Read Batak Simalungun 2 KRONIKA 25 Bible Online

2 KRONIKA 25 - Batak Simalungun bible

2 KRONIKA 25

¹Marumur dua puluh lima tahun do si Amasia, sanggah na bangkit ai ia gabe raja, anjaha dua puluh siah tahun do dokahni manrajai i Jerusalem; ia goran ni inangni, ai ma si Joaddan, hun Jerusalem.

²Ihorjahon do harosuh ni Jahowa, tapi seng humbani bulat ni uhurni. [329]

³Jadi dob totap harajaon ai ibagas tanganni, ibunuh ma juakjuakni, na mambunuh raja, bapani ondi. [330]

⁴Tapi anggo anak ni sidea seng ibunuh, romban hubani na tarsurat ibagas buku titah na binahen ni si Musa, songon na tinonahkon ni Jahowa hu bani, “Seng bulih matei sada halak halani anakni, anjaha seng bulih matei sada anak halani bapani, tapi ganup do maningon matei halani dousani sandiri.” [331]

⁵Dob ai ipatumpu si Amasia ma halak Juda, anjaha ipaodor ma mar sasaompung bahen kopala ni sisaribu pakon sisaratus halak bani sab Juda pakon Benjamin. Ibilangi ma sidea olat ni na marumur dua puluh tahun ampa lobih hunjai, gabe jumpahsi ma tolu ratus ribu halak na pinilih, na gopas marporang, na boi manjolom tanja pakon gantar-gantar. [332]

⁶Ambahni ai iupahi ope humbani Israel saratus ribu halak bala na borani marhitei saratus talenta pirak.

⁷Tapi roh ma sada halak ni Naibata marayaksi, nini ma, “Ham rajanami, ulang ma lopas ham bingkat bala ni halak Israel rap pakon ham, ai seng tarhasomani Jahowa halak Israel ampa ganup halak Efraim. [333]

⁸Tapi anggo ninuhurmu monang do ham marhitei dalan na sonon, talu ma ham bahenon ni Naibata i lobei ni munsuh; ai markuasa do Naibata mangurupi barang mandabuhkon.” [334]

⁹Nini si Amasia ma dompak halak ni Naibata ai, “Tapi sonaha ma sisaratus talenta, na dob hubere ai hubani bala ni Israel?” Nini halak ni Naibata ai ma mambalosi, “Boi do Naibata mambere bamu lobih hunjai.” [335]

¹⁰Dob ai ipapulig si Amasia ma bala na roh hu bani hun Efraim, ase mulak sidea hu hutani. Tapi manggila tumang ma sidea bani Juda; ibagas gila mulak ma sidea hu huta ni sidea.

¹¹Tapi iboranihon si Amasia ma dirini mambobahon balani hu parporangan, das ma ia hu Pamah Pargaraman, anjaha ibunuh ma humbani halak Seir salaksa halak.

¹²Ambahni ai itangkap halak Juda ope salaksa halak manggoluh, iboan sidea ma sidea hu pakpak ni sada dolog batu, anjaha idabuhkon ma sidea hun pakpak ni dolog batu ai, gabe maropuk ma sidea haganup. [336]

¹³Tapi anggo bala, na pinaulak ni si Amasia, na so pinalopasni laho rap pakonsi marporang, idorab sidea ma huta-huta ni Juda olat ni Samaria das hu Bet-Horon, anjaha ibunuh sidea ma tolu ribu halak hunjai anjaha buei taban-taban iboan. [337]

¹⁴Dob mulak si Amasia humbani na manaluhon halak Edom, iboan ma naibata ni halak Seir, ipajongjong ma ai, isombah ma anjaha igalangi ma ai.

¹⁵Jadi manringis tumang ma Jahowa mangidah si Amasia, anjaha isuruh ma bani sada nabi, na mangkatahon dompaksi, “Mase ma dompakkonon nasiam naibata ni sada bangsa, na so boi paluahkon bangsani sandiri humbani tangan nasiam?”

¹⁶Sanggah na marsahap ope ia, nini raja ai ma hu bani, “Ai adong ipabangkit hanami ho gabe panuturi ni raja? Sip! Mase rahanan tarbunuh ho?” Jadi sip ma nabi ai, pitah on mando ihatahon, “Domma huidah, na dob iputuskon Naibata, sihol mangagou ham, halani sonin pambahenanmu, anjaha lang ibalosi ham podahku.” [338]

¹⁷Dob ai manriah ma si Amasia, raja ni Juda, anjaha isuruh ma suruhanni marayak si Joas, anak ni si Joahas, anak ni si Jehu, raja ni Israel, nini ma, “Eta, marsidohoran ma lobei hita!”

¹⁸Tapi isuruh si Joas, raja ni Israel ma suruhanni marayak si Amasia, raja ni Juda, mambalosi, “Isuruh hayu na marduri i Libanon ma sipanririt marayak hayu ares na i Libanon, nini ma, ʻBere ma borumin bahen parinangon ni anakku;ʼ hape roh ma binatang na i atas dolog Libanon, idorab ma hayu na marduri ai lanjar idogei-dogei. [339]

¹⁹Nini uhurmu, ʻTonggor ma, domma hutaluhon halak Edom,ʼ gabe ipagijang ham uhurmu, sihol mambuat puji-pujian. Mahua tading ma ham rahanan i rumahmu, mase rahanan jombaonmu hamagouan, gabe rasei ham, ham rap pakon Juda?” [340]

²⁰Tapi seng ra si Amasia manangihon ai, ai marharorohan humbani Naibata do ai, laho mangondoskon sidea hubagas tangan ni munsuh, halani na pinindahan ni sidea naibata ni halak Edom. [341]

²¹Jadi tangkog ma si Joas, raja ni Israel, gabe marsisubaan ma ia pakon si Amasia, raja ni Juda, i Betsemes, na i tanoh Juda.

²²Tapi talu ma halak Juda ibahen halak Israel, gabe maporus ma sidea ganup hu lampolampo ni sidea bei.

²³Tapi tartangkap ma si Amasia, raja ni Juda, anak ni si Joas, anak ni si Joahas, i Betsemes, ibahen si Joas, raja ni Israel, gabe iboan ma ia hu Jerusalem, anjaha irongrongkon ma tembok ni Jerusalem, olat ni Horbangan Efraim das hu Horbangan Parsuhi-suhi, ompat ratus asta ganjangni. [342]

²⁴Ibuat do homa haganup omas pakon pirak ampa haganup na jumpah i Rumah ni Naibata, na niramotkon ni si Obed-Edom; ibuat do homa arta na i rumah ni raja ai, ambahni ai halak gabe borot, dob ai mulak ma ia hu Samaria. [343]

²⁵Tapi anggo si Amasia, anak ni si Joas, raja ni Juda, manggoluh ope sapuluh lima tahun nari dob matei si Joas, anak ni si Joahas, raja hun Israel.

²⁶Barita na legan ai ope pasal pambahenan ni si Amasia, hun mungkahni das hu ujungni, ai lang tarsurat do ai ibagas buku Barita ni Raja-raja Juda ampa Israel?

²⁷Olat ni na dob surut si Amasia humbani Jahowa, ibahen halak ma partahi-tahian mangimbangsi i Jerusalem, gabe maporus ma ia hu Lakis. Tapi isuruh sidea ma halak na mangirikkonsi hu Lakis, gabe ibunuh ma ia ijai. [344]

²⁸Dob ai iboan ma ia i atas ni huda, anjaha itanom ma ia i lambung ni ompungni, ibagas huta ni si Daud.