Read Batak Simalungun 2 KRONIKA 27 Bible Online

2 KRONIKA 27 - Batak Simalungun bible

2 KRONIKA 27

¹Marumur dua puluh lima tahun do si Jotam, sanggah na bangkit raja ia, anjaha sapuluh onom tahun do dokahni ia manrajai i Jerusalem; ia goran ni inangni, ai ma si Jerusa, boru ni si Sadok.

²Ihorjahon do rosuh ni Jahowa, songon haganup na binahen ni si Usia, bapani ai, tapi seng masuk anggo ia hubagas Rumah ni Jahowa. Tapi tong ope maruhur jahat anggo bangsa ai. [357]

³Ipauli do Horbangan Pardatas i Rumah ni Jahowa, anjaha buei do na pinaulini bani tembok Opel, [358]

⁴Ipungkah do homa huta i atas dolog ni Juda, anjaha i harangan ipauli do benteng pakon menara. [359]

⁵Marporang do ia dompak raja ni halak Ammon, anjaha italuhon do sidea, gabe manggalar sohei ma bani halak Ammon, bani na satahun ai saratus talenta pirak, saloksa kor gandum pakon saloksa kor andolei. Sonai do homa pambere ni halak Ammon bani tahun paduahon ampa patoluhon. [360]

⁶Jadi lambin markuasa ma si Jotam, ai dear do dalanni i lobei ni Jahowa, Naibatani.

⁷Barita na legan ai ope humbani si Jotam, pakon haganup parporanganni ampa pambahenanni, tonggor ma, tarsurat do ai ibagas Buku ni Raja-raja Israel ampa Juda.

⁸Marumur dua puluh lima tahun do ia, sanggah na bangkit raja, anjaha sapuluh onom tahun do ia manrajai i Jerusalem.

⁹Dob ai modom ma si Jotam rap pakon ompungni, anjaha itanom sidea ma ia i huta ni si Daud. Jadi si Ahas, anakni ai ma bangkit raja manggantihsi.