Read Batak Simalungun 1 KRONIKA 23 Bible Online

1 KRONIKA 23 - Batak Simalungun bible

1 KRONIKA 23

¹Jadi dob matua si Daud anjaha sobalan uhurni bani hagoluhan on, ipabangkit ma anakni, si Salomo, manggomgomi Israel. [325]

²Ipatumpu si Daud ma ganup kopala ni Israel, malim pakon halak Levi.

³Ibilangi ma halak Levi singgan ni na marumur tolu puluh tahun pakon i atasni ai, tumpu tolu puluh ualuh ribu halak bueini. [326]

⁴Dua puluh ompat ribu halak hunjai mandalankon horja i rumah ni Jahowa, onom ribu gamot-gamot ampa panguhum. [327]

⁵ompat ribu halak sijaga horbangan, anjaha ompat ribu halak use pandoding, sibere puji-pujian hubani Jahowa, marhasoman parugas na dob pinauli laho mamuji-muji.

⁶Anjaha iranggi si Daud do sidea marhorin-horin mangihutkon anak ni si Levi, ai ma si Gersom, si Kahat pakon si Merari. [328]

⁷Na masuk hubani si Gersom: Si Laedan pakon si Simei.

⁸Anak ni si Laedan: Si Jehiel, kopala ai, si Setam pakon si Joel, tolu halak. [329]

⁹Anak ni si Simei: Si Selomit, si Hasiel, pakon si Haran, tolu halak. Ai ma kopala humbani si Laedan mar sasaompung.

¹⁰Anjaha anak ni si Simei: si Jahat, si Sisa, si Jeus pakon si Beria; halak ai ma anak ni si Simei, ompat halak.

¹¹Si Jahat do kopala, si Sisa paduahon; tapi si Jeus pakon si Beria seng buei anakni, halani ai gabe sisada ompung anjaha sisada horin do sidea.

¹²Anak ni si Kahat: Si Amram, si Jisehar, si Hebron pakon si Usiel, ompat halak. [330]

¹³Anak ni si Amram: Si Aron pakon si Musa. Ipapulig hinan do anggo si Aron, laho marugas ibagas na pansing sahalian, ase ia pakon anakni ma tongtong na manutung dahupa i lobei ni Jahowa, marugas bani Jahowa, anjaha mamasu-masu ibagas goran-Ni sadokah ni dokahni. [331]

¹⁴Ia anak ni si Musa, halak ni Naibata ai, ietong do sidea hubani marga Levi. [332]

¹⁵Anak ni si Musa: Si Gersom pakon si Elieser. [333]

¹⁶Anak ni si Gersom: Si Subael, kopala. [334]

¹⁷Anak ni si Elieser: Si Rehabya, kopala; seng dong anak ni si Elieser na legan, tapi buei tumang do anak ni si Rehabya. [335]

¹⁸Anak ni si Jisehar: Si Selomit, kopala.

¹⁹Anak ni si Hebron: Si Jeria, kopala, si Amarya paidua, si Usiel paitolu pakon si Jakmeam paiompat.

²⁰Anak ni si Usiel: Si Mika, kopala, anjaha si Jisia paidua.

²¹Anak ni si Merari: Si Mahli pakon si Musi; anak ni si Mahli: Si Eleasar pakon si Kis. [336]

²²Sanggah matei si Eleasar, seng dong anak itadingkon, pitah boru do, anjaha anak ni si Kis, botou ni sidea do na mambuat sidea. [337]

²³Anak ni si Musi: Si Mahli, si Eder pakon si Jeremot, tolu halak.

²⁴Ai ma ginompar ni si Levi mar sasaompung, kopala ni mar sasaompung ai, songon na tarsurat mangihutkon bilangan ni goran ni na marumur dua puluh tahun pakon i atasni, na mandalankon horja parugason i Rumah ni Jahowa. [338]

²⁵Nini si Daud do, “Ai domma ibere Jahowa, Naibata ni Israel damei bani bangsa-Ni, anjaha marianan Ia i Jerusalem ronsi sadokah ni dokahni. [339]

²⁶Halani ai seng pala be pausung-usungon ni halak Levi lampolampo ai pakon sagala parugasni. [340]

²⁷Ai mangihutkon parentah ni si Daud na parpudi, ia sibilangan humbani halak Levi, ai ma singgan na marumur dua puluh tahun pakon i atasni ai. [341]

²⁸Horjani, ai ma mangurupi ginompar ni si Aron mandalankon horja i Rumah ni Jahowa, manjagai alamanni kamar-kamar, pangurasion ni haganup parugas na mapansing pakon sagala horja parugason ibagas Rumah ni Naibata. [342]

²⁹Ambahni ai mangkoseihon ruti sigalangkonon, nitak na lumat bahen galangan sipanganon, ruti na so niigaran, galangan sigorengon, galangan na maragu minak, sonai homa sagala sitimbangon pakon sisuhaton. [343]

³⁰Anjaha maningon jongjong do sidea ganup sogod, mangkatahon tarima kasih pakon mamuji Jahowa, sonai homa bodari. [344]

³¹Ambahni ai sanggah manggalangkon galangan situtungon hubani Jahowa, bani ari Sabat, bani poltak ni bulan pakon bani ari raya, na dob binuhul hinan bueini, mangihutkon hasomalan ni sidea tongtong i lobei ni Jahowa. [345]

³²Maningon dalankonon ni sidea do horja bani lampolampo partumpuan pakon horja bani ianan na mapansing ai, anjaha maningon hasomanan ni sidea do anak ni si Aron, hasoman samorga ni sidea ai, marugas i Rumah ni Jahowa.” [346]