Read Batak Simalungun 2 KRONIKA 5 Bible Online

2 KRONIKA 5 - Batak Simalungun bible

2 KRONIKA 5

¹Jadi saloseihonsi ganup horja, na hinorjahon ni si Salomo bani Rumah ni Jahowa, iboan si Salomo ma hubagas ganup parugas, na dob niuras ni bapani, si Daud, anjaha inahkon ma pirak, omas ampa haganup parugas ai hu kamar parartaan ni Rumah ni Naibata. [41]

²Dob ai ipatumpu si Salomo ma pangintuai ni halak Israel pakon ganup pambobai ni halak Israel mar sasamarga ampa pambobai ni mar sasaompung hu Jerusalem, laho mamboan tangkog poti parpadanan ni Jahowa hun huta ni si Daud, ai ma Sion. [42]

³Jadi martumpu ma hu lobei ni raja ai sagala dalahi i Israel bani ari pesta na bani bulan pitu. [43]

⁴Jadi dob roh ganup pangintuai ni Israel, iangkat halak Levi ma poti parpadanan ai, [44]

⁵iboan sidea ma poti ai tangkog pakon lampolampo partumpuan ai ampa ganup parugas na mapansing, na i lampolampo ai hinan. Iusung malim ampa halak Levi ma ai tangkog.

⁶Tapi anggo Raja Salomo ampa ganup tumpuan ni halak Israel ai, na martumpu i lambungni, jongjong do i lobei ni poti ai, anjaha manggalangkon biribiri ampa lombu, sonai ma bueini, pala lang tarbilang barang taretong.

⁷Jadi das ma iboan malim ai poti parpadanan ni Jahowa hubani iananni, hubagas kamar parpudi ni rumah panumbahan ai, ai ma hubagas kamar na pansing sahalian ai, hu toruh ni habong ni Herub na dua ai, [45]

⁸anjaha ipaherbang Herub ai do habongni na dua ai hu babou ni hajongjongan ni poti ai, lanjar irungkub Herub ai do poti ai ampa lanja-lanjani.

⁹Sonai ma ganjang ni lanja-lanjani ai, pala boi idahon ujungni hun kamar na mapansing ai, i lobei ni kamar parpudi ai; tapi anggo hun darat seng taridah. Lanjar ijai do ai ronsi sadari on.

¹⁰Seng dong atap aha ibagas poti ai, sobali na dua batu panuratan ai, na ninahkon ni si Musa hujai sanggah i Horeb, sanggah na marpadan Jahowa hubani halak Israel, sanggah na luar sidea hun tanoh Masir. [46]

¹¹Tapi sanggah na luar ai malim ai hun kamar na mapansing ai, haganup malim na ijai ai domma manguras bei hinan, seng mangihutkon parbagiananni bei, [47]

¹²sonai homa pandoding na humbani halak Levi, si Asap, si Heman, si Jedutun, anak ni sidea ampa sanina ni sidea, jongjong do sidea haganup, marpakeian hiou silopak na alus, anjaha manjolom tambur, arbap ampa husapi hampit hapoltakan ni anjapanjap ai, anjaha saratus dua puluh malim na manompul tarompit.

¹³Anjaha sanggah na manompul tarompit ampa na mandoding ai sidea, songon sada sora do ai bogeion, laho mamuji ampa mangkatahon tarima kasih bani Jahowa; anjaha sanggah na tarbogei doding ai, marhasoman tarompit, arbap pakon parsora na laingan na legan, bahen puji-pujian bani Jahowa, “Ai pardear layak do Ia, ai ronsi sadokah ni dokahni do idop ni uhur-Ni, jadi gok ma Rumah ni Jahowa ai ibahen hombun, [48]

¹⁴gabe seng be tahan malim ai jongjong marugas ibahen hombun ai; ai hamuliaon ni Jahowa do manggoki Rumah ni Naibata. [49]