Read Batak Simalungun 1 KRONIKA 11 Bible Online

1 KRONIKA 11 - Batak Simalungun bible

1 KRONIKA 11

¹Dob ai martumpu ma ganup Israel marayak si Daud i Hebron, nini ma, “Tonggor ma, sisada holi-holi ampa sisada daging do hanami pakon ham. [131]

²Bani panorang na salpu, age sanggah si Saul ope raja, ham do na mambobahon Israel luar pakon masuk; anjaha Jahowa, Naibatamu do mangkatahon bamu, ʻHo do na maningon marmahan bangsang-Ku halak Israel, ho do maningon gabe raja bani sidea.ʼ ” [132]

³Jadi roh ma ganup pangintuai ni Israel marayak raja ai i Hebron, anjaha marpadan ma si Daud pakon sidea i Hebron i lobei ni Jahowa; jadi iminaki sidea ma si Daud gabe raja manggomgom Israel, romban hubani hata ni Jahowa hinan marhitei si Samuel. [133]

⁴Dob ai bingkat ma raja Daud rap pakon ganup Israel hu Jerusalem, ai ma Jebus; halak Jebus do na marianan i tanoh ai hinan.

⁵Ihatahon pangisi ni Jebus ma hubani si Daud, “Seng tumaram masuk ho hujon.” Hape italuhon si Daud do benteng Sion, ai ma huta ni si Daud.

⁶Ai domma ihatahon si Daud hinan, “Barang ise na parlobei, na mamunuh halak Jebusi ai, gabe kopala ma ia anjaha pambobai.” Si Joab, anak ni si Seruya do na parlobei manangkih hu atas, halani ai ma ase ia bangkit gabe pambobai. [134]

⁷Jadi marianan ma si Daud ibagas benteng ai; halani ai do ase igoran benteng ai huta ni si Daud.

⁸Dob ai ibatar-batari ma huta ai inggot, hun Milo nari torus maringgot, anjaha si Joab do padearhon na legan ai ibagas huta ai. [135]

⁹Dob ai lambin banggalni ma kuasa ni si Daud, ai ihasomani Jahowa Zebaot do ia. [136]

¹⁰On do kopala ni puanglima ni si Daud, na manungkolisi pajonam harajaonni, rap pakon ganup halak Israel, na pabangkitkonsi gabe raja, romban hubani hata ni Jahowa pasal Israel. [137]

¹¹On do bilangan ni puanglima ni si Daud: Si Jasobeam, anak ni si Hahmoni, kopala ni na tolu ai; idiharhon do tanjani dompak tolu ratus halak, na binunuhni bani sada panorang. [138]

¹²Dob ai si Eliasar, anak ni si Dodo, halak Ahohi; masuk hubani puanglima sitolu halak ai do ia. [139]

¹³Ia do hasoman ni si Daud i Pas-Dammim, sanggah na martumpu ijai halak Palistim. Adong do ijai sanlambar juma gok andolei. Sanggah na maporus bangsa ai i lobei ni halak Palistim, [140]

¹⁴laho ma ia jongjong i tongah-tongah ni juma ai, laho manjaga ai, anjaha italuhon ma halak Palistim ai. Ipaluah Jahowa do sidea marhasoman hamonangan bolon.

¹⁵Tuad do tolu halak humbani sitolu puluh kopala ai, hu dolog batu, hubani si Daud, hu liang Addulam; anjaha bala ni halak Palistim marsaran do i pamah Repaim [141]

¹⁶Ibagas benteng do ijia si Daud, anjaha bala ni halak Palistim i Betlehem do. [142]

¹⁷Tubuh ma sir ni uhur bani si Daud, nini ma, “Ise ma nani na ra mambere bah inumonku hun parigi na i Betlehem, na i lambung ni horbangan ai?”

¹⁸Jadi isungsung na tolu puanglima ai ma parsaranan ni halak Palistim, itahui sidea ma bah humbani parigi na i Betlehem, na i lambung ni horbangan ai, anjaha iboan sidea ma ai hubani si Daud. Tapi seng ra si Daud manginum ai, iuseihon ma ai bani Jahowa, [143]

¹⁹anjaha nini ma, “Daoh ma in humbangku ibahen Naibatangku mambahen na sonin. Mintor ma ahu manginum daroh ni halak on?” Ai hosah ni sidea do isoyahon sidea laho mangalop bah on. Halani ai seng ra ia manginum ai. Ai ma na binahen ni puanglima sitolu halak ai. [144]

²⁰Si Abisai pe, anggi ni si Joab, kopala do bani sitolu puluh halak ai. Idiharhon do tanjani dompak tolu ratus halak, anjaha ibunuhi ma sidea, gabe tarmurmur ma ia i tongah-tongah ni sitolu puluh halak ai. [145]

²¹Ia do simulianan humbani na tolu puluh halak ai, anjaha ia do kopala ni sidea; tapi seng taratasisi anggo sitolu halak ai. [146]

²²Si Benaya pe, anak ni si Joyada, sada halak na borani anjaha sihorjahon buei pambahenan, hun Kabsel do ia; ia do na manaluhon na dua anak ni si Ariel, na hun Moab ai. Masuk do ia homa anjaha ibunuh sada singa ibagas sada godung, bani sada ari, sanggah turun salju. [147]

²³Anjaha ibunuh do homa sada halak Masir, sada halak na bolon tumang lima asta ganjangni. Adong do ibagas tangan ni halak Masir ai sada tanja ansa sabang ni partonun; tapi tuad ma si Benaya manjumpahkonsi pakon sada tungkot, irampas ma tanja ai humbani tangan ni halak Masir ai, lanjar ibunuh ma ia marhitei tanjani sandiri. [148]

²⁴Ai ma na binahen ni si Benaya, anak ni si Joyada, gabe tarambilan ma ia i tongah-tongah ni na tolu puluh halak ai. [149]

²⁵Marsangap do ia i tongah-tongah ni na tolu puluh halak ai, tapi seng taratasisi anggo sitolu halak ai. Jadi ipabangkit si Daud ma ia gabe kopala ni pangawalni. [150]

²⁶Puanglima na legan ai: Si Asahel, anggi ni si Joab; si Elkana, anak ni si Dodo, na hun Betlehem; [151]

²⁷si Sammot na hun Harod; si Heles halak Peloni; [152]

²⁸si Ira, anak ni si Ikkes, halak Tekoa; si Abieser halak Anatot; [153]

²⁹si Sibbekai, halak Husati; si Ilai, halak Ahoah; [154]

³⁰si Maharai, halak Netopati; si Heled, anak ni si Bahanas, halak Netopati; [155]

³¹si Itai, anak ni si Ribai hun Gibea, halak Benyamin; si Benaya, halak Piratoni; [156]

³²si Hurai, hun bah Gas; si Abiel, halak Araba;

³³si Asmawet, hun Bah-Arum; si Eliahba, halak Saalboni; [157]

³⁴anak ni si Hasem, halak Gisonni; si Jonatan, anak ni si Sage, halak Harari;

³⁵si Ahiam, anak ni si Sahar, halak Harari; si Elipal, anak ni si Ur;

³⁶si Heper, halak Meherati; si Ahia, halak Peloni;

³⁷si Hesro, halak Karmeli; si Naharai, anak ni si Esbai;

³⁸si Joel, sanina ni si Natan; si Mibhar, anak ni si Hagri;

³⁹si Selek, halak Amoni; si Naharai, halak Beroti, siusung sinjata ni si Joab, anak ni si Seruya;

⁴⁰si Ira, halak Jitri; si Gareb, halak Jitri;

⁴¹si Uria, halak Heti; si Sabad, anak ni si Ahlai; [158]

⁴²Si Adina, anak ni si Sisa, halak Ruben, pambobai ni halak Ruben, tolu puluh halak hasomanni;

⁴³si Hanan, anak ni si Maaka; si Josafat, halak Miteni;

⁴⁴si Usia, halak Astarot; si Sama pakon si Jehiel, anak ni si Hotam, halak Aroer;

⁴⁵si Jediael, anak ni si Simri pakon si Joha anggini ai, halak Tisi;

⁴⁶si Eliel, halak Mahawi; si Jeribai pakon si Josawi anak ni si Elnaam; si Jitma, halak Moab;

⁴⁷si Eliel, si Obed, si Jaasiel halak Zoba.