Read Batak Simalungun ESRA 8 Bible Online

ESRA 8 - Batak Simalungun bible

ESRA 8

¹On do goran ni kopala ni sidea mar sasaompung pakon tarombo ni sidea, na tangkog rap pakon ahu hun Babel, sanggah panrajaion ni Raja Artasasta. [92]

²Humbani ginompar ni si Pinehas si Gersom; humbani ginompar ni si Itamar si Daniel; humbani ginompar ni si Daud si Hattus,

³anak ni si Sekanya; humbani ginompar ni si Paros: Si Sakaria rap pakon dalahi hasomanni saompung, saratus lima puluh halak bueini; [93]

⁴humbani ginompar ni si Pahat-Moab: Si Elioenai, anak ni si Seraya, rap pakon hasomanni, dua ratus halak dalahi; [94]

⁵humbani ginompar ni si Sattu: Si Sekanya, anak ni si Jehasiel, rap pakon hasomanni, tolu ratus dalahi; [95]

⁶humbani ginompar ni si Adin: Si Ebed, anak ni si Jonatan, rap pakon hasomanni, lima puluh halak dalahi; [96]

⁷humbani ginompar ni si Elam: Si Jeraya, anak ni si Atalya, rap pakon hasomanni, pitu puluh halak dalahi; [97]

⁸humbani ginompar ni si Sepatya: Si Sebaya, anak ni si Mikael, rap pakon hasomanni, ualuh puluh halak dalahi; [98]

⁹humbani ginompar ni si Joab: Si Obaja, anak ni si Jehiel, rap pakon hasomanni, dua ratus sapuluh ualuh halak; [99]

¹⁰humbani ginompar ni si Bani: Si Selomit, anak ni si Josipya, rap pakon hasomanni, saratus onom puluh halak dalahi;

¹¹humbani ginompar ni si Bebai: Si Sakaria, anak ni si Bebai, rap pakon hasomanni, dua puluh ualuh halak dalahi; [100]

¹²humbani ginompar ni si Asgad: Si Johanan, anak ni si Hakkatan, rap pakon hasomanni, saratus sapuluh halak dalahi; [101]

¹³humbani ginompar ni si Adonikam, ai ma na roh humpudi, anjaha on do goran ni sidea: Si Elipelet, si Jehiel pakon si Semaya rap pakon hasomanni, onom puluh halak dalahi; [102]

¹⁴humbani ginompar ni si Bigwai: Si Utai pakon si Sakkur rap pakon hasomanni, pitu puluh halak dalahi; [103]

¹⁵Jadi hupatumpu ma sidea i topi ni bah banggal na mardalan hu Ahawa, anjaha marsaran ma hanami ijai tolu ari dokahni. Jadi sanggah na hupardiatei halak na mabuei ai pakon malim, seng dong jumpah ahu ijai humbani anak ni si Levi.

¹⁶Halani ai husuruh ma na mangalop si Elieser, si Ariel, si Semaya, si Elnatan, si Jarib, si Natan, si Sakaria pakon si Mesulam, ai ma kopala-kopala, pakon si Jaiarib ampa si Elnatan, ai ma halak na maruhur. [104]

¹⁷Jadi hupabangkit ma sidea marayak si Iddo pambobai i huta Kasipia, anjaha huhatahon ma hubani sidea, aha sihatahonon ni sidea hubani si Iddo pakon hubani saninani siparugas i rumah panumbahan i huta Kasipia, ai ma, ase itongos bennami siparugas i rumah ni Naibata. [105]

¹⁸Jadi iboan ma bennami (halani tangan ni Jahowa na layak ai do i babounami) sada dalahi na pentar humbani ginompar ni si Makli, anak ni si Levi, anak ni si Israel, ai ma si Serebya pakon anakni ampa saninani, sapuluh ualuh halak; [106]

¹⁹sonai homa si Hasabya anjaha hasomanni si Jesaya humbani ginompar ni si Merari, rap pakon saninani ampa anak ni sidea, dua puluh halak bueini;

²⁰ambahni ai dua ratus dua puluh halak siparugas i rumah panumbahan, ai ma na tinotapkon ni si Daud pakon kopala-kopala gabe suruh-suruhan ni halak Levi; ganupan sidea tarsurat bei do goranni. [107]

²¹Dob ai hutingtingkon ma ijai, i topi ni Bah Ahawa ai sada parpuasaon, laho paundukkon uhur nami i lobei ni Naibata nami, mangindohon humbani pardalan na lihar bennami, bani anaknami ampa ugas-ugasnami. [108]

²²Ai maila do ahu mangindohon humbani raja ai bala pakon bala siparhuda, laho mangondingi hanami dompak munsuh i tongah dalan; ai domma pala ihatahon hanami dompak raja ai sonon, ʻTangan ni Naibatanami do i babou ni ganup na mangindahi-Si gabe hadearon-Ni tapi gogoh-Ni pakon ringis-Ni do mangimbang ganup halak na manadingkon-Si.ʼ [109]

²³Jadi marpuasa ma hanami anjaha mangelek-elek pangurupion ni Naibata pasal ai, anjaha itangihon do elek-eleknami ai.

²⁴Dob ai hupapulig ma sapuluh dua halak humbani kopala-kopala ni malim, ai ma si Serebya pakon si Hasabya, anjaha sapuluh halak humbani sanina ni sidea mangkasomani sidea.

²⁵Anjaha hutimbang hubani sidea pirak, omas pakon parugas, sibere-bere hu rumah ni Naibatanta, ai ma na nilayak-layakkon ni raja ai, panuturini, raja-raja ampa haganup halak Israel, bahen galangan. [110]

²⁶Buei ni na hutimbang ai bani sidea pirak onom ratus lima puluh talenta, parugas pirak saratus talenta pakon omas saratus talenta;

²⁷ambahni ai, dua puluh panginuman omas na marharga saribu darik omas, pakon dua mangkuk tombaga na marhillong, dos jengesni pakon omas. [111]

²⁸Dob ai ningku ma dompak sidea, ʻNa pansing do nasiam bani Jahowa, parugas ai pe na pansing do; anjaha pirak pakon omas ai sibere-bere humbani rosuh ni uhur do ai bani Jahowa, Naibata ni ompung nasiam.ʼ

²⁹Jaga anjaha ramotkon nasiam ma in paima ipatimbangkon nasiam in i lobei ni sintua ni malim pakon halak Levi ampa kopala ni halak Israel mar sasaompung i Jerusalem, ibagas kamar ni Rumah ni Jahowa. [112]

³⁰Jadi ijalo malim pakon halak Levi ma pirak, omas pakon parugas, na dob tinimbang ai, laho mamboan ai hu Jerusalem, hu rumah ni Naibatanta.”

³¹Jadi bingkat ma hanami hun Bah Ahawa ari sapuluh dua bulan sada, laho mardalan hu Jerusalem; tangan ni Jahowa do i babounami, anjaha ipaluah do hanami hun tangan ni munsuh pakon humbani panrampok i tongah dalan. [113]

³²Dob das hanami i Jerusalem marsaran ma hanami tolu ari ijai. [114]

³³Paompat-arihon itimbang hanami ma pirak, omas pakon parugas-parugas ai ibagas rumah ni Naibatanta, laho mamberehon ai hubani Malim Maremot, anak ni si Uria, hasoman ni si Eleasar, anak ni si Pinehas, hasoman ni sidea ai dua halak Levi, si Josabad, anak ni si Jesua, pakon si Noaya, anak ni si Binui. [115]

³⁴Ganupan ai ihira anjaha itimbang ma, anjaha isuratkon borat ni haganup.

³⁵Bani panorang ai, iboan halak na dob tarbuang, na dob mulak hun habuangan ai ma galangan situtungon hubani Naibata ni Israel, sapuluh dua lombu manguras ganup Israel, siah puluh onom biribiri tunggal, pitu puluh pitu anak ni biribiri, anjaha sapuluh dua hambing tunggal bahen galangan pardousaon; ganupan ai bahen galangan situtungon bani Jahowa. [116]

³⁶Dob ai ipadas sidea ma surat parentah ni raja ai hubani wakil ni raja ai pakon hubani panrajai i dipar ni bah banggal ai; jadi ibere sidea ma tumpakni hubani bangsa ai ampa hubani Rumah ni Naibata. [117]