Read Batak Simalungun ESRA 3 Bible Online

ESRA 3 - Batak Simalungun bible

ESRA 3

¹Jadi dob jumpah bulan pitu, anjaha marianan ibagas hutani bei halak Israel, martumpu ma bangsa ai ris hu Jerusalem. [21]

²Jadi jongjong ma si Jesua, anak ni si Josadak, rap pakon saninani malim-malim ai, ampa si Serubabel, anak ni si Sealtiel, rap pakon saninani, anjaha ipauli sidea ma anjapanjap panggalangan bani Naibata ni Israel, laho manggalangkon i atas ni galangan situtungon, songon na tarsurat ibagas buku titah ni si Musa, halak ni Naibata. [22]

³Jadi ipajongjong sidea ma anjapanjap ai bani iananni hinan tapi marmunsuh-munsuh do sidea dompak bangsa-bangsa ni nagori ai, anjaha igalangkon sidea ma galangan situtungon i atas ni hubani Jahowa, galangan situtungon sogod pakon bodari. [23]

⁴Marpesta lampolampo do sidea homa, songon na tarsurat ai, anjaha igalangkon sidea do galangan situtungon siganup ari mangihutkon bilanganni, romban hubani aturan hinan bueini ganup ari, [24]

⁵ambahni ai galangan situtungon siganup ari, galangan bani poltak ni bulan ampa bani ganup pesta, na dob tinontuhon bani Jahowa, pakon galangan ni ganup halak, na binagahkonni humbani rosuh ni uhurni hubani Jahowa. [25]

⁶Olat ni ari sada bulan pitu ipungkah sidea ma manggalangkon galangan situtungon hubani Jahowa. Tapi seng ipajongjong ope anggo rumah ni Jahowa. [26]

⁷Halani ai ibere ma duit hubani tukang batu pakon tukang hayu ampa sipanganon, siinumon pakon minak hubani halak Sidon ampa Tirus, ase iboan sidea hayu ares hun Libanon hu laut, ai ma hu Joppe, romban hubani parentah ni si Kores, raja ni Persia, hubani sidea. [27]

⁸Tapi padua-tahunkon dob das sidea hu rumah ni Naibata i Jerusalem, bani bulan dua, ipungkah si Serubabel, anak ni si Sealtiel ma horja ai rap pakon si Jesua, anak ni si Josadak, ampa na tading humbani sanina ni sidea, ai ma malim pakon halak Levi ampa haganup na dob mulak hun habuangan hu Jerusalem. Ipabangkit sidea ma halak Levi olat ni na marumur dua puluh tahun hu atas mardimata horja ai i rumah ni Jahowa. [28]

⁹Jongjong do homa ijai si Jesua rap pakon anakni ampa saninani pakon si Kadmiel ampa anakni, ampa halak Juda, rap mardimata siparhorja i rumah ni Naibata, rap pakon anak ni si Henadad ampa halak Levi, anak ni sidea ampa sanina ni sidea. [29]

¹⁰Jadi dob itibalhon tukang batu onjolan ni rumah ni Jahowa, jongjong ma malim marpakeian bei pajolom-jolom tarompit, pakon halak Levi, ginompar ni si Asap, marhasoman parugas, laho mamuji-muji Jahowa, romban hubani aturan, na binahen ni si Daud, raja ni Israel. [30]

¹¹Jadi mandoding ma sidea marsibalos-balosan mamuji ampa mangkatahon tarima kasih hubani Jahowa, ai pardear layak do Ia, anjaha ronsi sadokah ni dokahni do idop ni uhur-Ni mangidah Israel. Jadi ipagogoh bangsa ai ma sorani, laho mamuji-muji Jahowa, halani na dob itibalhon batu onjolan ni rumah ni Jahowa ai. [31]

¹²Tapi buei do humbani malim pakon halak Levi ampa kopala ni mar sasaompung, halak partua-partua, na sampang mangidah rumah panumbahan na parlobei ondi, na tangis gogoh-gogoh, dob ididah sidea itibalhon batu onjolan ni rumah panumbahan ai; tapi buei do halak na pagogoh sorani marolob-olob humbani malas ni uhurni, [32]

¹³gabe seng tarsirang sora olob-olob, malas ni uhur humbani sora tangis-tangis ni bangsa ai, ai gogoh tumang do sora ni bangsa ai marolob-olob, pala tarbogei sora ai humbani na daoh. [33]