Read Batak Simalungun 2 KRONIKA 30 Bible Online

2 KRONIKA 30 - Batak Simalungun bible

2 KRONIKA 30

¹Dob ai isuruh si Hiskia ma suruhanni hubani ganup Israel pakon Juda, itongos ma homa surat hu Efraim pakon Manasse, ase roh bei sidea hu Rumah ni Jahowa i Jerusalem, laho marpesta Paskah bani Jahowa, Naibata ni Israel. [399]

²Ai domma manriah hinan raja ai rap pakon kopala-kopala ampa ganup tumpuan ai i Jerusalem, laho marpesta Paskah bani bulan dua. [400]

³Ai lang tarbahen sidea mamestahon ai bani panorangni hinan, halani na so sungkup ope bilangan ni malim manguras dirini, sonai homa halak simbuei ai seng ope tumpu i Jerusalem. [401]

⁴Rosuh do uhur ni raja ai ampa ganup tumpuan ai bani riah ai.

⁵Jadi mardos ni uhur ma sidea maningtingkon ai hu sab Israel, olat ni Berseba das hu Dan, ase roh bei sidea hu Jerusalem marpesta Paskah bani Jahowa, Naibata ni Israel, ai domma dokah seng riap sidea marpesta, romban hubani na tarsurat. [402]

⁶Dob ai bingkat ma suruhan mamboan surat tangan ni raja ai ampa kopala-kopalani maningtingkon hu sab Israel, ampa hu Juda, romban hubani na pinarentahkon ni raja ai, “Nasiam halak Israel, mulak ma nasiam hubani Jahowa, Naibata ni si Abraham, si Isak pakon si Israel, ase mulak Ia hubani jolma, simasima nasiam, na maluah humbani tangan ni raja Assur. [403]

⁷Ulang ma nasiam songon ompung ampa sanina nasiam na mardousa dompak Jahowa, Naibata ni ompung ni sidea, gabe iondoskon sidea hu hamagouan, songon na niidah nasiam nuan. [404]

⁸Ai pe, ulang ma pahengkeng nasiam uhur nasiam, songon na binahen ni ompung nasiam, tapi ondoskon nasiam ma diri nasiam bani Jahowa, anjaha roh ma nasiam hubani ianan hapansingon-Ni, na dob pinapansing-Ni ronsi sadokah ni dokahni, anjaha balosi nasiam ma Jahowa, Naibata nasiam, ase surut humbani nasiam pargajag ni ringis-Ni. [405]

⁹Ai anggo mulak nasiam bani Jahowa, jumpahan idop ni uhur ma sanina nasiam ampa anak nasiam humbani na mambuangkon sidea, anjaha mulak ma sidea hu tanoh on. Ai paridop ni uhur anjaha pardear layak do Jahowa, Naibata nasiam, anjaha seng anjai padaohon-Ni bohi-Ni humbani nasiam, anggo mulak nasiam hu Bani. [406]

¹⁰Jadi mardalan ma suruhan ai hun huta na sada hu huta na sada nari i tanoh Efraim pakon Manasse das hu Sebulon; tapi ipartawai halak do sidea anjaha iapasi. [407]

¹¹Otik do hansa halak hun Asser, Manasse ampa Sebulon, na paunduk uhurni anjaha roh hu Jerusalem.

¹²Tapi itumpaki tangan ni Jahowa do Juda, ibere do bani sidea sada ni uhur, laho mangkorjahon parentah ni raja ai ampa kopala-kopala ai, romban hubani hata ni Jahowa. [408]

¹³Jadi martumpu ma i Jerusalem buei tumang halak, laho mamestahon pesta ruti na so niigaran bani bulan dua; banggal tumang do tumpuan ai.

¹⁴Jadi marhorja ma sidea, anjaha ireongkon sidea ma anjapanjap na adong i Jerusalem, sonai homa anjapanjap panutungan ni dahupa iparpadaoh sidea do, ipanggijigkon hu habungan Kidron. [409]

¹⁵Dob ai isayat sidea ma biribiri Paskah bani ari sapuluh opat bulan dua. Jadi maila ma malim ampa halak Levi, iuras sidea ma dirini, laho mamboan galangan situtungon hubagas Rumah ni Jahowa. [410]

¹⁶Jadi jongjong ma sidea bani hajongjonganni bei hinan romban hubani titah ni si Musa, halak ni Naibata. Ipispiskon malim ai ma daroh ai, na jinalo ni sidea hun tangan ni halak Levi. [411]

¹⁷Ai buei do halak i tumpuan ai, na so manguras dirini ope, halani ai maningon sayaton ni halak Levi biribiri Paskah, laho manguras halak na so hona uras ope, ase pansing sidea bani Jahowa.

¹⁸Ai buei tumang do humbani na martumpu ai, sibueinan, ai ma hun Efraim, Manasse, Isasar ampa Sebulon, seng manguras ope; age sonai ipangan sidea do Paskah ai, seng romban hubani na tarsurat ai. Jadi martonggo ma si Hiskia mangapiti sidea, nini ma, “Pardear layak do Jahowa, sai marpangulaki ma uhur-Ni [412]

¹⁹mangidah halak na mangindahi humbani gok ni uhurni Naibata Jahowa, Naibata ni ompungni, age pe seng romban ai hubani pangurasion na sapatutni bani ianan na mapansing.” [413]

²⁰Jadi itangihon Jahowa do tonggo ni si Hiskia ai, anjaha ipamalum do bangsa ai. [414]

²¹Sonai ma halak Israel na martumpu i Jerusalem, marpesta ruti na so niigaran pitu ari dokahni ibagas malas ni uhur banggal; anggo halak Levi ampa malim, mamuji-muji Jahowa do ari-ari marhasoman hinsah ni uhur i lobei ni Jahowa. [415]

²²Jadi mangkatahon hata tarima kasih ma si Hiskia hubani halak Levi, na mandalankon horja ai bani Jahowa ibagas pantas ni uhur. Ipestahon sidea ma pesta ai pitu ari dokahni, ai ma marhitei na manggalangkon galangan pardameian ampa mamuji-muji Jahowa, Naibata ni ompung ni sidea. [416]

²³Dob ai mardos ni uhur ma ganup tumpuan ai, sihol marpesta ope pitu ari nari; saud ma sidea marpesta pitu ari nari ibagas malas ni uhur. [417]

²⁴Ai domma ilayak-layakkon si Hiskia, raja ni Juda, hubani tumpuan ai, saribu lombu jonggi pakon pitu ribu biribiri bahen sigalangkonon; anjaha kopala-kopala ai pe domma ilayak-layakkon hubani tumpuan ai saribu lombu jonggi ampa salaksa biribiri. Anjaha malim pe domma buei tumang na manguras dirini. [418]

²⁵Jadi marmalas ni uhur ma ganup tumpuan ni Juda, sonai homa malim, halak Levi, haganup tumpuan, na roh hun Israel, halak dagang, na roh hun Israel ampa halak dagang, na marianan i Juda. [419]

²⁶Masa do malas ni uhur banggal i Jerusalem; ai olat ni panorang ni si Salomo, anak ni si Daud, raja ni Israel, seng ongga masa sonai i Jerusalem. [420]

²⁷Dob ai jongjong ma malim ampa halak Levi mamasu-masu bangsa ai, anjaha itangihon Naibata do sora ni sidea, ai das do tonggo ni sidea ai bani ianan na mapansing i nagori atas. [421]