Read Batak Simalungun 1 KRONIKA 16 Bible Online

1 KRONIKA 16 - Batak Simalungun bible

1 KRONIKA 16

¹Jadi dob masuk iboan sidea poti ni Naibata, ipajongjong ma ai i tongah-tongah ni lampolampo, na dob pinajongjong ni si Daud ai. Dob ai igalangkon sidea ma galangan situtungon pakon galangan pardameian i lobei ni Jahowa. [222]

²Dob salpu igalangkon si Daud galangan situtungon pakon galangan pardameian ai, ipasu-pasu raja ai ma bangsa ai marhitei goran ni Jahowa, [223]

³anjaha ibere ma bani ganup halak Israel, dalahi pakon naboru, sada bei ruti, santoktok gulei pakon sada kuei na maragu manisan. [224]

⁴Ambahni ai ipabangkit raja ai ma siparugas i lobei ni poti ni Jahowa humbani deba halak Levi, laho mamuji-muji, mangkatahon tarima kasih ampa pasangapkon Jahowa, Naibata ni Israel. [225]

⁵Si Asap do kopala, si Sakarya na paduahon, dob ai si Jegiel, si Semiramot, si Jehiel, si Matitya, si Eliab, si Benaya, si Obed-Edom pakon si Jegiel, ai ma sijolom parugas na laingan, husapi pakon arbab; si Asap do sipahata ogung; [226]

⁶anjaha Malim Benaya ampa Jahasiel do sisompul tarompet tongtong i lobei ni poti parpadanan ni Naibata.

⁷Bani ari ai do parlobei sahali iparentahkon si Daud si Asap ampa saninani, mandodingkon doding puji-pujian bani Jahowa.

⁸Puji nasiam ma Jahowa, dilo ma goran-Ni, pabotohkon nasiam ma pambahenan-Ni i tongah-tongah ni sagala bangsa!

⁹Dodingkon ma Ia, dodingkon ma puji-pujian, patugah ma ganup horja halongangan-Ni ai!

¹⁰Pasangap ma goran-Ni na mapansing in, sai marmalas ni uhur ma sagala sipindahi Jahowa!

¹¹Pindahi nasiam ma Jahowa pakon hagogohan-Ni, tongtong ma pindahi nasiam bohi-Ni!

¹²Paingat-ingat nasiam ma halongangan na binahen-Ni ai, tanda halongangan-Ni pakon uhum na luar hun pamangan-Ni,

¹³nasiam ginompar ni Israel, jabolon-Ni, nasiam anak ni si Jakob, na pinilih-Ni!

¹⁴Ia Jahowa, Ia do Naibatanta, sab do uhum-Ni i dunia on.

¹⁵Sai idingat do tongtong padan-Ni ai, hata, na hinatahon-Ni bani marribu-ribu sundut,

¹⁶padan na binahen-Ni hubani si Abraham, pakon bulawan na binulawankon-Ni hubani si Isak.

¹⁷Ipajongjong do ai bani si Jakob gabe uhum, bani Israel gabe padan sisadokah ni dokahni.

¹⁸Nini do, “Hubam do berehonon-Ku tanoh Kanaan, gabe tanoh parbagianan bam.”

¹⁹Sanggah otik ope bilangan ni sidea, hulanan na etek-etek anjaha manginsolat ijai,

²⁰minsah-insah hun bangsa hu bangsa, humbani sada harajaon hu harajaon na legan,

²¹seng ilopas age sahalak mangarsik sidea, ipapai do raja tene marhalanihon ni sidea. [227]

²²“Ulang kahua hanima halak na mininakan-Ku, anjaha ulang bahen na masambor bani nabing-Ku!”

²³Dodingkon ma Jahowa, nasiam ganup tanoh, ambilankon ma haluahon-Ni ganup ari!

²⁴Baritahon ma hamuliaon-Ni ai i tongah-tongah ni halak sipajuh begu-begu, anjaha halongangan-Ni ai i tongah-tongah ni sagala bangsa.

²⁵Ai banggal do Jahowa, talup tumang pujion, Ia do sihabiaran, na mangatasi sagala naibata na legan.

²⁶Ai gana-gana do naibata ni sagala bangsa sipajuh begu-begu; tapi Jahowa do na manjadihon langit.

²⁷Hajombuton pakon hamuliaon do i lobei-Ni; hagogohon pakon malas ni uhur bani ianan-Ni.

²⁸Bere ma bani Jahowa, nasiam marga humbani sagala bangsa, bere nasiam ma bani Jahowa hamuliaon pakon hagogohon! [228]

²⁹Bere ma bani Jahowa hamuliaon ni goran-Ni, boan ma galangan, anjaha roh ma nasiam hu lobei-Ni! Sombah ma Jahowa marpakeian na mapansing!

³⁰Hitir ma i lobei-Ni, ganup tanoh on! Jonam ma tongon dunia on, seng anjai dugur.

³¹Marmalas ni uhur ma langit, anjaha marolob-olob tanoh on; patugah ma i tongah-tongah ni halak sipajuh begu-begu: Jahowa do Raja! [229]

³²Marhasak ma laut pakon ganup isini, marolob-olob ma ladang pakon ganup na ibagas ai.

³³Jadi marolob-olob ma hayu na i harangan i lobei ni Jahowa, ai roh do Ia manguhum tanoh on.

³⁴Puji nasiam ma Jahowa, ai layak do Ia; ronsi sadokah ni dokahni do idop ni uhur-Ni. [230]

³⁵Anjaha hatahon ma, “Urupi hanami, Ham Naibata Siurupi hanami, patumpu anjaha paluah ma hanami humbani bangsa sipajuh begu-begu, ase ipuji hanami goran-Mu na mapansing in, anjaha marmegah-megah hanami, ibagas pamujinami Bamu.

³⁶Pinuji ma Jahowa, Naibata ni Israel, humbani sadokah ni dokahni ronsi sadokah ni dokahni! Anjaha ganup ma bangsa mangakatahon: Amen. Puji-pujian ma bani Jahowa.” [231]

³⁷Jadi itotapkon si Daud ma si Asap pakon saninani ai ijai, i lobei ni poti parpadanan ni Jahowa, laho marugas tongtong i lobei ni poti ai, na patut sihoseionkon ari-ari; [232]

³⁸sonai homa si Obed-Edom pakon saninani onom puluh ualuh halak bueini. Ia si Obed-Edom, anak ni si Jedutun pakon si Hosa, rap sijaga horbangan do. [233]

³⁹Anjaha itotapkon ma Malim Sadok rap pakon saninani, malim-malim ai, i lobei ni Rumah ni Jahowa, na i dolog-dolog ai, i Gibeon, [234]

⁴⁰laho manggalangkon galangan situtungon hubani Jahowa, bani anjap-anjap ni galangan situtungon ai, siap sogod pakon bodari, romban hubani na tarsurat bani titah ni Jahowa, na pinarentahkon-Ni hubani Israel. [235]

⁴¹Hasoman ni sidea si Heman pakon si Jedutun, pakon na tading humbani na pinilih-Ni ai, na torang tarsurat goranni, laho padaskon puji-pujian bani Jahowa, ai totap do ronsi sadokah ni dokahni idop ni uhur-Ni ai. [236]

⁴²Adong do homa tarompet pakon husapi bani sidea bahen parangguan ni musik ampa parugas na laingan, laho mandodingkon doding, bahen hasangapon bani Jahowa. Ia anak ni si Jedutun, sijaga horbangan do. [237]

⁴³Dob ai mulak ma ganup halak na mabuei ai hu rumahni bei, anjaha si Daud pe mulak ma, laho mamasu-masu parrumahni. [238]