Read Batak Simalungun 2 KRONIKA 12 Bible Online

2 KRONIKA 12 - Batak Simalungun bible

2 KRONIKA 12

¹Dob lambin jonam harajaon ni si Rehabeam anjaha gogoh, itadingkon ma titah ni Jahowa, ia rap pakon ganup halak Israel. [160]

²Halani ai, palima-tahunkon dob raja si Rehabeam, tangkog ma raja Sisak, raja ni Masir, mandorab Jerusalem, halani na dob mardousa sidea dompak Jahowa, [161]

³rap pakon saribu dua ratus gareta porang pakon onom puluh ribu halak siajak huda. Anjaha seng habilangan anggo halak simbuei, na roh rap pakonsi hun tanoh Masir: halak Libia, Suki pakon Etiopia. [162]

⁴Dob ai italuhon ma ganup huta na pinatoguh i Juda, pala das ia hu Jerusalem. [163]

⁵Dob ai roh ma nabi Semaya marayak si Rehabeam pakon kopala-kopala hun Juda, na dob martumpu hu Jerusalem halani si Sisak, anjaha nini ma dompak sidea, “Sonon do hata ni Jahowa: Domma itadingkon hanima Ahu, Ahu pe tadingkonon-Ku ma hanima laho padaskon hubagas tangan ni si Sisak.” [164]

⁶Jadi ipaunduk kopala-kopala ni halak ni Israel pakon raja ai ma uhurni, nini sidea ma, “Bonar do Jahowa.” [165]

⁷Dob iidah Jahowa na dob ipaunduk sidea uhur ni sidea, roh ma hata ni Jahowa hubani si Semaya sonon, “Domma ipaunduk sidea uhur ni sidea, halani ai seng be magou sidea bahenon-Ku, podas ma bereon-Ku haluahon bani sidea, anjaha seng be useihonon-Ku ringis-Hu hu Jerusalem marhitei tangan ni si Sisak. [166]

⁸Tapi maningon unduk do sidea bani, ase ibotoh sidea aha do artini na mambalosi Ahu pakon na mambalosi harajaon na i tanoh on.” [167]

⁹Ase tangkog ma raja Sisak hun Masir mandorab Jerusalem; ibuat ma arta hun Rumah ni Jahowa pakon arta na i rumah ni raja ai, sabonar haganup do ibuat ronsi gantar omas, na pinauli ni si Salomo. [168]

¹⁰Dob ai ihatahon Raja Rehabeam ma paulihon gantar-gantar tombaga bahen gantihni, anjaha iondoskon ma ai hu tangan ni pambobai ni bala, na marjaga i lambung ni rumah ni raja ai.

¹¹Barang piga hali pe raja ai masuk hu Rumah ni Jahowa, sai roh do parjaga ai mangusung gantar-gantar ai, dob ai ipaulak ma use ai hu kamar jaga.

¹²Halani na pinaundukni ai uhurni surut ma ringis ni Jahowa hun bani, gabe seng siap tumang ia ibahen; ambahni ai adong ope na madear i Juda. [169]

¹³Ase i Jerusalem do si Rehabeam marianan anjaha manrajai. Marumur ompat puluh sada tahun do si Rehabeam sanggah na bangkit raja ia, anjaha sapuluh pitu tahun do ia manrajai i Jerusalem, ai ma huta, na pinilih ni Jahowa hubani ganup marga Israel, bahen ianan ni goran-Ni. Ia goran ni inang ni raja ai si Naema do, boru Ammon. [170]

¹⁴Dob ai ihorjahon raja ai ma hajahaton, ai seng idompakkon uhurni mangindahi Jahowa.

¹⁵Tapi anggo barita ni si Rehabeam, humbani mulani ronsi ujungni, ai lang tarsurat do ai ibagas Buku Barita ni Nabi Semaya, ampa si Iddo, halak na marpanonggoran ai? Tapi sai marnunut do tong hamunsuhon i holangkolang ni si Rehabeam ampa si Jerobeam. [171]

¹⁶Dob ai modom ma si Rehabeam rap pakon ompungni, anjaha itanom ma ia ibagas huta ni si Daud; si Abia, anakni ai ma gabe raja manggantihsi. [172]