Read Batak Simalungun ESRA 5 Bible Online

ESRA 5 - Batak Simalungun bible

ESRA 5

¹Tapi anggo Nabi Haggai pakon Sakaria, anak ni si Iddo, manjahai ma sidea marhitei goran ni Naibata ni Israel, simada sidea ai, hubani halak Juda, na i tanoh Juda pakon Jerusalem [48]

²Jadi marugas ma si Serubabel, anak ni si Sealtiel, pakon si Jesua, anak ni si Josadak, gabe ipungkah sidea ma use pajongjongkon rumah ni Naibata na i Jerusalem; nabi ni Naibata do hasoman ni sidea, na patengerhon uhur ni sidea. [49]

³Lanjar bani panorang ai roh ma marayak sidea si Tatnai, panrajai i nagori, na i dipar ni bah banggal ai, pakon si Setarbosnai ampa hasoman ni sidea ai, nini ma dompak sidea, “Ise marsuruh nasiam pajongjong rumah panumbahan on ampa mandobkon tembokni in?

⁴Anjaha ise do goran-goran ni halak na pajongjongkon rumah panumbahan in?” [50]

⁵Tapi itatap panonggor ni Naibata ni sidea do pangintuai ni halak Juda, gabe seng ilanglangi sidea, paima das pangaduan ai hubani si Darius, anjaha roh balosni marhitei surat. [51]

⁶Salinan ni surat ni si Tatnai, panrajai i nagori, na i dipar ni bah banggal ai, pakon si Setarbosnai ampa hasoman ni sidea panrajai i nagori na i dipar ni bah banggal ai, na tinongos ni sidea hubani Raja Darius, [52]

⁷itongos sidea ma bani lapuran, sonon ma tarsurat ijai, “Bani Raja Darius, damei ma bamu!

⁸Na pabotohkon ma hanami hubani raja in, ia hanami domma laho hu tanoh Juda, hu rumah ni Naibata na banggal in. Ipajongjong do nuan ai humbani batu na banggal-banggal, anjaha ilampis bani hayu; jorei do mardalan horja ai anjaha manjadi marhitei tangan ni sidea.

⁹Domma isungkuni hanami pangintuai ai, anjaha ihatahon hanami sonon bani sidea, ʻIse marsuruh nasiam pajongjong rumah panumbahan on anjaha mandobkon tembokni in?ʼ

¹⁰Isungkun hanami do homa goran-goran ni sidea, sipabotohkononnami bamu; halani ai do ase isuratkon hanami goran-goran ni dalahi, na mambobahon sidea.

¹¹Tapi on do balos ni sidea bennami, ʻJabolon ni Naibata sigomgom langit pakon tanoh on do hanami, anjaha na mangulaki do hanami pajongjongkon rumah panumbahan on, na dob pinauli hinan sapari, ai ma na pinauli anjaha na nidobkon ni sada raja ni Israel na sangap. [53]

¹²Tapi halani ipuhoi ompungnami ringis ni Naibata sigomgom langit, gabe iondoskon ma sidea hubagas tangan ni si Nebukadnesar, raja ni Babel, halak Kasdim, na parsedahon rumah panumbahan on, anjaha bangsa in ibuangkon do hu Babel. [54]

¹³Tapi bani tahun parlobei ni panrajaion ni si Kores, raja ni Babel, iparentahkon si Kores ma, ase ipajongjong rumah panumbahan on bani Naibata. [55]

¹⁴Age parugas omas pakon pirak, na ibuat si Nebukadnesar hun rumah panumbahan na i Jerusalem, anjaha na binobanni hu rumah panumbahan na i Babel, ipadarat raja Kores ma ai hun rumah panumbahan na i Babel, anjaha ibere hubani sada halak, na margoran si Sesbasar, na dob niangkatni gabe panrajai. [56]

¹⁵Nini ma dompaksi, “Buat ma parugas on, nahkon ma in hu rumah panumbahan na i Jerusalem, anjaha hatahon ma, ase ipajongjong use rumah ni Naibata bani hajongjonganni hinan.”

¹⁶Jadi roh ma si Sesbasar ai, ipatibal ma batu onjolan ni rumah ni Naibata na i Jerusalem; anjaha olat ni panorang ai ronsi sonari marnunut do ipauli, tapi seng ope dob.

¹⁷Ai pe, anggo dear do ninuhur ni raja in, ihatahon ma na mamareksai arsip harajaon na i Babel, laho mangidah atap na tongon do iparentahkon Raja Kores, pajongjongon use rumah ni Naibata i Jerusalem, anjaha itongoskon raja in ma bennami haputusanni pasal on.ʼ ” [57]