Read Batak Simalungun ESRA 6 Bible Online

ESRA 6 - Batak Simalungun bible

ESRA 6

¹Dob ai iparentahkon Raja Darius ma, ase ibahen pamareksaan i Babel, i rumah arsip, ianan panimpanan ni surat-surat pardingatan, [58]

²jadi jumpah ma i Akmeta, i benteng na i tanoh Madai, sada surat na margulung, sonon do hata na tarsurat ijai,

³“Bani tahun parlobei ni panrajaion ni Raja Kores, iparentahkon Raja Kores ma pasal rumah ni Naibata na i Jerusalem. Maningon pajongjongon do rumah panumbahan ai use bani iananni, bahen panggalangan ni galangan sisayaton pakon galangan situtungon; onom puluh asta do bahenon gijangni anjaha onom puluh asta ia bolagni; [59]

⁴marbatu na binarbar tolu ristei anjaha hayu sanristei; harugian hujai hun kas harajaon do buaton. [60]

⁵Ambahni ai homa parugas omas pakon pirak na hun rumah ni Naibata hinan, na binuat ni si Nebukadnesar hun rumah panumbahan na i Jerusalem, anjaha binobanni hu Babel, maningon paulakon do, pasuangon hu rumah panumbahan na i Jerusalem, hubani iananni hinan; maningon hu rumah ni Naibata do ai nahkonon. [61]

⁶Halani ai, ham alo Tatnai, panrajai i tanoh, na i dipar ni bah banggal, pakon si Setarbosnai, na i dipar ni bah banggal, padaoh ma dirimu hunjai; [62]

⁷paturut ma mardalan horja na bani rumah panumbahan ai; paturut ma panrajai ni Juda pakon pangintuai ni halak Juda pajongjongkon rumah ni Naibata bani hajongjonganni hinan.

⁸Ambahni ai domma huparentahkon pasal sibahenon nasiam hubani pangintuai ni halak Juda, laho pajongjongkon rumah ni Naibata; harugian hujai, sigalaron hubani halak ai, gok ma anjaha seng mutir-mutir, buaton humbani arta ni harajaon, ai ma humbani pandapotan ni nagori, na i dipar ni bah banggal. [63]

⁹Anjaha atap aha na porlu: Lombu poso-poso, biribiri tunggal, anak ni biribiri sigalangkonon bani Naibata sigomgom langit, gandum, garam, anggur atap minak, sibereon ma ai hubani sidea domu hubani pangkatahon ni malim na i Jerusalem, siap arian, ulang marnarotap,

¹⁰ase tarbahen sidea manggalangkon galangan na misbou bani Naibata sigomgom langit, lanjar mangindo parhorasan bani raja in ampa bani anakni. [64]

¹¹Ambahni ai on ope parentah humbangku; atap ise na mangubah haputusan on, maningon buaton ma sada tiang humbani rumahni, anjaha hujai ma ia gantungkononni, anjaha rumahni ai gabe panimbunan ni tompoh-tompoh bahenon. [65]

¹²Tapi anggo Naibata, na mambahen jonam goran-Ni ijai, sai ipantunggalingkon ma raja atap bangsa, na pag mardas tangan, laho mangubah atap parseda rumah ni Naibata na i Jerusalem. Ahu, Raja Darius do na mambahen parentah on; podas ma ipasaud on.” [66]

¹³Jadi podas ma ipasaud si Tatnai, panrajai na i dipar ni bah banggal, pakon si Setarbosnai ampa hasoman ni sidea parentah ai, romban hubani hata, na hinatahon ni Raja Darius.

¹⁴Jadi mintor itoruskon pangintuai ni halak Juda ma pajongjongkon ai, anjaha dob ma, romban hubani hata ni Nabi Haggai pakon Sakaria, anak ni si Iddo. Dob do ibahen sidea horja ai, romban hubani hata ni Naibata ni Israel, romban hubani parentah ni si Kores pakon si Darius ampa si Artasasta, raja ni Persia. [67]

¹⁵Jadi dob ma rumah panumbahan ai ari tolu bulan Adar, paonom-tahunkon dob manrajai Raja Darius. [68]

¹⁶Dob ai marpesta ma halak Israel, malim, halak Levi, ampa halak na legan, na mulak hun habuangan, laho mangondoskon rumah panumbahan ai hubani Naibata marhasoman malas ni uhur. [69]

¹⁷Sanggah na mangondoskon rumah panumbahan ai sidea bani Naibata, igalangkon sidea ma saratus lombu tunggal, dua ratus biribiri tunggal, ompat ratus anak ni biribiri, anjaha sapuluh dua hambing tunggal bahen galangan pardousaon, mangihutkon bilangan ni marga ni halak Israel. [70]

¹⁸Anjaha iranggi sidea ma malim ai mangihutkon horin ni sidea, anjaha halak Levi ai mangihutkon horin ni sidea hubani horja parsombahon bani Jahowa i Jerusalem, romban hubani na tarsurat ibagas buku ni si Musa. [71]

¹⁹Anjaha bani ari sapuluh ompat bulan sada marpesta Paskah ma halak na mulak hun habuangan ai. [72]

²⁰Ai domma iuras malim pakon halak Levi diri ni sidea bei; ganup do sidea pansing. Jadi isayat sidea ma biribiri Paskah ai hubani ganup halak na mulak hun habuangan ai, hubani sanina ni sidea, malim ai, ampa hubani sidea sandiri. [73]

²¹Jadi ipangan halak Israel, na mulak hun habuangan ai ma ai, sonai homa ganup halak na papulig dirini humbani habutakon ni bangsa sipajuh begu-begu, na i nagori ai, laho manombah Jahowa, Naibata ni Israel. [74]

²²Anjaha marpesta ruti na so niigaran ma sidea pitu ari dokahni marhasoman malas ni uhur; ai domma ipasurdung Jahowa uhur ni raja Assur dompak sidea, gabe itumpaki sidea ibagas horja bani rumah ni Naibata, ai ma Naibata ni Israel.”