Read Batak Simalungun 2 RAJA-RAJA 6 Bible Online

2 RAJA-RAJA 6 - Batak Simalungun bible

2 RAJA-RAJA 6

¹Dob ai nini susian ni nabi-nabi ai ma hu bani si Elisa, “Tonggor ma, ianannami na i lobeimu on, mapisottu do in bannami. [76]

²Lopas ham ma hanami laho hu Bah Jordan sihol mangalop tiang sada bei hunjai, anjaha lopas ham ma hanami padearhon ianan bannami.” Jadi nini ma mambalosi, “Laho ma nasiam!”

³Dob ai nini sada halak ma, “Mahua dihut ma ham laho rap pakon juakjuakmu on.” Nini ma mambalosi, “Dihut pe ahu.”

⁴Jadi laho ma ia rap pakon sidea. Daskonsi sidea hu Jordan, iroboh sidea ma hayu.

⁵Sanggah manroboh hayu sahalak hun bani sidea, madabuh ma mata ni tangkei ai hubagas bah, gabe mandoruhi ma ia, nini ma, “Ham tuannami! Na pininjam do ai.”

⁶Tapi nini halak ni Naibata ai ma, “Huja do ai madabuh?” Dob ai ipatuduhkon ma ianan ai bani, iponggol ma sada hayu anjaha igijingkon ma ai hujai gabe mumbang ma bosi ai.

⁷Dob ai nini ma, “Buat ma ai!” Jadi idurdurhon ma tanganni laho mambuat ai.

⁸Bani na sahali sanggah marporang raja ni halak Aram pakon Israel, manriah ma ia pakon juakjuakni, nini ma, “Bani ianan na ijai ai ma nasiam manggompangi sidea.” [77]

⁹Tapi isuruh halak ni Naibata ai ma na palumbahon raja ni Israel, nini ma, “Jaga ulang montas ham hun bani ianan ai, ai ijai do halak Aram manggompangi.”

¹⁰Dob ai isuruh raja ni Israel ma balani bani ianan, na nilumbahon ni halak ni Naibata ai bani. Sonai ma parlumbani bani, gabe maluah ia, seng pitah sahali barang dua hali tumang.

¹¹Jadi manggila ma raja ni Aram halani ai; idilo ma juakjuakni anjaha nini ma hu bani sidea, “Seng ra nasiam patugahkon hu bangku, atap ise hun banta on na hampit Raja Israel?”

¹²Dob ai nini sahalak hun bani juakjuakni ai ma mambalosi, “Seng dong tuannami anjaha rajanami; tapi si Elisa, nabi na i Israel ai do na patugahkon hu bani raja ni Israel ganup hata na hinatahonmu ibagas kamar podomanmu.” [78]

¹³Nini raja ai ma, “Laho anjaha pindahi nasiam ma, barang ija do ia, ase husuruh halak na manangkapsi.” Dong ma halak na patugahkon bani, “Tonggor ma, i Dotan do ia.” [79]

¹⁴Dob ai ipabingkat raja ai ma hujai huda, gareta pakon buei bala. Daskonsi sidea bornginni ai, iinggoti sidea ma huta ai.

¹⁵Jadi sanggah na puho girah sogod parhorja ni halak ni Naibata ai laho hu darat namin, tonggor ma, iinggoti buei bala marhasoman huda pakon gareta do huta ai. Nini juakjuakni ai ma hu bani, “Ham tuannami, aha ma sibahenonnami?” [80]

¹⁶Tapi nini ma, “Ulang ho mabiar, ai bueinan do na mangkasomani hita hun bani na mangkasomani sidea.” [81]

¹⁷Dob ai martonggo ma si Elisa, nini ma, “Ham Jahowa, sai patonggor ma mata ni juakjuakkon, ase torang marpangidah.” Jadi ipatonggor Jahowa ma mata ni juakjuak ai, gabe iidah ma, gok do dolog ai bani huda ampa gareta apuy inggot si Elisa. [82]

¹⁸Jadi sanggah tuad sidea manjumpahkonsi, martonggo ma si Elisa hu bani Jahowa, nini ma, “Bahen Ham ma pitung mata ni bangsa on!” Jadi pitung ma mata ni sidea ibahen Jahowa, romban hu bani hata ni si Elisa. [83]

¹⁹Dob ai nini si Elisa ma hu bani sidea, “Seng on dalan ai, anjaha seng in huta ai, irikkon nasiam ma ahu, ase huarahkon nasiam hu bani halak na pinindahan nasiam ai.” Jadi iarahkon ma sidea hu huta Samaria.

²⁰Dob das sidea hu Samaria, nini si Elisa ma, “Ham Jahowa, buha Ham ma mata ni halak on, ase marpangidah sidea; anjaha tonggor ma, i tongah-tongah ni Samaria do sidea.”

²¹Dob iidah raja ni Israel sidea, nini ma hu bani si Elisa, “Hubunuh ma sidea, bapa?” [84]

²²Nini ma mambalosi, “Seng bulih bunuhonmu sidea. Mintor bunuhonmu ma halak na tinabanmu marhitei podangmu barang panahmu? Pasirsir ham ma ruti pakon bah bani sidea, ase mangan anjaha minum sidea, ase mulak sidea hu bani tuan ni sidea.” [85]

²³Dob ai ipasirsir raja ai ma bani sidea parpanganon banggal; anjaha dob mangan pakon minum sidea, isuruh ma sidea mulak hu bani tuan ni sidea. Olat ni ai seng roh be halak Aram manrampok hu tanoh Israel. [86]

²⁴I pudi ni na masa ai ipatumpu si Benhadad, raja ni Aram ma ganup balani; tangkog ma ia, anjaha ihubu ma Samaria. [87]

²⁵Jadi masa ma lohei maningting i Samaria, sanggah pangkubuon ai, gabe marharga ma sada ulu ni halode ualuh puluh sekel pirak, anjaha saparompat tumba indahan ni kuhuy lima puluh sekel pirak. [88]

²⁶Jadi sanggah mardalan-dalan sahali raja ni Israel i atas tembok, doruh-doruh ma sahalak naboru hu bani raja ai, nini ma, “Urupi ham ma ahu, rajanami.” [89]

²⁷Tapi nini ma mambalosi, “Anggo seng Jahowa mangurupi ham, hunja ma tarbahen ahu mangurupi ham? Hun pardogeian barang hun pangilangan anggur?” [90]

²⁸Ambahni ai isungkun raja ai ma ia, “Aha bamu?” Nini ma mambalosi, “Nini naboru ai do bangku, ʻBere ma anakmin, ase rap pangan hita sadari on, patar pangan hita pe anakku.ʼ [91]

²⁹Halani ai ilompah hanami ma anakku, anjaha ipangan hanami ma ia. Patarni ai ningku ma hu bani, ʻBere ma anakmin, ase pangan hita!ʼ Tapi iponopkon do anakni ai.ʼ ”

³⁰Jadi dob ibogei raja ai hata ni naboru ai, irigati ma pakeianni, sanggah na mardalan-dalan ia i atas tembok ai. Iidah bangsa ai ma, adong do hape pakeian guni bani angkulani hampit bagas. [92]

³¹Anjaha nini ma, “Maningon sonai ma bahenon ni Naibata hu bangku anjaha lobih ope, anggo totap ope ulu ni si Elisa, anak ni si Safat, bani abarani sadari on.” [93]

³²Tapi hundul-hundul do si Elisa ibagas rumahni, anjaha partua-partua ai hundul i lambungni. Jadi isuruh raja ai ma sada halak hun lambungni marayaksi. Tapi sanggah seng das ope suruhan ai hu bani si Elisa, domma ihatahon hinan hu bani partua-partua ai, “Seng ibotoh nasiam, na dob sinuruh ni pamunuh ai do suruhanni laho manampul ulungku? On pe anggo roh suruhan ai, oruk nasiam ma labah in, anjaha onjar nasiam ma ia mulak bani labah in. Ai lang domma tarbogei gurojob ni nahei ni tuanni hun pudini?”

³³Sanggah na marsahapi ai ope suruhan ai pakon sidea, tonggor ma, roh ma homa raja ai tuad hu bani, anjaha nini ma, “Tonggor ma, marharorohan hun bani Jahowa do hamagouan on! Benaha be marnalom ni uhur ahu bani Jahowa?” [94]