Read Batak Simalungun 1 KRONIKA 10 Bible Online

1 KRONIKA 10 - Batak Simalungun bible

1 KRONIKA 10

¹Dob ai marporang ma halak Palistim dompak halak Israel, gabe maporus ma halak Israel i lobei ni halak Palistim, anjaha marradagan i dolog Gilboa. [123]

²Ipardakdak halak Palistim ma si Saul pakon anakni ai, anjaha ibunuh halak Palistim ma si Jonatan, si Abinadab pakon si Malhisua, anak ni si Saul ai. [124]

³Lambin jobuni ma porang ai dompak si Saul, anjaha jumpah halak siparpanah ai ma ia, ugahan ma ia ibahen halak siparpanah ai.

⁴Dob ai nini si Saul ma dompak siusung sinjatani, “Sintak ma podangmu anjaha tikamhon ma hu bangku, ase ulang roh halak na so marsunat on mandorun ahu.” Tapi seng ra juakjuak siusung sinjatani ai, ai biar tumang do ia. Dob ai ibuat si Saul ma podangni, lanjar ijombahon ma dirini hujai. [125]

⁵Dob iidah juakjuak siusung sinjatani ai, na dob matei si Saul, ijombahon ma homa dirini, lanjar matei.

⁶Jadi matei ma si Saul, ia pakon anakni na tolu halak ai, ampa ganup ginomparni; rap matei do sidea.

⁷Dob iidah halak Israel, na marianan i pamah ai, na dob maporus halak Israel anjaha na dob matei si Saul pakon anakni ai, itadingkon sidea ma huta ni sidea lanjar maporus. Jadi roh ma halak Palistim marianan ijai.

⁸Patarni ai sanggah roh halak Palistim laho manrampasi na rasei ai, jumpah sidea ma si Saul pakon anakni ai tibal i dolog Gilboa.

⁹Jadi dob irampas sidea anjaha ibuat uluni pakon sinjatani, ipaebangkon sidea ma ai i tanoh ni halak Palistim inggot, laho patugahkon na masa ai bani gana-gana ni sidea, pakon hubani bangsa ai. [126]

¹⁰Dob ai inahkon sidea ma sinjatani ai hubagas rumah ni naibata ni sidea, tapi anggo uluni igantungkon ma i rumah ni naibata Dagon.

¹¹Jadi dob ibogei haganup parhuta Jabes-Gilead sagala na binahen ni halak Palistim ai hubani si Saul, [127]

¹²bingkat ma ganup halak siimbang munsuh, ibuat sidea ma bangkei ni si Saul pakon bangkei ni anakni ai, iboan ma ai hu Jabes anjaha itanom sidea ma holi-holi ni sidea i toruh ni jabi-jabi na i Jabes, anjaha marpuasa ma sidea pitu ari dokahni. [128]

¹³Jadi matei ma si Saul halani pangoseionni, na binahenni dompak Jahowa, halani na so niramotkonni hata ni Jahowa, anjaha halani na marsungkun ia hubani naboru partondung, laho mangindahi pangungkabon, [129]

¹⁴seng hubani Jahowa isungkun. Halani ai ibunuh Jahowa ma ia, anjaha ipatongon ma harajaon ai hubani si Daud anak ni si Isai. [130]