Read Batak Simalungun 1 KRONIKA 19 Bible Online

1 KRONIKA 19 - Batak Simalungun bible

1 KRONIKA 19

¹Dob salpu ai, matei ma si Nahas, raja ni halak Ammon, jadi anakni ma manrajai gantihni. (1 Sam. 11)

²Jadi nini si Daud ma, “Sihol do patuduhonku dear ni paruhuronku hubani si Hanun, anak ni si Nahas, ai bapani ai pe dear do paruhuronni bangku.” Jadi isuruh si Daud ma suruhanni laho mangapohisi, halani panading ni bapani ai. Dob das juakjuak ni si Daud ai hubani si Hanun, hu nagori ni halak Ammon, laho mangapohisi, [276]

³nini kopala-kopala ni halak Ammon ma dompak si Hanun, “Laho pasangaphon bapamu ma gakni, nini uhurmu si Daud, ase isuruh sipangapoh bamu? Ai lang sihol mamareksa, mangagou anjaha mangkahapi tanoh on do ase isuruh juakjuakni ai marayak ham?” [277]

⁴Jadi itangkap si Hanun ma juakjuak ni si Daud, anjaha isuruh ma na manuhur sidea pakon na mangkorot hiou ni sidea das hubani hundulanni, gabe sonai ma sidea ipalaho. [278]

⁵Jadi adong ma na laho patugahkon hubani si Daud pasal halak ai, gabe isuruh ma halak na manjumpahkon sidea, ai bador tumang do halak ai ibahen. Nini raja ai ma, “Tading ma nasiam i Jeriko, paima ganjang gumis nasiam, dob ai pe ase mulak nasiam.”

⁶Dob iidah halak Ammon, na dob sogam uhur ni si Daud mangidah sidea ibahen sidea, gabe itongos si Hanun ampa halak Ammon ma saribu talenta pirak, laho mangupahi gareta porang pakon bala siparhuda hun Mesopotamia, hun Aram-Maakah pakon hun Soba. [279]

⁷Iupahi sidea ma tolu puluh dua ribu gareta porang ampa raja hun Maakah rap pakon balani. Jadi roh ma sidea anjaha marsaran ma i lobei ni Medeba. Marodor ma homa halak Ammon hun hutani bei laho hu parporangan. [280]

⁸Dob ibogei si Daud ai, isuruh ma si Joab pakon ganup bala na borani-borani ai.

⁹Jadi luar ma halak Ammon, anjaha marsihap ma sidea laho marporang i lobei ni horbangan ni huta ai, pulig do jongjong i ladang raja-raja na roh ai.

¹⁰Jadi dob iidah si Joab, sai ia do idorab munsuh ai hun lobei pakon hun pudi, gabe ipilih ma humbani garama pilihan na i Israel, anjaha ipaodor ma sidea manjumpahkon halak Aram. [281]

¹¹Balani na tading ai iondoskon ma ai hubani si Abisai, anggini ai, anjaha ipaodor ma sidea mandompakkon halak Ammon. [282]

¹²Nini ma, “Anggo gogohan halak Aram ai humbangku, roh ma ho mangurupi ahu, tapi anggo gogohan halak Ammon ai humbam, roh pe ahu mangurupi ho.

¹³Tenger ma uhurmu, anjaha asamkon hita ma hosahta mangkopkop bangsanta pakon mangkopkop huta ni Naibatanta; anjaha sai ibahen Jahowa ma rosuh ni uhur-Ni.” [283]

¹⁴Jadi idohori si Joab pakon bala na rapkonsi ai ma halak Aram laho mamorang sidea, gabe maporus ma sidea hun lobeini.

¹⁵Jadi dob iidah halak Ammon, na dob maporus do hape halak Aram, maporus ma pakon sidea hun lobei ni si Abisai, anggi ni si Joab ai, anjaha surut ma sidea hubagas huta ai; dob ai mulak ma si Joab hu Jerusalem.

¹⁶Jadi dob iidah halak Aram, na dob talu sidea ibahen halak Israel, isuruh sidea ma suruhanni marharah hubani halak Aram, na i dipar ni Bah Eprat, anjaha si Sofah, pambobai ni bala ni si Hadareser do mambobahon sidea. [284]

¹⁷Jadi dob dong na patugahkon ai hubani si Daud, ipatumpu ma ganup halak Israel, anjaha idipari ma Bah Jordan ai; dohorhonsi ia hubani sidea, ipaodor ma balani dompak sidea. Jadi dob ipatitir si Daud balani ai mandorab halak Aram, marsidoraban ma sidea.

¹⁸Tapi maporus ma halak Aram i lobei ni Israel; ibunuh si Daud ma humbani halak Aram pitu ribu halak bala pargareta pakon ompat puluh ribu halak bala na mardalan nahei; ibunuh do homa si Sofah pambobai ni bala ni sidea ai.

¹⁹Jadi dob iidah juakjuak ni si Hadareser, na dob talu sidea ibahen halak Israel, mardamei ma sidea pakon si Daud anjaha unduk sidea bani. Dob ai seng ra be halak Aram mangurupi halak Ammon.