Read Batak Simalungun 2 KRONIKA 28 Bible Online

2 KRONIKA 28 - Batak Simalungun bible

2 KRONIKA 28

¹Marumur dua puluh tahun do si Ahas, sanggah na bangkit raja ia, anjaha sapuluh onom tahun do dokahni manrajai i Jerusalem. Tapi seng ihorjahon rosuh ni Jahowa, songon si Daud ompungni ai,

²tapi mardalan do ia bani dalan ni raja-raja ni Israel. Ipauli do gana-gana tuangan bani Baal; [361]

³manutung dahupa do ia i Habungan Ben-Hinnom, anjaha itutung do anakni bahen galangan, romban hubani adat na masambor bani bangsa sipajuh begu-begu, na pinabali ni Jahowa hun lobei ni halak Israel. [362]

⁴Manggalang anjaha manutung dahupa do homa ia i atas ni panumbahan na i dolog-dolog, i buntu-buntu ampa i toruh ni sagala hayu na tabun. [363]

⁵Halani ai, ipadas Jahowa, Naibatani ma ia hubagas tangan ni raja Aram; italuhon sidea ma ia, anjaha itaban buei humbani rayatni lanjar iboan hu Damaskus. Iondoskon do homa ia hubagas tangan ni raja Israel, gabe talu tumang ibahen.

⁶Ibunuh si Peka, anak ni si Remalya do humbani halak Juda ibagas na sadari saratus dua puluh ribu halak; haganup ai halak na somal marmunsuh do, halani na tinadingkon ni sidea Jahowa, Naibata ni ompung ni sidea. [364]

⁷Sonai homa si Sikri, puanglima na hun Epraim ai, ibunuh do si Maaseya, anak ni raja ai, pakon si Asrikam siramotkon rumahni, ampa si Elkana panuturi ni raja ai.

⁸Ambahni ai ibuangkon halak Israel do humbani sanina ni sidea ai dua ratus ribu naboru, anak ampa boru, ambahni ai buei tumang taban-taban ibuat sidea, anjaha iboan sidea hu Samaria.

⁹Tapi adong ma sada ijai nabi ni Jahowa, na margoran si Oded; luar ma ia manjumpahkon bala na mulak ai hu Samaria, nini ma dompak sidea, “Tonggor ma, halani manringis do Jahowa Naibata ni ompung nasiam hubani halak Juda, ase iondoskon sidea hubagas tangan nasiam; hape ibagas gila ibunuh nasiam sidea, pala das hu nagori atas doruh-doruh ai. [365]

¹⁰Sonari isurahon nasiam ope patundukkon halak Juda ampa Jerusalem bahen jabolon dalahi ampa jabolon naboru nasiam. Ai lang borat tumang do age salah nasiam dompak Jahowa, Naibata nasiam? [366]

¹¹Halani ai, tangihon nasiam ma ahu, anjaha paulak nasiam ma jolma na tartangkap in, na binoan nasiam humbani hasoman sabangsa nasiam, ai domma manggila Jahowa mangidah nasiam.”

¹²Dob ai jongjong ma deba kopala-kopala humbani halak Efraim, ai ma: Si Asarya anak ni si Johanan, si Berekya anak ni si Mesilemot, si Hiskia anak ni si Salum, pakon si Amasa anak ni si Hedlai, ijumpahkon sidea ma bala na mulak hun parporangan ai,

¹³nini ma dompak sidea, “Seng bulih boanon nasiam hujon na tartangkap in, ai na mambahen marsalah do hita dompak Jahowa marhitei sura-sura nasiam in, manambahi dousa ampa salahta sisonari; ai lang domma banggal salahta, anjaha gajag ringis ni Jahowa dompak Israel?” [367]

¹⁴Dob ai iberehon bala na marsinjata ai ma halak na tartaban ai ampa taban-taban ai i lobei ni kopala-kopala ampa tumpuan ai.

¹⁵Jadi jongjong ma dalahi-dalahi na ginoranan ondi manjalo halak na tarboan ai; iparhioui sidea ma sagala na so marhiou humbani taban-taban ai, ibere ma sidea hiou, sipatu, sipanganon ampa siinumon, iminaki ma sidea, ipahundul ma hu halode sagala halak na galek, anjaha iboan ma sidea hu Jeriko, hu huta parhalambiran ai, hubani sanina ni sidea. Dob ai mulak ma sidea hu Samaria. [368]

¹⁶Ijia isuruh Raja Ahas ma suruhanni marayak raja Assur, andohar iurupi ia. [369]

¹⁷Ai iulaki halak Edom do use roh mamunuhi halak Juda, anjaha iboan do homa buei halak hu habuangan.

¹⁸Sonai homa halak Palistim idorab do huta-huta ni Juda, na i tanoh bornoh ampa na i tanoh Dangsina, anjaha italuhon sidea ma Betsemes, Ayalon, Gederot pakon Soko ampa dusunni, Timna ampa dusunni, pakon Gimso ampa dusunni, lanjar marianan ma sidea ijai. [370]

¹⁹Ai ipatoruh Jahowa do Juda halani si Ahas, raja ni Juda, ai sambor do pambahenanni i Juda, anjaha seng bujur ia dompak Jahowa. [371]

²⁰Jadi roh ma mangimbangsi si Tiglat-Pilneser, raja ni Assur, isosak-sosak ma ia, seng iurupi ia. [372]

²¹Ai domma ibuat si Ahas namin ugas-ugas hun Rumah ni Jahowa, hun rumah ni raja ai ampa humbani kopala-kopala, anjaha ibere ai hubani raja ni Assur, hape lanjar do lang iurupi ia.

²²Tapi inunut raja Ahas do marjahat dompak Jahowa bani panorang hasosakanni ai.

²³Ai manggalang do ia hubani naibata ni Damaskus, na manaluhonsi, nini, “Halani naibata ni raja-raja Aram do manolongi sidea, dihut ma ahu manggalang hujai, andohar dihut ahu iurupi sidea,“ hape gabe hadabuhan do ai bani ampa bani ganup halak Israel. [373]

²⁴Dob ai ipatumpu si Ahas ma parugas ni Rumah ni Naibata anjaha ibolahi ma ai; itutup ma labah ni Rumah ni Jahowa, anjaha ipauli ma bani anjapanjap bani ganup suhi-suhi ni Jerusalem. [374]

²⁵Ipauli do homa bani ganup huta ni Juda panumbahan i buntu-buntu, panggalangan bani naibata na legan, gabe ipuhoi ma marhitei ai ringis ni Jahowa, Naibata ni ompungni. [375]

²⁶Barita na legan ai ope pasalsi, na binahenni humbani mungkahni das hubani ujungni, tarsurat do ai ibagas Buku ni Raja-raja Juda ampa Israel. [376]

²⁷Dob ai modom ma si Ahas rap pakon ompungni, anjaha itanom sidea ma ia i huta Jerusalem; seng itanom sidea ia hu tanoman ni raja-raja Juda. Jadi si Hiskia, anakni ai ma bangkit raja manggantihsi. [377]