Read Batak Simalungun NEHEMIA 1 Bible Online

NEHEMIA 1 - Batak Simalungun bible

NEHEMIA 1

¹Barita ni si Nehemia, anak ni si Hakalya. Masa do bani bulan siah, paduapuluh-tahunkon, tudu sanggah i huta Susan ahu, ibagas rumah ni raja ai, [1]

²jadi roh ma si Hanani, sada humbani saninangku, rap pakon piga-piga dalahi hun Juda; jadi husungkun ma sidea pasal halak Jahudi, sagala na maluah, na tading humbani halak na tarbuang, pakon pasal Jerusalem. [2]

³Dob ai nini sidea ma hu bangku, “Ia simasima ni halak, na tading humbani halak na tarbuang, marhasunsahan banggal do i nagori ai anjaha madorun; ai mareong do tembok ni Jerusalem, anjaha seda do horbanganni ibahen apuy.” [3]

⁴Jadi dob hubogei barita ai, hundul ma ahu anjaha tangis, pusok uhurhu piga-piga dokah; marpuasa ma ahu anjaha martonggo i lobei ni Naibata na i surga. [4]

⁵Ningku ma, “Ham Jahowa, Naibata na i surga, Naibata na timbul anjaha sihabiaran, na tongtong mardingat padan idop ni uhur hubani na mangkaholongi-Si anjaha na mandalankon titah-Ni. [5]

⁶Sai tangi ma pinggol-Mu anjaha tonggor panonggor-Mu manangihon tonggo ni juakjuak on, na hutonggohon nuan i lobei-Mu borngin pakon arian, laho mangapiti halak Israel jabolon-Mu, sonai homa pangakuan dousa, na binahennami dompak Ham. Ahu pe, sonai homa ginompar ni bapa, mardousa do. [6]

⁷Bajan tumang do hanami marparlahou dompak Ham; seng ihorjahon hanami titah, aturan pakon uhum, na tinonahkon-Mu hubani si Musa juakjuak-Mu.

⁸Sai dingat Ham ma hata, na tinonahkon-Mu hubani si Musa, juakjuak-Mu, nimu, ʻAnggo mangosei hanima, erapkonon-Ku do hanima hu tongah-tongah ni sagala bangsa [7]

⁹Tapi anggo mulak uhurnima, iramotkon anjaha ihorjahon hanima titah-Ku, porini pe domma mambur hanima das bani ujung ni langit, sai patumpuon-Ku do hanima hunjai, anjaha mulak hanima boanon-Ku hu ianan, na dob Hupilih bahen ianan ni goran-Ku.ʼ [8]

¹⁰Jabolon-Mu do sidea tongon anjaha bangsa-Mu, na dob pinaluah-Mu marhitei hagogohon-Mu na banggal pakon marhitei tangan-Mu na gogoh. [9]

¹¹Ham Tuhan, sai tangi ma pinggol-Mu manangihon tonggo ni juakjuak-Mu on pakon tonggo ni jabolon-Mu, sagala na marosuh marhabiaran bani goran-Mu; sai manumpak ma Ham bani langkah ni juakjuak-Mu on sadari on, sai jumpahan idop ni uhur ma ahu bahen Ham i lobei ni raja in! Sitahu anggur ni raja in do ahu.” [10]