Read Batak Simalungun 2 KRONIKA 3 Bible Online

2 KRONIKA 3 - Batak Simalungun bible

2 KRONIKA 3

¹Dob ai ipungkah si Salomo ma pajongjong Rumah ni Jahowa i Jerusalem, i atas dolog Moria; ijai do ipatalar Jahowa diri-Ni hubani si Daud, bapani ai, ai ma ianan, na tinotapkon ni si Daud hinan, bani pardogeian ni si Ornan, halak Jebusi ai. [28]

²Ipungkah ma pajongjongkon ai bani bulan dua paompat-tahunkon, dob manrajai ia.

³Anjaha on do onjolan na binahen ni si Salomo, laho paulihon Rumah ni Naibata: Ganjangni onom puluh asta, mangihutkon ukuran sisapari, anjaha bolagni dua puluh asta.

⁴Tapi anggo surambih na i lobei ai, dua puluh asta do ganjangni mangihutkon bolag ni rumah panumbahan ai; gijangni dua puluh asta do. Ilampis do ai humbagas bani omas pitah.

⁵Kamar bolag ai pe ilampis do humbagas bani sampinur, dob ai ilampis ma ai use bani omas pitah; anjaha i atas ni ai iuhir ma palm pakon bunga na marrantei-rantei.

⁶Ipanlongkothon do hu rumah ai batu na marharga bahen jagar-jagar. Ia omas ai, omas hun Parvaim do.

⁷Ilampis do rumah ai bani omas: Tiang-tiangni, molmolanni, dingdingni pakon labahni; anjaha iuhirhon do Herub bani dingdingni ai.

⁸Ipauli do kamar na pansing sahalian; ganjangni dua puluh asta mangihutkon bolag ni rumah panumbahan ai, anjaha bolagni pe dua puluh asta do; ilampis ma ai bani omas pitah, onom ratus talenta bueini.

⁹Borat ni pakuni lima puluh sekel omas. Ilampis do kamar pardatas ai bani omas.

¹⁰Ibahen do dua Herub na tinuang ibagas ianan na mapansing sahalian ai, anjaha ilampis do ai bani omas.

¹¹Ia habong ni Herub na dua ai dua puluh asta do. Habongni na sada, lima asta ganjangni, dais bani dingding ni rumah ai, anjaha habongni na sada nari lima asta homa, dais hubani habong ni Herub na sada nari.

¹²Sonai homa do sada habong ni Herub na paduahon ai, lima asta ganjangni, anjaha dais do bani dingding ni rumah ai, anjaha habong ni na sada nari ai, lima asta ganjangni, dais bani habong ni Herub na legan ai.

¹³Habong ni Herub na dua ai mangerbang do, dua puluh asta ganjangni. Jongjong do sidea bani naheini sandiri, anjaha bohi ni sidea mandompakkon rumah ai.

¹⁴Ipauli do homa tirei sada humbani hiou saholat na mahonda, hiou saholat na gerger, hiou hasumba pakon hiou silopak na alus, anjaha isulam do hujai Herub. [29]

¹⁵Ibahen ma homa i lobei ni rumah ai dua tiang, tolu puluh lima asta gijangni, anjaha uluni i atasni lima asta gijangni.

¹⁶Ibahen ma homa rantei songon sinongkok, anjaha inahkon ma ai hu atas ni tiang ai; ipaturei ma saratus buah ni dalima, anjaha inahkon ma ai bani rantei-rantei ai.

¹⁷Dob ai ipajongjong ma tiang ai i lobei ni rumah ai, sada hampit siamun, na sada nari hampit sambilou; na hampit siamun ai Jakin do ibahen goranni, anjaha na hampit sambilou ai Boas.