Read Batak Simalungun 2 KRONIKA 1 Bible Online

2 KRONIKA 1 - Batak Simalungun bible

2 KRONIKA 1

¹Dob ai lambin totap ma si Salomo, anak ni si Daud, ibagas harajaon ai, ai Jahowa Naibatani do mangkasomanisi ampa na mambahensi timbul tumang. [1]

²Marsahap ma si Salomo hubani ganup Israel, hubani kopala ni sisaribu pakon sisaratus halak, hubani panguhum pakon hubani pambobai bani sab tanoh Israel, kopala ni mar sasaompung. [2]

³Dob ai laho ma si Salomo ampa ganup tumpuan, na rap pakonsi ai, hu buntu-buntu na i Gibeon, ai ijai do lampolampo partumpuan ni Naibata, na pinauli ni si Musa, juakjuak ni Naibata i halimisan. [3]

⁴Tapi anggo poti parpadanan ni Naibata, domma iboan si Daud tangkog hun Kiryat-Jearim, hubani ianan na dob pinasirsir ni si Daud hujai, ai domma ipajongjong sada lampolampo bahen iananni i Jerusalem. [4]

⁵Sonai homa anjapanjap tombaga na pinauli ni si Bezalel, anak ni si Uri, anak ni si Hur, ijai do i lobei ni lampolampo ni Jahowa. Isungkun si Salomo ampa tumpuan ai ma Jahowa. [5]

⁶Jadi manggalang ma si Salomo ijai i lobei ni Jahowa i atas ni anjapanjap tombaga na i lobei ni lampolampo partumpuan ai; igalangkon ma i atasni saribu galangan situtungon. [6]

⁷Bornginni ai talar ma Naibata bani si Salomo, anjaha nini ma dompaksi,“Pangindo ma barang aha sibereon-Ku bam.”

⁸Nini si Salomo ma dompak Naibata, “Domma ibahen Ham idop ni uhur banggal hubani bapa, si Daud, anjaha domma ipabangkit Ham ahu gabe raja gantihni.

⁹On pe, Ham Naibata Jahowa, sai pasaud Ham ma bagah-bagah-Mu na bani bapa, si Daud, ai domma pala ipabangkit Ham ahu gabe raja, manggomgom sada bangsa, na songon orbuk ni tanoh bueini. [7]

¹⁰Halani ai, bere Ham ma bangku hapentaran ampa parbinotohan, naha marparlahou i lobei ni bangsa on; ai ise ma na boi manguhum bangsa-Mu, na sain banggalni?” [8]

¹¹Nini Naibata ma mambalosi si Salomo, “Halani sonin pangindoan ni uhurmu, anjaha seng ipangindo uhurmu habayakon, arta, hamuliaon, barang hosah ni munsuhmu, seng homa ganjang ni umur ipindo ho, tapi hapentaran ampa parbinotohan do ipindo ho, ase ibotoh ho manguhum bangsang-Kin, songon na dob Hupabangkit ho manrajai ai,

¹²halani ai layak-layakkonon-Ku ma bam hapentaran ampa parbinotohan. Ambah ni ai bereon-Ku do hubam habayakon, arta ampa hamuliaon; lang adong na sonai ai bani raja-raja na parlobei humbam, anjaha ise pe lang raja, na roh hun pudimu, dong na sonai ai bani.” [9]

¹³Dob ai mulak ma si Salomo hun buntu-buntu na i Gibeon, hun lobei ni lampolampo partumpuan na i Gibeon hu Jerusalem, anjaha irajai ma halak Israel.

¹⁴Ipatumpu si Salomo ma gareta ampa halak siajak huda; dong ma bani saribu ompat ratus gareta ampa sapuluh dua ribu halak siajak huda. Inahkon ma ai hubagas huta ianan ni gareta ampa i Jerusalem i lambung ni raja ai. [10]

¹⁵Dob ai ipabuei raja ai pirak ampa omas i Jerusalem, songon batu bueini, sonai homa hayu ares songon jambu na dong tubuh i tanoh bornoh bueini. [11]

¹⁶Ia harorohan ni huda na bani si Salomo, ai ma hun Masir ampa hun Koa do, partiga-tiga ni raja ai do mangalop ai hun Koa, surduk borot mangihutkon harga na i tiga. [12]

¹⁷Marharga onom ratus sekel pirak do iparoh sidea sada gareta hun Masir, anjaha saratus lima puluh sekel do harga ni sada huda; lanjar sidea do na padalankon ai hubani raja-raja ni halak Het pakon halak Aram.