Read Batak Simalungun 1 KRONIKA 20 Bible Online

1 KRONIKA 20 - Batak Simalungun bible

1 KRONIKA 20

¹Dob salpu satahun, sanggah panorang ni raja-raja bingkat marmunsuh, ibobahon si Joab ma bala ai, anjaha isiapkon ma tanoh ni halak Ammon; dob ai roh ma ia mangkubu huta Rabba, tapi tading i Jerusalem do anggo si Daud. Jadi italuhon si Joab ma huta ai anjaha iboiskon.

²Ibuat si Daud ma sortali ni raja ai humbani uluni; satalenta omas do boratni, anjaha adong do sada mata intan ijai; inahkon ma ai bani ulu ni si Daud, anjaha buei tumang do taban-taban iboan hun huta ai.

³Anjaha halak pangisi ni huta ai, iboan do, anjaha ibahen ma horjani sidea manjolom gargaji, gaer-gaer bosi pakon hapak; anjaha sonai do homa ibahen si Daud hubani ganup huta ni halak Ammon. Dob ai mulak ma si Daud rap pakon ganup bala ai hu Jerusalem.

⁴Dob salpu ai tubuh ma use parporangan i Geser dompak halak Palistim; ibunuh si Sibekkai, halak Husati ai do ijia si Sipai, ai ma sada humbani raksasa ai, gabe tunduk ma halak Palistim ai. [285]

⁵Dob ai tubuh ma use parporangan dompak halak Palistim, gabe ibunuh si Elhanan, anak ni si Jair ma si Lakmi, sanina ni si Goliat, halak Gat ai; ia suhul ni tanjani ansa basikah do. [286]

⁶Tubuh use ma parporangan i Gat; adong do ijai sada raksasa, onom bei do jari-jari ni tanganni pakon naheini, gabe dua puluh ompat ma ganup; ia pe ginompar ni raksasa do.

⁷Jadi sanggah na iapasini ai halak Israel, gabe ibunuh si Jonatan, anak ni si Simea, abang ni si Daud ma ia. [287]

⁸Ganupan sidea ai ginompar ni raksasa do i Gat; jadi matei ma sidea ibunuh si Daud pakon juakjuakni ai.