Read Batak Simalungun 2 KRONIKA 20 Bible Online

2 KRONIKA 20 - Batak Simalungun bible

2 KRONIKA 20

¹Jadi dob salpu ai, roh ma halak Maob pakon Ammon anjaha hasoman ni sidea, halak Meunim, marporang dompak si Josafat. [262]

²Dob ai roh ma halak na patugahkon barita ai hubani si Josafat, “Roh do mandorab ham buei bala hun dipar ni laut, hun Edom, anjaha tonggor ma, domma das sidea i Haseson-Tamar, ai ma Engedi.”

³Jadi gobir ma si Josafat, anjaha iputuskon ma ibagas uhurni mangindahi Jahowa, anjaha isuruh ma na maningtingkon, ase marpuasa ganup Juda. [263]

⁴Dob ai martumpu ma ganup Juda mangindo pangurupion bani Jahowa; roh do homa halak humbani ganup huta ni Juda mangelek-elek Jahowa. [264]

⁵Dob ai jongjong ma si Josafat i tongah-tongah ni tumpuan ni Juda pakon Jerusalem, i Rumah ni Jahowa, i lobei ni alaman na baru ai, [265]

⁶nini ma, “Ham Jahowa, Naibata ni ompungnami, Ham do Naibata i nagori atas, anjaha Ham do na manggomgomi ganup harajaon ni bangsa sipajuh begu-begu; ibagas tangan-Mu do kuasa pakon hagogohon, anjaha ise pe lang na tahan i lobei-Mu. [266]

⁷Ai lang domma iusir Ham, alo Naibatanami, isi ni tanoh on hun lobei ni bangsa-Mu halak Israel, anjaha ai lang domma ilayak-layakkon Ham tanoh on bani ginompar ni si Abraham, huan-huan-Mu in, ronsi sadokah ni dokahni? [267]

⁸Domma marianan sidea ijin, anjaha domma pala ipajongjong bani goran-Mu sada rumah na mapansing, ai ninuhur ni sidea,

⁹Anggo sogop bannami hamagouan, podang, papa, sampar barang lohei, maningon jongjong do hanami i lobei ni rumah on pakon i lobei ni bohi-Mu, ai marianan ibagas rumah on do goran-Mu, anjaha dilo-dilo Bamu ibagas hasosakannami, gabe tangihonon-Mu anjaha urupan-Mu do hanami. [268]

¹⁰Anjaha sonari, tonggor Ham ma, roh do halak Ammon pakon Moab ampa halak na hun dolog Seir, ai ma halak na so manlopas halak Israel mamontas hun tanoh ni sidea, sanggah na roh sidea hun tanoh Masir; tapi ilembangi do sidea, anjaha seng isiapkon sidea. [269]

¹¹Tonggor Ham ma, sihol mambahen na masambor do sidea bennami nuan, roh do sidea sihol mangusir hanami hun parbagianan-Mu, na dob binere-Mu bannami.

¹²Ham Naibatanami, ai seng mambalas Ham dompak sidea? Ai seng margogoh hanami mangimbang bala na buei on, na roh mangimbang hanami. Seng ibotoh hanami barang aha na sihol bahenonnami, tapi mangkawah dompak Ham do matanami.” [270]

¹³Sanggah ai jongjong do ganup halak Juda i lobei ni Jahowa, rap pakon na etek-etek ni sidea, parinangon ni sidea ampa anak ni sidea,

¹⁴jadi sogop ma Tonduy ni Jahowa i tongah-tongah ni tumpuan ai hubani si Jehasiel, anak ni si Sakaria, ai ma anak ni si Benaya, ai ma anak ni si Jehiel, ai ma anak ni si Matanya, halak Levi humbani ginompar ni si Asap, [271]

¹⁵anjaha nini ma, “Tangar nasiam ma, nasiam halak Juda ganup ampa nasiam isi ni Jerusalem ampa ham Raja Josafat! Sonon do hata ni Jahowa hubani nasiam, ʻUlang nasiam mabiar, anjaha ulang ma gobir nasiam dompak hulanan na bolon ai, ai seng nasiam suhut bani porang on, tapi Naibata do.ʼ [272]

¹⁶Patar ma nasiam bingkat mandorab sidea; tonggor ma, tangkog do sidea hun tangkogan Sis, anjaha jumpah nasiam ma sidea bani ujung ni habungan ai i lobei ni pamah Jeruel.

¹⁷Sabonar seng pala nasiam marporang bani parporangan on; jongjong ma nasiam soh, anjaha idah nasiam ma hamonangan, na sihol bereon ni Naibata bani nasiam, nasiam halak Juda pakon Jerusalem. Ulang ma nasiam mabiar anjaha ulang gobir! Patar jumpahkon nasiam ma sidea, anjaha sai hasomanan ni Naibata do nasiam.” [273]

¹⁸Jadi marrogop ma si Josafat, pala dais bohini hu tanoh, anjaha ganup halak Juda ampa isi ni Jerusalem pe manrogop bei do i lobei ni Jahowa, laho martonggo bani Jahowa.

¹⁹Dob ai jongjong bei ma halak Levi humbani ginompar ni si Kahat pakon humbani ginompar ni si Korah, laho mamuji Jahowa, Naibata ni Israel, marhasoman sora na gogoh tumang. [274]

²⁰Jadi patarni ai girah ma sidea sogod bingkat hu pamah Tekoa, anjaha sanggah na bingkat ai sidea, jongjong ma si Josafat anjaha nini ma, “Tangihon nasiam ma ahu, nasiam halak Juda anjaha nasiam isi ni Jerusalem! Porsaya ma nasiam bani Jahowa Naibata nasiam, ase totap nasiam; haporsayai nasiam ma nabi-Ni, ase monang nasiam.” [275]

²¹Dob ai manriah ma raja ai pakon halak sipandoding bani Jahowa, anjaha ipuji ma Ia marpakeian hapansingon, sanggah na mardalan ai sidea i lobei ni bala ai, anjaha nini ma, “Mangkatahon tarima kasih ma nasiam bani Jahowa, ai ronsi sadokah ni dokahni do idop ni uhur-Ni.” [276]

²²Jadi sanggah mamungkah sidea marolob-olob pakon mamuji-muji, ihatahon Jahowa ma roh halak sipanggompangi hun parponopan, mandorab halak Ammon, Moab, pakon halak na hun dolog Seir, ai ma na roh mamorang Juda namin, gabe italuhon ma sidea.

²³Ai roh do halak Ammon ampa halak Moab manlawan pangisi ni dolog Seir, siap tumang do sidea ibahen, anjaha dob isiapkon sidea pangisi ni Seir ai, marsibunuhan ma sidea samah sidea. [277]

²⁴Jadi dob das halak Juda hu panatapan na i halimisan ai, itatap sidea ma dompak munsuh na buei ai, hape tonggor ma, marrageian do bangkei i tanoh ai, sada pe lang maluah. [278]

²⁵Jadi dob roh si Josafat rap pakon bangsani, laho mambuat taban-taban, jumpah sidea ma pinahan buei tumang, ugas-ugas, pakeian, ampa barang na maharga, anjaha marsibuat na bani bei ma, pala seng tarboan sidea be. Tolu ari sidea marbagi taban-taban, sonai ma bueini.

²⁶Paompat-arihon martumpu ma sidea i pamah pamuji-mujian, ai ijai do ipuji sidea Jahowa; halani ai do ase ibahen halak goran ni ianan ai Pamah Pamuji-mujian ronsi sadari on.

²⁷Dob ai mulak ma sidea ganup, halak Juda pakon pangisi ni Jerusalem ibobahon si Josafat; marmalas ni uhur do sidea na mulak ai, ai domma malas uhur ni sidea mangidah munsuh ni sidea ibahen Jahowa. [279]

²⁸Masuk ma sidea hu Jerusalem marhasoman arbap, sordam pakon tarompit, laho hu Rumah ni Jahowa.

²⁹Anjaha sogop ma biar na humbani Naibata hubani haganup harajaon na i nagori ai, dob ibogei sidea, Jahowa do na marporang dompak munsuh ni Israel. [280]

³⁰Jadi sonang ma harajaon ni si Josafat, ai ibere Naibatani do hu bani hasonangan inggot. [281]

³¹Sonai ma panrajaion ni si Josafat bani Juda. Marumur tolu puluh lima tahun ia sanggah bangkit raja, anjaha dua puluh lima tahun do ia manrajai i Jerusalem. Goran ni inangni si Asuba do, boru ni si Silhi.

³²Mardalan do ia bani dalan ni bapani, si Asa, anjaha lang manlembang ia hunjai; ihorjahon do na pintor bani uhur ni Jahowa.

³³Tapi panumbahan na bani buntu-buntu seng iparseda ope, ai seng marsijoloman ope uhur ni halak na mabuei ai bani Naibata ni ompung ni sidea.

³⁴Barita na tading ai ope humbani si Josafat, humbani mungkahni das bani ujungni, tonggor ma, tarsurat do ai ibagas buku Barita ni si Jehu, anak ni si Hanani, ai ma na sinuratkonni hubagas Buku ni Raja-raja Israel. [282]

³⁵Dob salpu ai, mardos ni uhur ma si Josafat, raja ni Juda pakon si Ahasya, raja ni Israel, ai ma sada halak sihorjahon na jahat. [283]

³⁶Mardos ni uhur do ia pakonsi paulihon kapal, na marlayar hu Tarsis. I Ezeon-Geber do itukangi sidea kapal ai. [284]

³⁷Tapi roh ma si Elieser, anak ni si Dodia hun Maresa, manjahai dompak si Josafat, nini ma, “Halani mardos ni uhur ham pakon si Ahasya, parsedaon ni Jahowa do holi na hinorjahonmu in. Jadi marropukan ma kapal ai, gabe seng tarbahensi marlayar hu Tarsis.” [285]