Read Batak Simalungun 1 KRONIKA 14 Bible Online

1 KRONIKA 14 - Batak Simalungun bible

1 KRONIKA 14

¹Dob ai isuruh si Hiram, raja hun Tirus ma suruhanni marayak si Daud mamboan hayu ares pakon tuhang batu ampa tuhang hayu, laho paulihon sada rumah bani raja ai.

²Jadi iahap si Daud ma, na dob pinajonam ni Jahowa do ia gabe raja i Israel, ai lambin timbulni do harajaonni ai halani bangsani halak Israel.

³Ibuat si Daud ope boru bahen parinangonni i Jerusalem, gabe tubuh ope bani si Daud anak pakon boru. [191]

⁴On do goran-goran ni anak na tubuh bani i Jerusalem: Si Sammua, si Sobab, si Natan, si Salomo, [192]

⁵si Jibhar, si Elisua, si Elipelet,

⁶si Noga, si Nepeg, si Japia,

⁷si Elisama, si Beelyada pakon si Elipelet. [193]

⁸Jadi dob ibogei halak Palistim, na dob iminaki si Daud gabe raja manggomgom ganup Israel, tangkog ma ganup halak Palistim laho mardakdak si Daud. Dob ibogei si Daud barita ai, luar ma ia manjumpahkon sidea. [194]

⁹Marrohan ma halak Palistim, anjaha marsaran ma sidea i pamah Repaim. [195]

¹⁰Dob ai isungkun si Daud ma Naibata, nini ma: Bulih do ahu tangkog mandorab halak Palistim, anjaha ondoskononmu do sidea hu bagas tanganku? Nini Jahowa ma hubani: Tangkog ma ho, ai domma huondoskon sidea hu bagas tanganmu. [196]

¹¹Jadi dob das sidea hu Baal-Perasim, italuhon si Daud ma sidea ijai. Nini si Daud ma: Domma mambur merap munsuhku ibahen Jahowa marhitei tanganku, songon parmerap ni bah na marbanggal. Halani ai do ase igoran ianan ai Baal-Perasim. [197]

¹²Itadingkon sidea ma naibata-naibata ni sidea, gabe iparentahkon si Daud ma, ase ipuruni ai ibagas apuy. [198]

¹³Iulaki halak Palistim ma use roh, anjaha marsaran ma sidea i pamah ai.

¹⁴Dob ai isungkun si Daud ma use Naibata, gabe ibalosi Naibata ma ia: Seng bulih ho tangkog mangayak sidea, tapi dorab ma sidea hun pudi ni sidea, anjaha humbani hayu baka ai ma ho roh mandorab sidea.

¹⁵Anggo ibogei ho ma sora ni na marbaris i punsu ni hayu baka ai, luar ma ho mamorang sidea, ai Naibata do mardalan i lobeimu, laho manaluhon bala ni halak Palistim. [199]

¹⁶Jadi ibahen si Daud ma sonai romban hubani na pinarentahkon ni Naibata bani, gabe ipatunduk ma halak Palistim, singgan ni Gibeon das hu Geser.

¹⁷Jadi sar ma barita ni si Daud hubani haganup nagori, anjaha ipasogop Jahowa ma biar mangidah raja ai hu bagas uhur ni ganup bangsa sipajuh begu-begu. [200]