Read Batak Simalungun 2 KRONIKA 36 Bible Online

2 KRONIKA 36 - Batak Simalungun bible

2 KRONIKA 36

¹Dob ai roh ma bangsa pangisi ni nagori ai, ibuat sidea ma si Joahas, anak ni si Josia, ipabangkit ma ia gabe raja i Jerusalem, gantih ni bapani ai. [509]

²Marumur dua puluh tolu tahun do si Joahas, sanggah na bangkit raja ai ia, anjaha tolu bulan do dokahni manrajai i Jerusalem.

³Ai ipaturun raja ni Masir do ia i Jerusalem, anjaha idonda do isi ni tanoh ai saratus talenta pirak ampa sada talenta omas.

⁴Dob ai ipabangkit raja ni Masir ma si Eliakim, anggini ai, gabe raja manggomgom Juda ampa Jerusalem, anjaha iubah ma goranni gabe si Joyakim, tapi anggo si Joahas abangni ai, iboan Raja Neko do ia hu tanoh Masir.

⁵Marumur dua puluh lima tahun do si Joyakim, sanggah na bangkit ia gabe raja, anjaha sapuluh sada tahun do ia manrajai i Jerusalem; ihorjahon do sogam ni uhur ni Jahowa, Naibatani.

⁶Dob ai tangkog ma si Nebukadnesar, raja ni Babel, mangimbangsi, irantei ma ia, laho mamboansi hu Babel. [510]

⁷Iboan si Nebukadnesar do deba humbani parugas na i Rumah ni Jahowa, anjaha inahkon hubagas rumahni i Babel. [511]

⁸Barita na legan ai ope pasal si Joyakim, ampa hasamboron na binahenni ai, ampa hajahaton na legan na jumpah bani, tonggor ma, tarsurat do ai ibagas buku Barita ni Raja-raja Israel ampa Juda. Jadi si Joyakin, anakni ai ma bangkit raja manggantihsi. [512]

⁹Marumur sapuluh ualuh tahun do si Joyakin, sanggah na bangkit raja ai ia, anjaha tolu bulan sapuluh ari do dokahni manrajai i Jerusalem; ihorjahon do sogam ni uhur ni Jahowa. [513]

¹⁰Tapi marayak bona ni tahun, isuruh Raja Nebukadnesar ma suruhanni mamboansi hu Babel rap pakon parugas na maharga, na adong i Rumah ni Jahowa, anjaha ipabangkit ma si Sedekia, sanina ni bapani, gabe raja manggomgom Juda ampa Jerusalem. [514]

¹¹Marumur dua puluh sada tahun ma si Sedekia, sanggah na bangkit raja ai ia, anjaha sapuluh sada tahun do dokahni manrajai i Jerusalem. [515]

¹²Ihorjahon do sogam ni uhur ni Jahowa, Naibatani, anjaha seng ipaunduk dirini i lobei ni Nabi Jeremia na padaskon hata ni Jahowa bani. [516]

¹³Ambahni ai manlawan do ia dompak Raja Nebukadnesar, na dob pabijahonsi hubani Naibata; ipahengkeng do uhurni, ase ulang mulak bani Jahowa, Naibata ni Israel. [517]

¹⁴Sonai homa kopala-kopala ni malim ampa halak na mabuei ai, seng dong na bujur humbani sidea, ihorjahon sidea do hasamboron ni bangsa-bangsa sipajuh begu-begu, ibutaki sidea do Rumah ni Jahowa, na pinapansing-Ni i Jerusalem. [518]

¹⁵Girah anjaha gati do namin isuruh Jahowa, Naibata ni ompung ni sidea, palumbahon sidea marhitei suruhan-Ni, ai harga do bangsa-Ni pakon rumah ianan ai bani uhur-Ni, [519]

¹⁶hape iapasi sidea do suruhan ni Naibata, teos uhurni bani hata sipaingat-Ni anjaha ipartawai nabi-Ni; gabe gajak tumang ma ringis ni Jahowa hubani bangsa-Ni, seng tartambari be. [520]

¹⁷Halani ai, ihatahon Jahowa ma tangkog raja ni halak Kaldea mandorab sidea, mamunuh anak garama ni sidea marhitei podang ibagas rumah panumbahan ni sidea na mapansing ai, anjaha seng maralang-alang ia mangidah anak boru pakon garama, na matua barang na ubanon; haganup do sidea ipadas hubagas tanganni. [521]

¹⁸Anjaha ganup parugas i Rumah ni Naibata, na banggal atap na etek, ampa arta na i Rumah ni Jahowa, age na i rumah ni raja ai ampa kopala-kopalani, haganupan ai tarboan do hu Babel. [522]

¹⁹Itutung sidea do Rumah ni Naibata, anjaha iparreong tembok ni Jerusalem; isurbuy do ganup rumah-rumah na banggal na ijai ai bani apuy, anjaha iparseda ganup parugasni na maharga. [523]

²⁰Anjaha sagala na maluah humbani podang ibuangkon do hu Babel, gabe jabolon bani raja ai ampa anakni, das hubani parjongjong ni Harajaon Parsi, [524]

²¹laho pasaudkon ganup hata ni Jahowa marhitei pamangan ni si Jeremia, paima ipasuang bani tanoh ai ganup tahun Sabatni; ai sadokah na tarulang ai, marsaran do tanoh ai, laho manggoki sipitu puluh tahun ai. [525]

²²Tapi bani tahun na parlobei, dob manrajai si Kores, raja ni Parsi, ase sintong saud hata ni Jahowa marhitei pamangan ni si Jeremia, ipuhoi Jahowa ma tonduy ni si Kores, raja ni Parsi, maningtingkon hu sab gomgomanni, pala marhasoman surat ibahen: [526]

²³Sonon do hata ni si Kores, raja ni Parsi, “Domma ondos hu bangku ganup harajaon na i tanoh on, ibere Jahowa Naibata na i surga, anjaha isuruh do ahu pajongjong sada rumah Bani i Jerusalem, na i tanoh Juda. Barang ise humbani nasiam, na masuk hubani bangsa-Ni, sai ihasomani Jahowa, Naibatani ai ma ia.” Tangkog ma ia! [527]