Read Batak Simalungun 1 KRONIKA 13 Bible Online

1 KRONIKA 13 - Batak Simalungun bible

1 KRONIKA 13

¹Dob ai marriah ma si Daud pakon pambobai ni sisaribu halak pakon sisaratus halak ampa ganup kopala tene. [179]

²Nini si Daud ma dompak ganup tumpuan ni Israel ai: Anggo dear uhur nasiam anjaha harosuh ni Jahowa Naibatanta ai, mahua suruh hita ma na marayak saninanta, sagala na tading ai i sab tanoh ni Israel, ase rap sidea use marayak malim pakon halak Levi ibagas huta parbagianan ni sidea, ase martumpu sidea hu lambungta, [180]

³ase mulak boan hita hu tongah-tongahta poti ni Naibatanta; ai seng pindah-pindah uhurta hujai sanggah goluh ni si Saul. [181]

⁴Jadi sauhur ma tumpuan ai mambahen sonai, ai ganup do halak simbuei ai marhatongonkon hata ai.

⁵Jadi ipatumpu si Daud ma haganup Israel, singgan ni bah Sihor i Masir das ronsi Hamat, laho mangalop poti ni Naibata hun Kiryat-Jearim. [182]

⁶Tangkog ma si Daud rap pakon ganup Israel hu Baala, ai ma Kiryat-Jearim, i tanoh Juda, laho mamboan tangkog hunjai poti ni Naibata, na margoran mangihutkon goran ni Jahowa, na marparatas i babou ni Herubim. [183]

⁷Jadi iboan sidea ma poti ni Naibata i atas ni sada gareta na bayu hun rumah ni si Abinadab; si Usa pakon si Ahio do na manogu gareta ai. [184]

⁸Tapi anggo si Daud pakon haganup Israel marompot do manortori i lobei ni Naibata, marhasoman doding, husapi, arbab, tambur, ogung pakon tarompet. [185]

⁹Sanggah das sidea hu pardogeian Kidon, idurdurhon si Usa ma tanganni laho manjolomi poti ai, halani tartolsu lombu ai.

¹⁰Jadi manringis tumang ma Jahowa mangidah si Usa, ibunuh ma ia, halani na nidurdurhonni ai tanganni manjolom poti ai, gabe matei ma ia ijai i lobei ni Naibata. [186]

¹¹Jadi pusok tumang ma uhur ni si Daud halani sonai panontapkon ni Jahowa bani si Usa, gabe igoran ma ianan ai Perez-Uza ronsi sadari on. [187]

¹²Jadi mabiar tumang ma si Daud mangidah Naibata bani na sadari ai, nini ma: Sonaha ma pambahenku mamboan poti ni Naibata das hubangku? [188]

¹³Halani ai seng ilopas si Daud boanon poti ai hu huta ni si Daud, tapi inahkon ma ai hu rumah ni si Obed-Edom, halak Gad ai. [189]

¹⁴Jadi tading i rumah ni si Obed-Edom ma poti ai, tolu bulan dokahni, anjaha ipasu-pasu Jahowa ma rumah ni si Obed-Edom pakon ganup na adong bani. [190]