Read Batak Simalungun ESRA 1 Bible Online

ESRA 1 - Batak Simalungun bible

ESRA 1

¹Bani tahun parlobei ni panrajaion ni si Kores, raja ni Persia, ase saud masa hata ni Jahowa marhitei pamangan ni si Jeremia, ipuhoi Jahowa ma tonduy ni si Kores, raja ni Persia, ase isuruh maningtingkon hu sab gomgomanni, pala marhasoman surat ai ibahen. [1]

²Sonon do hata ni si Kores, raja ni Persia, “Domma ondos bangku ganup harajaon ni tanoh on ibere Jahowa, Naibata ni nagori atas, anjaha Ia do marsuruh ahu pajongjong Bani sada rumah i Jerusalem, na i tanoh Juda. [2]

³Barang ise humbani nasiam, na masuk bani bangsa-Ni ai, sai ihasomani Naibatani ma ia, anjaha laho ma ia tangkog hu Jerusalem, na i tanoh Juda, ase ipajongjong rumah ni Jahowa, Naibata ni Israel; Ia do Naibata na marianan i Jerusalem. [3]

⁴Anjaha barang ise na tading ope bani haganup ianan panginsolatanni ai, songon halak dagang, iurupi ma hasomanni na saianan ai marhitei pirak, omas, ugas-ugas pakon pinahan, legan ni sibere-bere niojur ni uhur bani rumah ni Naibata, na i Jerusalem.” [4]

⁵Dob ai jongjong bei ma kopala-kopala ni Juda pakon Benjamin mar sasaompung, sonai homa malim ampa halak Levi, ganup na pinuhoan ni Naibata tonduyni tangkog, laho pajongjong rumah ni Naibata na i Jerusalem; [5]

⁶anjaha ganup jolma na marianan inggot sidea mangurupi sidea marhitei parugas pirak, omas, ugas-ugas, pinahan pakon arta na maharga, sobali ganup sibere-bere niojur ni uhur. [6]

⁷Ipadarat Raja Kores ma homa parugas ni rumah ni Jahowa, na dob binoan ni si Nebukadnesar hun Jerusalem, anjaha na ninahkonni hubagas rumah ni naibatani. [7]

⁸Ihatahon si Kores, raja ni Persia ai do padaraton ni si Miteridat, siramotkon arta ai, anjaha ia mamilangi ai hubani si Sesbasar, kopala ni halak Juda. bd. [8]

⁹Anjaha on ma bilanganni ai: Tolu puluh pinggan omas, saribu pinggan pirak, dua puluh siah pisou,

¹⁰tolu puluh panginuman omas, ompat ratus sapuluh panginuman pirak ampa parugas na legan saribu. [9]

¹¹Ganup parugas omas pakon pirak lima ribu ompat ratus do. Haganupan ai iboan si Sesbasar tangkog, sanggah na tarboan ai na tarbuang ai tangkog hun Babel hu Jerusalem. [10]