Read Batak Simalungun 2 RAJA-RAJA 8 Bible Online

2 RAJA-RAJA 8 - Batak Simalungun bible

2 RAJA-RAJA 8

¹Tapi domma marsahap hinan si Elisa hu bani naboru, paranak na dob pinagoluhni ai, sonon, “Bingkat ma ham, bungkas rap pakon parrumahmu, manginsolat atap ija marosuh ham, ai domma ihatahon Jahowa roh lohei, anjaha tongon do masa i nagori ai, pitu tahun dokahni.” [105]

²Jadi bingkat ma naboru ai anjaha ibahen ma romban hu bani hata ni halak ni Naibata ai, gabe bingkat ma ia pakon parrumahni, anjaha manginsolat ma i tanoh ni halak Palistim pitu tahun dokahni.

³Tapi dob salpu na pitu tahun ai, mulak ma naboru ai hun tanoh ni halak Palistim; anjaha laho ma ia mangadu-adu hu bani raja ai laho mangindo mulak rumahni pakon jumani. [106]

⁴Tudu sangah marsahapi do raja ai pakon si Gehasi, juakjuak ni halak ni Naibata ai, nini, “Pajojor ma hu bangku ganup horja habanggalon na binahen ni si Elisa!” [107]

⁵Anjaha sanggah na binaritahonni ai hu bani raja ai, na pinagoluhni ai na dob matei, roh ma naboru simada anak na dob pinagoluh ai mangadu-adu hu bani raja ai laho mangindo mulak rumahni pakon jumani. Jadi nini si Gehasi ma, “Tuannami anjaha rajanami! On ma naboru ai, anjaha on ma anakni na pinagoluh ni si Elisa.”

⁶Anjaha ipatae raja ai ma ia, gabe ipajojor naboru ai ma pasal ai bani. Dob sonai isuruh raja ai ma sada halak pangulu pakonsi, nini ma, “Paulak ma hu bani haganup rupeini hinan, sonai homa ulih ni tanohni singgan ni parbungkasni hinan hun nagori on ronsi sonari.” [108]

⁷Sanggah das si Elisa hu Damaskus, tudu do si Benhadad, raja ni Aram boritan. Dob adong na patugahkon bani, “Roh do halak ni Naibata ai hu huta on!” [109]

⁸Nini raja ai ma hu bani si Hasael, “Buat ma siluah, laho ma ham manjumpahkon halak ni Naibata ai anjaha sungkun ma Jahowa marhiteihonsi sonon, ʻMalum ope gakni huahap hun bani naborit on?ʼ ” [110]

⁹Dob ai laho ma si Hasael manjumpahkonsi, iboan ma hu bani sagala ugas na maharga na adong i Damaskus, boratan ompat puluh unta. Dob das ia hu lobei ni si Elisa, nini ma, “Isuruh anakmu si Benhadad, raja ni Aram do ahu bamu manungkun, ʻMalum ope gakni huahap hun bani naborit on?ʼ ” [111]

¹⁰Dob ai ihatahon si Elisa ma hu bani, “Laho ma ham, patugah ma hu bani, ʻManingon malum do ahapkononmu!ʼ Tapi tene domma ipatalar Jahowa bangku, maningon matei do ia.” [112]

¹¹Dob ai kawah ma si Elisa dompaksi, pala songgotan ia. Salpu ai tangis ma halak ni Naibata ai. [113]

¹²Jadi nini si Hasael ma, “Mase tangis tuan nami?” Nini ma mambalosi, “Halani domma hubotoh hamagouan na sihol bahenonmu hu bani halak Israel; surbuyonmu do bani apuy huta ni sidea na marbatar-batar ai, bunuhonmu do anak garama ni sidea marhitei podang, ropukonmu do na etek-etek ni sidea anjaha lapahonmu do naboru ni sidea na boratan rumah.” [114]

¹³Dob ai nini si Hasael ma, “Ise ma ahu juakjuakmu on, baliang on, ase bahenonni ma pahara na sonin banggalni?” Nini si Elisa ma mambalosi, “Domma ipataridahkon Jahowa hu bangku paboa ham do bangkit raja manggomgom Aram.” [115]

¹⁴Dob ai misir ma ia hun bani si Elisa, anjaha das ma ia hu bani tuanni, na mangkatahon hu bani, “Aha do ihatahon si Elisa bamu?” Jadi nini ma mambalosi, “Ihatahon do hu bangku, paboa maningon malum do ahapkononmu.”

¹⁵Tapi patarni ai ibuat ma salimut, isornobkon ma ai hubagas bah anjaha irungkubkon ma ai hu bohini, gabe matei ma ia. Jadi si Hasael ma bangkit manggantihsi.

¹⁶Palimatahunkon dob manrajai si Joram, anak si Ahab, raja ni Israel bangkit raja ma si Joram, anak ni si Josafat, raja ni Juda. [116]

¹⁷Marumur tolu puluh dua tahun do ia bangkit raja ai, anjaha ualuh tahun do dokahni manrajai i Jerusalem.

¹⁸Anjaha dalan ni Raja-raja Israel do iirikkon, songon na binahen ni ginompar ni si Ahab, ai boru ni si Ahab do parinangonni. Ihorjahon do sogam ni uhur ni Jahowa. [117]

¹⁹Tapi seng ra Jahowa mangagou Juda halani si Daud juakjuak-Ni ai, songon na pinarbagah-Ni ai hinan bani, paboa bereon-Ni do sada suluh bani pakon hu bani anakni tongtong. [118]

²⁰Bani panorangni marbalik do Edom hun bani panggomgomion ni Juda, anjaha ipabangkit sidea do sada raja bani sidea. [119]

²¹Jadi bingkat ma si Joram hu Zair rap pakon ganup garetani; borngin-borngin laho ma ia pakon kopala-kopala ni gareta porang mandorab halak Edom, na manginggoti sidea ai, gabe maporus ma bangsa ai hu lampolamponi bei.

²²Tapi age pe sonai lanjar marbalik do Edom hun bani panggomgomion ni Juda das hu bani sadari on. Dob ai marbalik ma homa Libna bani panorang ai. [120]

²³Barita na legan pasal si Joram pakon ganup na binahenni, ai lang tarsurat do ai ibagas buku Barita ni Raja-raja Juda.

²⁴Dob ai modom ma si Joram pakon ompungni, anjaha tartanom ma ia i lambung ni ompungni, i huta ni si Daud, jadi si Ahasya, anakni ai ma bangkit raja manggantihsi.

²⁵Pasapuluh-duatahunkon dob manrajai si Joram, anak ni si Ahab, raja ni Israel, bangkit raja ma si Ahasya, anak ni si Joram, manggomgom Juda.

²⁶Marumur dua puluh dua tahun do si Ahasya, sanggah na bangkit ai ia gabe raja, anjaha satahun do ia manrajai i Jerusalem. Ia goran ni inangni, si Atalya do, pahompu ni si Omri, raja ni Israel. [121]

²⁷Ia pe iirikkon do dalan ni ginompar ni si Ahab, ihorjahon do sogam ni uhur ni Jahowa, songon ginompar ni si Ahab, ai hela ni ginompar ni si Ahab do ia. [122]

²⁸Bingkat do ia pakon si Joram, anak ni si Ahab, marporang dompak si Hasael, raja ni Aram i Ramot-Gilead, ija si Joram luha ibahen halak Aram. [123]

²⁹Dob ai mulak ma Raja Joram hu Jesreel, laho patambarhon luhani, na binahen ni halak Aram ai i Ramot, sanggah marporang ia dompak si Hasael, raja ni Aram. Jadi tuad ma si Ahasya, anak ni si Joram, raja ni Juda, sihol manungkir si Joram, anak ni si Ahab, i Jesreel, ai boritan do ia. [124]