Read Batak Simalungun 1 KRONIKA 21 Bible Online

1 KRONIKA 21 - Batak Simalungun bible

1 KRONIKA 21

¹Dob ai jongjong ma sibolis mangimbang Israel, gabe iojur-ojur ma si Daud mamilangi halak Israel. [288]

²Jadi nini si Daud ma dompak si Joab pakon dompak kopala-kopala ni bala, “Laho ma nasiam, bilangi nasiam ma halak Israel, singgan ni Berseba das hu Dan, anjaha boan nasiam ma bangku bilangan ni sidea ai.” [289]

³Tapi nini si Joab ma, “Sai itambahi Jahowa ma bangsani saratus lompit nari humbani sisonari! Tapi tene, ham tuannami anjaha rajanami, ai lang ganup do sidea juakjuak ni tuannami? Mase ma isurahon tuannami sonai? Mase ma bahenon marsalah halak Israel?” [290]

⁴Tapi parhata sada do raja ai dompak si Joab. Jadi bingkat ma si Joab manlioti ganup Israel, dob ai mulak ma ia hu Jerusalem.

⁵Ibere si Joab ma bilangan ni bangsa na binilanganni ai hubani si Daud. Ia buei ni ganup halak Israel sisintak podang sajuta saratus ribu halak do; buei ni halak Juda sisintak podang ompat ratus pitu puluh ribu halak do. [291]

⁶Tapi anggo halak Levi pakon Benjamin seng dihut ibilangi, ai magigi do si Joab bani parentah ni raja ai. [292]

⁷Sogam do homa uhur ni Naibata pasal pahara ai, gabe hona papa-Ni do Israel. [293]

⁸Jadi nini si Daud ma dompak Naibata, “Banggal tumang do dousangku, halani hubahen na sonai. Tapi sai marpangulaki ma uhur-Mu mangidah hasalahan ni juakjuak-Mu on, ai haotoon banggal do na hubahen ai.” [294]

⁹Dob ai nini Jahowa ma dompak si Gad, nabi ni si Daud ai, [295]

¹⁰“Laho ma ho, anjaha hatahon ma hubani si Daud: Sonon do hata ni Jahowa; tolu pahara Hutuduhkon bam, pilih ma sada hunjai, sibahenon-Ku bam.”

¹¹Jadi dob das si Gad hubani si Daud, nini ma, “Sonon do hata ni Jahowa. Pilih ma na ija bam:

¹²barang tolu tahun lohei, barang tolu bulan ho pardakdakon ni munsuhmu anjaha panganon ni podang ni munsuhmu ho, barang tolu ari podang ni Jahowa, ai ma masa sampar i nagori on, anjaha malekat ni Jahowa mangagou i sab tanoh ni Israel. Halani ai putuskon ma, atap aha balos siboanonku hubani na marsuruh ahu.” [296]

¹³Dob ai nini si Daud ma dompak si Gad, “Sunsah tumang do uhurhu, tapi dearan ma ahu madabuh hubagas tangan ni Jahowa, ai banggal tumang do idop ni uhur-Ni, seng ra ahu madabuh hu tangan ni jolma.” [297]

¹⁴Jadi ipamasa Jahowa ma sampar i tongah-tongah ni Israel, gabe rasei ma pitu puluh ribu halak humbani halak Israel.

¹⁵Dob ai isuruh Naibata ma malekat-Ni hu Jerusalem, laho mangagou ijai; tapi sanggah na laho mangagou ai Ia, mangahap ma Ia, gabe isolsoli ma diri-Ni anjaha nini ma dompak malekat sipangaggou ai, “Sungkup ma! Pasurut ma tanganmu!” Tapi jongjong do malekat ni Jahowa ai i lambung pardogeian ni si Ornan, halak Jebusi ai. [298]

¹⁶Dob ai mangkawah ma si Daud, gabe iidah ma malekat ni Jahowa jongjong i tongah-tongah ni langit pakon tanoh on, pajolom-jolom podang na sinintak ibagas tanganni dompak Jerusalem. Jadi manrogop ma si Daud rap pakon pangintuaini ai, marbaju guni bei do sidea. [299]

¹⁷Jadi nini si Daud ma dompak Naibata, “Ai lang ahu do mangkatahon bilangon bangsa on? Ahu do na mardousa, anjaha ahu do sidalankon hajahaton in. Ai aha ma adong, na binahen ni biribiri in? Ham, Jahowa Naibatangku, hu bangku pakon hubani ginompar ni bapa ma mangonai tangan-Mu, tapi ulang ma hubani bangsa-Mu.” [300]

¹⁸Dob ai iparentahkon malekat ni Jahowa ma si Gad mangkatahon hubani si Daud, ase tangkog ia laho pajongjongkon bani Jahowa sada anjapanjap bani pardogeian ni si Ornan, halak Jebusi ai. [301]

¹⁹Jadi tangkog ma si Daud romban hubani hata ni si Gad, na dob ipatugahsi marhitei goran ni Jahowa.

²⁰Sanggah marhusor si Ornan, ididah ma malekat ai, gabe marponop ma ia rap pakon anakni na ompat ai, ai tudu sanggah mardogei gandum do si Ornan.

²¹Sanggah na roh si Daud hubani si Ornan, manatap-natap do si Ornan, gabe iidah ma si Daud; laho ma ia hun pardogeian ai anjaha manrogop ma ia hubani si Daud.

²²Dob ai nini si Daud ma dompak si Ornan, “Mahua bere ma hu bangku pardogeianmu ai, ase hupajongjong ijai anjapanjap bani Jahowa. Sadiha gakni arga na sapatutni ase laho sampar in humbani bangsa in.” [302]

²³Tapi nini si Ornan ma dompak si Daud, “Buat ham ma in, anjaha ibahen tuannami anjaha rajanami ma barang aha rosuh ni uhurni. Tonggor ma, hubere pe lombu in bahen galangan situtungon pakon gareta pardogei in bahen sobanni ampa gandum in bahen galangan sipanganon; ganupan ai hubere pe.”

²⁴Tapi nini Raja Daud ma dompak si Ornan, “Lang sonai, maningon bolion do songon arga na patut; ai seng ra ahu mambuat na adong bam bani Jahowa, barang manggalangkon galangan situtungon na so pala marboli.” [303]

²⁵Dob ai ibere si Daud ma hubani si Ornan boli ni partapakan ai onom ratus sekel omas.

²⁶Dob ai ipajongjong si Daud ma ijai sada anjapanjap bani Jahowa, anjaha igalangkon ma galangan situtungon pakon galangan hatarimakasihon, anjaha dilo-dilo ma ia bani Jahowa, gabe ibalosi Jahowa ma ia marhitei apuy, na pinaroh-Ni hun langit hu atas ni anjapanjap panggalangan ni galangan situtungon ai. [304]

²⁷Dob ai ihatahon Jahowa ma hubani malekat ai, ase ipasuang podangni hubagas sarungni.

²⁸Jadi dob iidah si Daud ijia, na dob binalosan ni Jahowa ia i pardogeian ni si Ornan, halak Jebusi ai, gabe ijai ma ia tongtong manggalang. [305]

²⁹Ia lampolampo ni Jahowa, na pinauli ni si Musa na ijia i halimisan, ampa anjapanjap panggalangan ni galangan situtungon, i dolog na i Gibeon do ijia jongjong. [306]

³⁰Tapi seng tarbahen si Daud laho hujai, laho mangindahi Naibata, halani biar ni uhurni bani podang ni malekat ni Jahowa. [307]