadi nini ma, “Laho ma ham, jual ma minak ai, anjaha galar ma utangmu ai; na lobih ai bahen hagoluhanmu pakon hagoluhan ni anakmu ma ai.” [39]

⁸Bani na sadari laho ma si Elisa hu Sunem; adong do ijai marianan sada naboru na bayak, na mangarahkonsi mangan. Barang piga hali montas ia hunjai, sai tuluy do ia hunjai laho mangan. [40]

⁹Jadi nini ma hu bani paramangonni, “Tonggor ma, huahap halak na ma pansing ni Naibata do halak ai, na tongtong tuluy hu banta.

¹⁰Bahen hita ma bani sada kamar pardatas, na etek-etek, na mardingding papan, anjaha nahkon hita ma bani ijai sada podoman, meja, kursi ampa lampu, ase anggo tuluy ia hu banta, boi ia marianan ijai.” [41]

¹¹Bani na sadari roh ma ia hujai; masuk ma ia hu kamar pardatas ai, anjaha ipatibal ma bani laho pahosahkon.

¹²Nini ma hu bani si Gehasi, suruh suruhanni ai, “Dilo ma naboru par-Sunem ai!” Jadi dob idilo jongjong ma ia i lobei ni.

¹³Ai domma ihatahon hinan hu bani si Gehasi, “Hatahon ma bani, tonggor ma, domma pala sonin pangkalojahonmu bannami, aha ma boi bahenonku balosni ai bamu? Adong do siapitan pasal ham i lobei ni raja in atap i lobei ni pambobai ni balani?” Jadi nini ma mambalosisi, “Sonang do marianan i tongah-tongah ni bangsangku ahu.” [42]

¹⁴Dob ai nini ma, “Aha do na talup bahenon bani?” Jadi nini si Gehasi ma, “Seng dong anakni, anjaha domma matua paramangonni.”

¹⁵Nini ma, “Dilo ma ia!” Jadi dob idilo ia, jongjong ma ia i labah.

¹⁶Dob ai nini si Elisa ma, “Sonon tahun in, adong ma anak siurdo-urdohononmu.” Jadi nini ma mambalosi, “Ham tuan, halak ni Naibata, ulang ma ladungi jabolonmu naboru on!” [43]

¹⁷Dob ai boratan rumah ma naboru ai, anjaha itubuhkon ma sada anak bani panorangni bani tahun na mangihut hujai, songon na dob hinatahon ni si Elisa hinan hu bani.

¹⁸Dob magodang dakdanak ai, laho ma ia bani na sadari marayak bapani hu parpariamaan.

¹⁹Jadi nini ma hu bani bapani, “Ulungku! Ulungku!” Nini bapani ai ma hu bani sada suruh-suruhanni, “Boan ma ia bani inangni.”

²⁰Jadi iombah ma ia mamboansi hu bani inangni; hundul ma ia bani abingan ni inangni ronsi tongah ari, dob ai matei ma ia.

²¹Dob ai iboan ma ia hu atas, anjaha itibalhon ma ia bani podoman ni halak ni Naibata ai, ioruk ma labah ai, dob ai luar ma ia.

²²Idilo ma paramangonni, anjaha nini ma, “Suruh ham ma bangku sahalak suruhan, ambahni ai sada halode boru-boru, ase podas ahu laho marayak halak ni Naibata, dob ai mulak use.”

²³Nini paramangonni ai ma, “Mase ma laho ham marayaksi sadari on? Ai seng poltak ni bulan barang ari Sabat sadari on.” Nini ma mambalosi, “Tenger ma uhurmu!” [44]

²⁴Dob ai ipasang ma palana ni halode boru-boru ai, anjaha nini ma hu bani suruh-suruhanni, “Bosik ma, ulang marsaran-saran, anggo seng ahu mangkatahon bam.”

²⁵Jadi bingkat ma sidea, anjaha das hu bani halak ni Naibata ai i Dolog Karmel. Jadi dob iidah halak ni Naibata ai ia roh, nini ma hu bani si Gehasi, suruh-suruhanni ai, “Tonggor ma, andai ma roh naboru par-Sunem ai. [45]

²⁶On pe, marlintun ma ho manjumpahkonsi, anjaha hatahon ma hu bani, ʻHoras do ham? Horas do paramangonmu? Horas do dakdanak ai?ʼ ” Jadi nini ma mambalosi, “Horas do.”

²⁷Jadi dob das ia hu dolog ai hu bani halak ni Naibata, idahop ma naheini, tapi roh ma si Gehasi manjuarhonsi. Jadi nini halak ni Naibata ai ma, “Paturut ma ia, ai pusok tumang do uhurni; iponopkon Naibata do ai hun bangku, seng martugah-tugah Ia pasal ai bangku.” [46]

²⁸Dob ai nini naboru ai ma, “Ai adong hupangindo anak hun bani tuannami? Ai lang huhatahon hinan do, ʻUlang ma oto-otoi ham ahu!ʼ ” [47]

²⁹Nini ma hu bani si Gehasi, “Gonditkon ma gonditmu, jolom ma tungkotku ibagas tanganmu, anjaha laho ma ho hujai. Anggo pajumpah ho pakon halak ulang balosi, anjaha tampeihon ma tungkotkon bani bohi ni dakdanak ai!” [48]

³⁰Tapi nini inang ni dakdanak ai ma, “Songon sintongni manggoluh Jahowa, anjaha manggoluh pakon hosahmu, seng anjai tadingkononku ham.” Jadi bingkat ma si Elisa mangirikkonsi. [49]

³¹I lobei si Gehasi ma sidea, anjaha itampeihon ma tungkot ai bani bohi ni dakdanak ai, tapi seng dong sora barang tanda paboa na manggoluh ia. Jadi mulak ma ia manjumpahkon si Elisa laho patugahkon ai bani, nini ma, “Seng bodak dakdanak ai!” [50]

³²Dob masuk si Elisa hu rumah ai, iidah ma dakdanak ai tibal matei i podomanni.

³³Masuk ma ia, anjaha ioruk ma labah i pudi ni sidea na dua, anjaha martonggo ma ia hu bani Jahowa. [51]

³⁴Dob ai ipapodom ma dirini i atas ni dakdanak ai, ibahen ma pamanganni hu atas pamangan ni dakdanak ai, matani hu atas matani, tanganni hu atas ni tanganni; jadi sanggah na ipapodom dirini hu atasni gabe mamungkah malas ma angkula ni dakdanak ai. [52]

³⁵Dob ai jongjong ma ia, anjaha mardalan hujai hujon i rumah ai, dob tangkog ia use hu atas ipaunduk ma dirini bani, marbarsi ma dakdanak ai pitu hali lanjar ipabodak ma matani.

³⁶Idilo si Elisa ma si Gehasi, anjaha nini ma hu bani, “Dilo ma naboru par Sunem in!” Jadi idilo ma ia. Daskonsi ia hu bani nini ma, “Na, togu ham ma anakmu on.” [53]

³⁷Roh ma ia, manrogop ma ia bai naheini unduk das hu tanoh; dob ai itogu ma dakdanak ai, anjaha laho ma ia hu darat. [54]

³⁸Dob ai mulak ma use si Elisa hu Gilgal, tudu sanggah masa lohei i nagori ai. Jadi sanggah na hundul-hundul ai susian ni nabi ai i lobei ni, nini ma hu bani suruh-suruhanni ai, “Hodohon ma hudon na banggal ai bani apuy ai, anjaha lompah ma lowoh bani susian ni nabi on.” [55]

³⁹Dob ai laho ma sada halak hu juma manalong lowoh gabe jumpahsi ma andor ni ansimun harangan, jadi iputiki ma hunjai ansimun harangan, gok hiouni; dob mulak ia, iirisi ma ai hubagas hudon panlompahan ai.

⁴⁰Jadi isonduki ma ai bahen panganon ni halak ai. Tapi sanggah mangankon na nilompah ai sidea, nini ma doruh-doruh, “Ham halak ni Naibata, hamateian do hape ibagas hudon on! Seng tarpangan sidea ai.”

⁴¹Tapi nini si Elisa ma, “Boan nasiam ma hujon nitak!” Itirtirhon ma ai hubagas hudon ai, anjaha nini ma, “Sonduki ma ai hu bani halak ai, ase mangan sidea!” Anjaha seng dong be mara ibagas hudon ai. [56]

⁴²Adong ma sada halak na roh hun Baal-Salisa, mamboan bani halak ni Naibata ai ruti limbuah, dua puluh hibul ruti topung gandum pakon buah gandum na pinalumat ibagas sumpit. Dob ai nini si Elisa ma, “Bere ma in bani halak na mabuei in, ase mangan sidea.” [57]

⁴³Nini suruh-suruhanni ai ma mambalosi, “Naha ma parpangidangku on bani saratus halak?” Tapi nini ma, “Bere ma in hu bani sidea, ase mangan sidea, ai sonon do hata ni Jahowa, ʻManingon mangan do sidea, anjaha adong ope teba.ʼ ” [58]

⁴⁴Iidangkon ma ai hu bani sidea. Mangan ma sidea anjaha adong ope teba, romban hu bani hata ni Jahowa. [59]