Read Batak Simalungun 2 KRONIKA 34 Bible Online

2 KRONIKA 34 - Batak Simalungun bible

2 KRONIKA 34

¹Marumur ualuh tahun do si Josia, sanggah na bangkit raja ai ia, anjaha tolu puluh sada tahun do dokahni ia manrajai i Jerusalem.

²Ihorjahon do rosuh ni uhur ni Jahowa, anjaha mardalan do ia bani dalan ni si Daud, ompungni ai; seng manirpang ia hu siamun barang hu sambilou. [471]

³Ai paualuh-tahunkon dob manrajai ia, sanggah poso ope ia, ipungkah ma mangindahi Naibata ni si Daud, ompungni ai, anjaha pasapuluhdua-tahunkon ipungkah ma manguras Juda ampa Jerusalem humbani panumbahan na i buntu-buntu, sisombahon Ashera ampa gana-gana na niuhir ampa na tinuang. [472]

⁴Ibolahi sidea do anjapanjap ni Baal i lobei ni raja ai; anjaha anjapanjap pardahupaan na i atas ni ai iparreongkon do, anjaha iropuki do sisombahon Ashera ampa gana-gana na niuhir ampa gana-gana na tinuang ai; ibahen ma ai gabe abuan anjaha itirtirhon ma hu atas ni tanoman ni halak na manggalang hujai. [473]

⁵Itutung do homa holi-holi ni malim i atas ni anjapanjap ni sidea ai. Sonai ma pangurupion pakon pangurasni bani Juda ampa Jerusalem. [474]

⁶Age huta-huta ni Manasse, Efraim, Simeon das hu Naptali, isiari ma ai inggot, [475]

⁷iparreong ma anjapanjapni, iropuki ma sisombahon Ashera ampa gana-gana, anjaha iroboh ma anjapanjap pardahupaan i sab tanoh ni Israel. Dob ai mulak ma ia hu Jerusalem. [476]

⁸Pasapuluhualuh-tahunkon dob manrajai ia, sanggah na manguras tanoh ampa rumah panumbahan ai ia, isuruh ma si Sapan, anak ni si Asalya, pakon si Maaseya, kopala ni huta ai, pakon si Joa, anak ni si Joahas, juru tulis ai, laho mangumban Rumah ni Jahowa, Naibatani ai. [477]

⁹Jadi das ma sidea bani si Hilkia, sintua ni malim ai, anjaha ipadas sidea ma bani duit, na binoan hu rumah ni Naibata, na pinatumpu-tumpu ni halak Levi, sijaga labah ai, humbani halak sima-sima ni Israel ampa humbani ganup Juda ampa Jerusalem.

¹⁰Ipadas sidea ma ai use bani tukang sipareksa Rumah ni Jahowa; anjaha sidea use mambere ai hubani halak na mangkorja i Rumah ni Jahowa, laho mangumban ampa patoguhkon rumah ai.

¹¹Ibere sidea do ai hubani tukang batu ampa tukang hayu, laho mamboli batu na binarbar ampa parhayu bahen tutup tiang pakon tiang bani rumah ai, ai ma sagala na pinaturut ni raja-raja Juda maseda. [478]

¹²Bujur bei do dalahi ai mangkorjahon horja ai. Ia kopalani ai ma: Si Jahat pakon si Obaja halak Levi ai humbani ginompar ni si Merari, pakon si Sakaria ampa si Mesulam humbani ginompar ni si Kahat, ai ma sipamareksa. Anjaha halak Levi, haganup sidea na pandei manjolom parugas musik, [479]

¹³sidea do kopala ni halak sipanarui ampa na mambobahon ganup halak sihorjahon horja na marbagei-bagei ai; adong do homa deba humbani halak Levi ai jurutulis, panuturi ampa sijaga horbangan. [480]

¹⁴Jadi dob ipadarat sidea duit, na binoan hu Rumah ni Jahowa, jumpah Malim Hilkia ma buku titah ni Jahowa, na ibere marhitei si Musa. [481]

¹⁵Dob ai nini si Hilkia ma hubani si Sapan, jurutulis ai, “Domma jumpah ahu buku titah ibagas Rumah ni Jahowa.” Ibere si Hilkia ma buku ai hubani si Sapan.

¹⁶Iboan si Sapan ma buku ai hubani raja ai, ambahni ai ipatugah ope hubani raja ai: Haganup na pinarentahkon hubani juakjuakmu, ihorjahon sidea do.

¹⁷Domma iuseihon sidea duit na jumpah ai ibagas Rumah ni Jahowa, anjaha domma ipadas ai hubani halak sipamareksa ampa siparhorja ai.

¹⁸Dob ai ipatugah si Sapan, jurutulis ai ma hubani raja ai, “Ibere Malim Hilkia do bangku sada buku.” Jadi ibasa si Sapan ma buku ai i lobei ni raja ai.

¹⁹Jadi dob ibogei raja ai hata ni buku titah ai, irigati ma pakeianni.

²⁰Dob ai ihatahon raja ai ma hubani si Hilkia pakon si Ahikam, anak ni si Sapan, pakon si Abdan, anak ni si Mika, pakon si Sapan jurutulis ai, pakon si Asaya, juakjuak ni raja ai, nini ma, [482]

²¹“Laho ma nasiam, sungkun nasiam ma Jahowa pasal ahu ampa pasal jolma na tading i Israel ampa i Juda, pasal hata ni buku na jumpah ai, ai banggal tumang do ringis ni Jahowa na niuseihon-Ni banta, halani na so ihorjahon ompungta hata ni Jahowa, sihorjahononkon namin romban hubani sagala na tarsurat ibagas buku on.”

²²Dob ai laho ma si Hilkia rap pakon na sinuruh ni raja ai, marayak nabi naboru, si Hulda, parinangon ni si Salum, anak ni si Tokhat, anak ni si Hasra, sijaga pakeian. Tapi marianan do si Hulda i Jerusalem bani ianan ni naboru ai, jadi marsahap ma sidea pasal ai hu bani. [483]

²³Dob ai nini si Hulda ma dompak sidea, “Sonon do hata ni Jahowa, Naibata ni Israel, “Patugah nasiam ma hubani dalahi na marsuruh nasiam marayak ahu:

²⁴Sonon do hata ni Jahowa: Tonggor ma, parohon-Ku ma hamagouan hu huta on pakon hubani pangisini ai, romban hubani haganup papa-papa na tarsurat ibagas buku ai, ai ma na dob binasa i lobei ni raja ai. [484]

²⁵Halani na tinadingkon ni sidea ai Ahu, anjaha manutung dahupa sidea hubani naibata na legan, laho mamuhoi ringis-Hu marhitei haganup pambahenan ni tangan ni sidea ai, halani ai maningon useihonon-Ku do ringis-Ku hu ianan on, anjaha seng be tarintopi. [485]

²⁶Tapi anggo dompak raja ni Juda na marsuruh nasiam laho manungkun Jahowa, sonon ma hatahon nasiam hu bani, ʻSonon do hata ni Jahowa, Naibata ni Israel: Ia pasal hata na dob binogeimu ai,

²⁷halani na dob mangahap uhurmu, anjaha ipaunduk ho uhurmu i lobei ni Naibata, dob ibogei ho hata na nilumbahon-Ni ai dompak huta on ampa dompak pangisini ai, anjaha ipaunduk ho do uhurmu i lobei ni bohing-Ku, irigati ho hioumu anjaha tangis ho i lobei-Hu, Ahu pe domma Hutangihon ho,ʼ nini Jahowa. [486]

²⁸Tonggor ma, patumpuon-Ku ma ho hubani ompungmu, ase marsonang-sonang ho patumpuonni hubagas tanomanmu, anjaha seng sampang idahon ni matamu ai, haganup hamagouan na sihol parohon-Ku hu huta on ampa hubai pangisini ai.” Jadi iboan sidea ma balos ai bani raja ai.

²⁹Dob ai isuruh raja ai ma na patumpuhon haganup partua ni Juda ampa Jerusalem.

³⁰Dob ai tangkog ma raja ai hu Rumah ni Jahowa, rap pakon haganup dalahi ni Juda ampa pangisi ni huta Jerusalem, malim-malim ampa halak Levi, haganup bangsa ai na banggal ampa na etek; anjaha ibasa ma itangar sidea haganup hata ni Buku Parpadanan, na jumpah ibagas Rumah ni Jahowa.

³¹Dob ai jongjong ma raja ai bani iananni ai, anjaha ibahen ma parpadanan i lobei ni Jahowa, paboa maningon irikkononkon Jahowa anjaha ramotkonon parentah-Ni, hasaksian-Ni ampa tonah-Ni humbani gok ni uhurni ampa humbani gok ni tonduyni, laho mandalankon hata ni parpadanan ai, na tarsurat ibagas buku ai. [487]

³²Dob ai ihatahon raja ai ma jongjong laho mangundukkon parpadanan ai haganup halak na adong i Jerusalem ampa i Benjamin. Jadi ibahen pangisi ni Jerusalem ma romban hubani hata ni parpadanan ni Naibata ni ompung ni sidea. [488]

³³Dob ai ipadaoh si Josia ma haganup sihagigihononkon humbani ganup nagori na niianan ni halak Israel, anjaha ibahen ma haganup jolma na adong i Israel, mambalosi bani Jahowa, Naibata ni sidea. Jadi sadokah manggoluh raja ai, seng surut sidea humbani Jahowa, Naibata ni ompung ni sidea. [489]