Read Batak Simalungun 1 KRONIKA 15 Bible Online

1 KRONIKA 15 - Batak Simalungun bible

1 KRONIKA 15

¹Ipauli si Daud ma bani rumah i huta ni si Daud, anjaha ipasirsir ma sada ianan bani poti ni Jahowa, anjaha ipajongjong ma sada lampo-lampo bani poti ai. [201]

²Ijia ma ihatahon si Daud: Seng bulih usungon ni atap ise poti ni Naibata, sobali ni halak Levi; ai domma ipilih Jahowa sidea mangusung poti ni Jahowa, anjaha marugas Bani ronsi sadokah ni dokahni. [202]

³Jadi ipatumpu si Daud ma ganup Israel hu Jerusalem, laho mamboan poti ni Jahowa tangkog bani iananni, na pinasirsir hinan ijai. [203]

⁴Ipatumpu si Daud do homa ginompar ni si Aron pakon halak Levi. [204]

⁵Humbani ginompar ni si Kahat: Si Uriel, kopalani, ampa saninani, saratus dua puluh halak bueini. [205]

⁶Humbani ginompar ni si Merari: Si Asaya, kopalani, ampa saninani dua ratus dua puluh halak bueini. [206]

⁷Humbani ginompar ni si Gersom: Si Joel, kopalani, ampa saninani, saratus tolu puluh halak bueini. [207]

⁸Humbani ginompar ni si Elisapan: Si Semaya, kopalani, ampa saninani, dua ratus halak bueini. [208]

⁹Humbani ginompar ni si Hebron: Si Eliel, kopalani, ampa saninani, ualuh puluh halak bueini. [209]

¹⁰Humbani ginompar ni si Usiel: Si Aminadab, kopalani, ampa saninani, saratus sapuluh dua halak bueini. [210]

¹¹Dob ai idilo si Daud ma malim Sadok pakon si Abyatar ampa halak Levi, ai ma: Si Uriel, si Asaya, si Joel, si Semaya, si Eliel, pakon si Aminadab. [211]

¹²Jadi nini ma dompak sidea: Nasiam do pambobai ni halak Levi mar sasaompung; halani ai papansing nasiam ma diri nasiam pakon sanina nasiam, ase boi iboan nasiam poti ni Jahowa, Naibata ni Israel, tangkog bani iananni na dob hupasirsir ai. [212]

¹³Halani seng dihut nasiam bani na parlobei ondi, parah do pambogbog ni Jahowa Naibatanta in banta, halani seng ipindahi hita Ia songon na patut. [213]

¹⁴Jadi manguras bei ma malim pakon halak Levi, laho mamboan poti ni Jahowa, Naibata ni Israel ai tangkog.

¹⁵Jadi iusung halak Levi ma poti ni Naibata marlanja-lanja bani abarani, songon na tinonahkon ni si Musa hinan, romban hubani hata ni Jahowa. [214]

¹⁶Dob ai ihatahon si Daud ma hubani kopala ni halak Levi, ase ipasirsir sanina ni sidea pandoding marhasoman parsora na laingan, husapi, arbab pakon sordam, ase ipahata ai laho pariahkon sora pakon patanda malas ni uhur. [215]

¹⁷Jadi ipabangkit halak Levi ma si Heman, anak ni si Joel, anjaha humbani saninani si Asap, anak ni si Berekya; humbani ginompar ni si Merari, sanina ni sidea ai, si Etan, anak ni si Kusaya; [216]

¹⁸anjaha hasoman ni sidea use, sanina ni sidea humbani pangku na paduahon: si Sakarya, si Jaasiel, si Semiramot, si Jahiel, si Uni, si Eliab, si Benaya, si Maaseya, si Matitya, si Elipelehu, si Mikneya, si Obed-Edom ampa si Jegiel, sijaga horbangan ai.

¹⁹Sipandoding: Si Heman, si Asap pakon si Etan, pahatahon ogung tombaga. [217]

²⁰Si Sakarya, si Asiel, si Semiramot, si Jehiel, si Uni, si Eliab, si Maaseya pakon si Benaya mangguit husapi, parsora na gijang.

²¹Si Matitya, si Elipelehu, si Mikneya, si Obed-Edom, si Jehiel pakon si Asasya manggesek arbab, parsora na bongor, laho mambobahon doding.

²²Si Henanya, kopala ni halak Levi, ia do kopala ni sipangusung ai; ia do na mangatur pangusungon ai, ai na pandei do ia pasal ai.

²³Si Berekya pakon si Elkana, sijaga horbangan ai, i lambung ni poti ai.

²⁴Si Sebanya, si Josafat, si Netaneel, si Amasai, si Sakarya, si Benaya pakon si Elieser, malim-malim ai, sidea do sisompul tarompet i lobei ni poti ni Naibata; si Obed-Edom pakon si Jehia pe, sijaga horbangan ai, dihut do i lambung ni poti ai. [218]

²⁵Dob ai laho ma si Daud pakon pangintuai ni halak Israel ampa kopala ni si saribu halak, sihol mamboan poti parpadanan ni Jahowa tangkog hun rumah ni si Obed-Edom ibagas malas ni uhur banggal.

²⁶Halani itumpak Naibata do halak Levi siusung poti parpadanan ni Jahowa ai, igalangkon sidea ma pitu lombu jonggi na poso pakon pitu biri-biri banggal. [219]

²⁷Marpakeian mantel na humbani hiou silopak do si Daud, sonai homa ganup halak Levi siusung poti ai ampa sipandoding, sonai homa si Hananya kopala ni parusung ai; ambah ni ai marbaju Epod, na humbani hiou silopak do si Daud. [220]

²⁸Ase ganup do halak Israel mamboan poti parpadanan ni Jahowa ai tangkog, marhasoman olob-olob pakon sora ni tanduk, tarompet ampa arbab, anjaha gogoh ibahen marhata husapi pakon ogung. [221]

²⁹Anjaha sanggah na das ai poti ni Jahowa hu huta ni si Daud, manungkir ma si Mikal, boru ni si Saul hun jandela, jadi iidah ma raja Daud manontori anjaha marinjaki, gabe pis ma matani mangidahsi.