Read Batak Simalungun 1 KRONIKA 17 Bible Online

1 KRONIKA 17 - Batak Simalungun bible

1 KRONIKA 17

¹Sanggah hundul-hundul sahali si Daud ibagas rumahni, nini si Daud ma dompak nabi Natan, “Tonggor ma, marianan do ahu ibagas rumah na humbani hayu ares, tapi anggo poti parpadanan ni Jahowa i toruh ni lampolampo do.” [239]

²Nini si Natan ma dompak si Daud, “Pasaud ham ma sagala na ibagas uhurmu ai, hasomanan ni Naibata do ham!”

³Tapi bornginni ai roh ma hata ni Naibata hubani si Natan,

⁴“Laho ma ho, hatahon ma hubani juakjuak-Ku si Daud: Sonon do hata ni Jahowa: Seng bulih ho pajongjong Bangku sada rumah bahen ianan-Ku. [240]

⁵Ai seng ongga ope Ahu marianan ibagas rumah singgan ni ari dob Huarahkon tangkog halak Israel ronsi sadari on, sai minsah-insah do Ahu tong humbani lampolampo na sada hubani lampolampo na sada nari, humbani ianan na sada hubani ianan na sada nari. [241]

⁶Barang ija pe Ahu minsah-insah rap pakon ganup halak Israel, mintor ongga ma Huhatahon age sangkababah hata hubani atap ise humbani panguhum ni Israel, na Huhatahon marmahan bangsang-Ku: Mase ma lang ipauli hanima Bangku sada rumah humbani hayu ares? [242]

⁷On pe hatahon ma hubani juakjuak-Ku si Daud: Sonon do hata ni Jahowa Zebaot: Ahu do na mangarahkon ho, hun parmahanan, humbani na mangirik-irik biribiri, ase ho gabe kopala manggomgom bangsang-Ku halak Israel. [243]

⁸Ahu do mangkasomani ho barang huja pe ho manlangkah, anjaha domma Husiapkon ganup munsuhmu i lobeimu; anjaha bahenon-Ku do goranmu tarambilan, songon goran ni sada halak na sangap i tanoh on. [244]

⁹Ambahni ai, tontuhonon-Ku ma sada ianan bani bangsang-Ku halak Israel, anjaha suanhonon-Ku ma sidea ijai, ase marsonang-sonang sidea ijai marianan, seng marhabiaran be, anjaha seng be sunsahan ni halak parjahat songon na dob salpu in. [245]

¹⁰Singgan ni ari dob Hupabangkit panguhum manggomgomi bangsang-Ku halak Israel, anjaha patundukon-Ku do sagala munsuhmu. Tapi, pabanggalon-Ku do anggo ho, anjaha pajonamon-Ku do ginomparmu. [246]

¹¹Tapi dob gok ari-arimu laho martumpu hubani ompungmu, pajongjongon-Ku ma ginomparmu i pudimu, sada humbani anakmu, pajonamon-Ku ma harajaonni. [247]

¹² Ia do na paulihon sada rumah Bangku, anjaha pajonamon-Ku do paratasni ronsi sadokah ni dokahni. [248]

¹³Ahu do gabe Bapa bani, anjaha ia gabe anak-Ku, seng osoron-Ku humbani idop ni uhur-Hu, songon na dob Huosor ai humbani halak na i lobeimu. [249]

¹⁴Maningon totap do ia bahenon-Ku ibagas rumah-Ku pakon ibagas harajaon-Ku ronsi sadokah ni dokahni; paratasni pe totap do ronsi sadokah ni dokahni.” [250]

¹⁵Romban hubani hata ai, anjaha romban hubani haganup pangungkabon ai do si Natan marsahap hubani si Daud.

¹⁶Dob ai masuk ma si Daud hundul hu lobei ni Jahowa, jadi nini ma, “Ise ma ahu, Ham Jahowa Naibatangku, anjaha ise ma ginomparhu, ase sonai pambobai-Mu bangku? [251]

¹⁷Maotiktu ope on nini uhur-Mu, Ham Naibata; ibere Ham ope bagah-bagah hubani ginompar ni juakjuak-Mu hubani panorang na sihol roh, anjaha ipatuduhkon Ham do bangku sundut na sihol roh, Ham Jahowa Naibata. [252]

¹⁸Aha ope sihatahonon ni si Daud Bamu marhalanihon ni parpasangap-Mu ai bani juakjuakmu? Itanda ham do tene juakjuak-Mu. [253]

¹⁹Ham Jahowa, halani juakjuak-Mu anjaha romban hubani rosuh ni uhur-Mu do ibahen Ham ganup habanggalon on, ibahen na ipabotohkon Ham ai hubani juakjuak-Mu. [254]

²⁰Ham Jahowa, seng adong na songon Ham, anjaha seng adong Naibata sobali Ham romban hubani haganup na binogeinami marhitei pinggolnami. [255]

²¹Anjaha ija ma adong sada bangsa na legan i tanoh on songon bangsa-Mu halak Israel, na pala Naibata sandiri bingkat martobussi bahen bangsa-Ni, laho mambahen tarambilan goran-Mu marhitei halongangan banggal anjaha na majangin, marhitei na mangusir bangsa sipajuh begu-begu hun lobei ni bangsa-Mu, na tinobus-Mu hun tanoh Masir. [256]

²²Anjaha domma itotapkon Ham bangsa-Mu halak Israel gabe bangsa-Mu ronsi sadokah ni dokahni, anjaha Ham, Jahowa, gabe Naibata ni sidea. [257]

²³Ai pe Ham Jahowa, sai patotap Ham ma hata na dob pinarbagah-bagah-Mu ai pasal juakjuak-Mu pakon pasal ginomparni ronsi sadokah ni dokahni, anjaha bahen Ham ma romban hubani na dob pinarbagah-bagah-Mu ai.

²⁴Nai ma, saud ma ai, anjaha sai timbul ma goran-Mu ronsi sadokah ni dokahni, ase ihatahon halak: Jahowa Zebaot, Naibata ni Israel, Ia do Naibata bani Israel, anjaha totap do ginompar ni juakjuak-Mu si Daud i lobei-Mu.

²⁵Ai domma ipatalar Ham, Naibatangku, hubani pinggol ni juakjuak-Mu on, paboa pajongjongon-Mu do ginompar bani. Halani ai do ase pag juakjuak-Mu on martonggo i lobei-Mu. [258]

²⁶Ai pe Ham Jahowa, Ham do Naibata anjaha domma ibagahkon Ham bani juakjuak-Mu na madear on. [259]

²⁷Halani ai sai pasu-pasu Ham ma ginompar ni juakjuak-Mu, ase totap ia i lobei-Mu ronsi sadokah ni dokahni; ai barang ise na pinasu-pasu-Mu, Ham Jahowa, ai do na dapotan pasu-pasu ronsi sadokah ni dokahni. [260]