Read Batak Simalungun 2 KRONIKA 19 Bible Online

2 KRONIKA 19 - Batak Simalungun bible

2 KRONIKA 19

¹Tapi anggo si Josafat, raja ni Juda, jorgit do das hu rumahni i Jerusalem. [252]

²Dob ai kaluar ma manjumpahkonsi Nabi Jehu, anak ni si Hanani, anjaha nini ma dompak Raja Josafat, “Ai bulih do ninuhurmu urupan halak parjahat barang haholongan halak na marsogam ni uhur bani Jahowa? Manggila tumang do Jahowa halani ai mangidah ham. [253]

³Tapi adong ope tene jumpah na madear bamu, ai isiaphon ham do sisombahon Ashera na i nagori on anjaha ipabulat ham do uhurmu mangindahi Naibata.” [254]

⁴Marianan i Jerusalem do si Josafat. Dob ai iulaki ma use bingkat manorih bangsa ai hun Berseba das hu Dolog Efraim, anjaha iarahkon ma sidea mulak hubani Jahowa, Naibata ni ompung ni sidea. [255]

⁵Dob ai ipabangkit ma panguhum i nagori ai, ibagas ganup huta ni Juda na pinatoguh, huta hu huta, [256]

⁶anjaha nini ma dompak panguhum ai, “Pangkei ma nasiam bani sibahenon nasiam, ai seng bani jolma nasiam manguhum, tapi bani Jahowa do; i lambung nasiam do Ia, sanggah na manguhum ai nasiam. [257]

⁷Ai pe, sai sogop ma bani nasiam biar mangidah Jahowa; jaga ma nasiam bani na binahen nasiam, ai seng masa uhum hagedukon bani Jahowa, Naibatanta, barang na martonggor jumbak, barang na manjalo sisip. [258]

⁸Age i Jerusalem ipabangkit si Josafat do deba halak Levi pakon malim ampa kopala ni mar sasaompung i Israel, laho mandalankon panguhumion ni Jahowa ampa na mamutus pahara bani halak na marianan i Jerusalem.” [259]

⁹Iparentahkon do bani sidea, “Maningon sonai do bahenon nasiam ibagas biar mangidah Jahowa, ibagas habujuron ampa humbani bulat ni uhur.

¹⁰Anggo tarboan hu lobei nasiam sada pahara humbani sanina nasiam, na marianan i huta ni sidea bei, ai ma pasal daroh na durus, titah barang tonah, aturan barang uhum, maningon ajaran nasiam do sidea, ase ulang marsalah sidea bani Jahowa, gabe sogop ringis-Ni hubani nasiam barang hubani sanina nasiam. [260]

¹¹Tonggor ma, Sintua ni malim Amarya do kopala nasiam bani ganup horja ni Jahowa; anjaha si Sebaya, anak ni si Ismael, kopala ni ginompar ni Juda bani ganup horja ni raja in, anjaha halak Levi gabe gamot-gamot i lobei nasiam. Ai pe, jimot ma nasiam marhorja, sai hasomanan ni Jahowa do halak sidear uhur.” [261]