Read Batak Simalungun 2 KRONIKA 4 Bible Online

2 KRONIKA 4 - Batak Simalungun bible

2 KRONIKA 4

¹Ipauli do homa sada anjapanjap tombaga, dua puluh asta ganjangni, dua puluh asta bolagni anjaha sapuluh asta gijangni. [30]

²Dob ai ipauli ma laut tuangan ai; gemong do ai, sapuluh asta hun bibir na sada hu na sada nari, gijangni lima asta, anjaha tolu puluh asta do ganjang ni panlilitini inggot. [31]

³Anjaha i toruh ni bibirni ai adong do gambaran ni lombu, tolu puluh asta ganjangni, inggot laut ai; dua baris do lombu ai, rap ituang pakon laut tuangan ai.

⁴Jongjong do ai i atas ni sapuluh dua lombu, tolu mandompakkon utara, tolu mandompakkon hasundutan, tolu mandompakkon dangsina, tolu mandompakkon hapoltakan; i atas ni lombu ai do inahkon laut tuangan ai, anjaha dompak bagas do ihur ni lombu ai.

⁵Ia hapalni santopak do; bibirni ai songon bibir ni panginuman do, songon bunga ni silundat, siat do ijai tolu ribu bat. [32]

⁶Ipauli do homa sapuluh tong parburihan, anjaha inahkon ma ai lima hampit siamun, lima hampit sambilou, ijai ma iburihi sidea sipakeion bani galangan situtungon; ia laut ai bahen parburihan ni malim do.

⁷Ipauli do homa sapuluh parpalitaan omas, mardomu hubani na dob niaturhon hinan, anjaha inahkon ma ai hubagas rumah panumbahan ai, lima hampit siamun anjaha lima hampit sambilou. [33]

⁸Ipauli do homa sapuluh meja, anjaha inahkon ma ai hubagas rumah panumbahan ai, lima hampit siamun anjaha lima hampit sambilou. Ipauli do homa saratus mangkuk pangurasan omas. [34]

⁹Ipadear do homa alaman bani malim ampa alaman bolag, sonai homa labah laho hu alaman ai ipauli do, anjaha ilampis ma ai bani tombaga. [35]

¹⁰Ia laut ai inahkon do ai hampit suhi-suhi paranggoni ni rumah ai.

¹¹Ipauli si Huram do homa hudon, suyuk-suyuk ampa mangkuk pangurasan. Jadi salosei ma ibahen si Huram horja silahoanni ai bani Raja Salomo pasal Rumah ni Naibata: [36]

¹²Na dua tiang ai ampa na dua ulu na i atas ni tiang na dua ai; na dua jala-jala ai, na manrungkub na dua ulu na i atas ni tiang ai;

¹³siompat ratus buah ni dalima, na bani jala-jala na dua ai, dua baris buah dalima bani sada jala-jala, bahen panrungkub ni ulu na dua i atas ni tiang na dua ai.

¹⁴Ipauli do homa panatang ampa tong na i atas ni ai,

¹⁵pakon laut na sada ai, ampa lombu sisapuluh dua na i toruh ni ai.

¹⁶Sonai homa hudon, suyuk-suyuk pakon garpu ampa haganup parugas na masuk hujai ipauli si Huram-Abi humbani tombaga bani Raja Salomo, ai ma haporluan bani Rumah ni Jahowa. [37]

¹⁷Bani pamah ni Jordan do isuruh raja ai tuangon ai bani tuangan na humbani tanoh halampung, i holang-kolang ni Sukot pakon Sartan. [38]

¹⁸Buei tumang do parugas na pinauli ni si Salomo ai, pala seng tartimbang borat ni tombaga ai. [39]

¹⁹Ihatahon si Salomo do homa paulihon ganup parugas na i Rumah ni Naibata; anjapanjap omas, meja ni ruti sigalangkonon ai, [40]

²⁰parpalitaan ai ampa palitani humbani omas pitah, sipagaraon i lobei ni kamar na pansing sahalian ai, songon na dob tinonahkon hinan,

²¹pakon bungani, palitani ampa rasipni humbani omas pitah;

²²ambah ni ai pisou, mangkuk pangurason, pinggan pardahupaan, ampa balanga parapuyan humbani omas pitah; sonai homa engsel ni rumah ai, na bani labah parbagas laho hu kamar na pansing ai pakon na bani labah ni kamar na pansing ai humbani omas do.