Read Batak Simalungun 2 KRONIKA 2 Bible Online

2 KRONIKA 2 - Batak Simalungun bible

2 KRONIKA 2

¹Dob ai iparentahkon si Salomo ma pajongjongkon sada rumah bani goran ni Jahowa pakon sada rumah harajaon bani sandiri. [13]

²Itotapkon si Salomo ma pitu puluh ribu halak sipanaruhi, ualuh puluh ribu halak sibarbar batu i atas dolog, anjaha tolu ribu onom ratus halak mandur bani sidea. [14]

³Dob ai isuruh si Salomo ma suruhanni marayak si Hiram, raja hun Tirus, nini ma, “Songon na binahenmu hubani bapa, si Daud, ai ma na manongosi hayu ares bani, laho pajongjongkon sada rumah bahen iananni, sonai ma bahen ham hu bangku. [15]

⁴Tonggor ma, sihol do pajongjongonku sada rumah bani goran ni Jahowa, Naibatangku, anjaha papansingkon Bani, laho mamboan hu lobei-Ni dahupa na misbou, ruti sigalangkonon na manotap, pakon galangan situtungon sogod ampa bodari bani ari Sabat, bani poltak ni bulan ampa bani pesta ni Jahowa, Naibatanami, songon na dob tinotapkon sadokah ni dokahni bani Israel. [16]

⁵Anjaha rumah panumbahan sipajongjongonkai, maningon banggal do, ai banggalan do Naibatanami humbani sagala naibata na legan. [17]

⁶Tapi tene ise ma na boi pajongjong sada rumah Bani, ai gari langit ni langitan seng tarhamkamsi Ia? Ise ma ahu, ase ahu pajongjong sada rumah Bani? Pitah laho manutung dahupa namin i lobei-Ni. [18]

⁷On pe suruh ham ma bangku sada halak na pandei mangkorjahon omas, pirak, tombaga, bosi, hiou saholat sigerger pakon hiou saholat simahonda, sonai homa na pandei manguhir, laho mangkasomani siparhorja na pandei, na adong i lambungku i Juda pakon i Jerusalem, ai ma na pinabangkit ni bapa, si Daud. [19]

⁸Tongoshon ham ma homa bangku hayu ares, sampinur pakon ingul hun Libanon, ai hubotoh, na pandei do juakjuakmu pauli hayu i Libanon. juakjuakku pe mangkasomani juakjuakmu, [20]

⁹laho pasirsirhon parhayu bangku, buei tumang, ai rumah na sihol paulionkai, maningon banggal anjaha jombut do.

¹⁰Anjaha tonggor ma, bereonku do hubani juakjuakmu, ai ma sipanroboh hayu, na pauli parhayu ai, dua puluh ribu kor gandum, dua puluh ribu kor andolei, dua puluh ribu bat anggur ampa dua puluh ribu bat minak.” [21]

¹¹Dob ai nini si Hiram, raja hun Tirus ma ibagas surat na tinongoskonni ai hubani si Salomo, “Halani holong ni uhur ni Jahowa bani bangsa-Ni, ai do ase ipabangkit ham gabe raja manggomgomi sidea.” [22]

¹²Ambah ni ai nini si Hiram do, “Pinuji ma Jahowa, Naibata ni Israel, na manompa langit pakon tanoh, na mamberehon bani raja Daud sada anak na pentar, na pantas maruhur anjaha na pandei martimbang, na marsura-sura pajongjong sada Rumah bani Jahowa ampa sada rumah harajaon bani sandiri. [23]

¹³Halani ai, husuruh do sada halak na pentar, na pandei martimbang, ai ma si Huram-Abi, [24]

¹⁴anak ni sada naboru, humbani ginompar ni si Dan, tapi anggo bapani halak Tirus do. Na pentar do ia mangkorjahon omas, pirak, tombaga, bosi, batu pakon hayu, hiou saholat na gerger, hiou saholat na mahonda, hiou silopak na alus ampa hiou na tinubar, na pandei manguhir ampa mamingkiri bagei-bagei ni horja na laingan na niondoskon hu bani, laho mangkasomani halak na pentar, na adong bamu ampa bani tuanku, bapanta si Daud. [25]

¹⁵Antong itongoskon tuanku ma hubani juakjuakni gandum pakon andolei minak pakon anggur, na dob pinarbagahni ai;

¹⁶ase iroboh hanami hayu i Libanon barang sadiha na porlu bamu, hanami pe mamboan ai marrakit-rakit i laut hu Joppe, anjaha ham ma use mamboan ai tangkog hu Jerusalem.” [26]

¹⁷Dob ai ibilang si Salomo ma ganup halak dagang na adong i tanoh Israel, mangihutkon pamilangon na binahen ni bapani, si Daud, bani sidea; jadi jumpah ma saratus lima puluh tolu ribu onom ratus halak bueini. [27]

¹⁸Jadi ipapulig ma hunjai pitu puluh ribu halak sipanaruhi, ualuh puluh ribu halak sibarbar batu i dolog, anjaha tolu ribu onom ratus halak gabe mandur, na mangatur halak simbuei marhorja.