Read Batak Simalungun NEHEMIA 4 Bible Online

NEHEMIA 4 - Batak Simalungun bible

NEHEMIA 4

¹Jadi dob ibogei si Sanballat na paulihon tembok ai hita, manggila ma ia anjaha manringis tumang, anjaha ipahiri-hiri ma halak Jahudi. [38]

²Nini ma i lobei ni saninani ampa bala ni Samria, “Aha do na sihol bahenon ni halak Jahudi, na so margogoh ai? Na sihol pasuangkon do sidea? Na sihol manggalang do sidea? Ai mintor tardobkon sidea ma ai ibagas sadari? Sihol huaron ni sidea use batu-batu ai hun timbunanni ai, na dob minosogan? [39]

³Anjaha i lambungni do si Tobia, halak Amon ai, nini ma, “Paturut inunut sidea paulihon ai, anggo inangkih sada baliang harangan holi ai, reongkononni ma tembok batu ni sidea ai.” [40]

⁴“Tangar Ham ma, Ham Naibatanami! Hona apas do hanami, balaskon Ham ma hubani ulu ni sidea pangkirion ni sidea ai, anjaha ondoskon Ham ma sidea gabe sirampason i tanoh pambuangan ni sidea. [41]

⁵Ulang ma marpangulaki uhur-Mu bani hasalahan ni sidea, anjaha ulang ma sasap Ham dousa ni sidea hun lobei-Mu; ai domma ipuhoi sidea ringis-Mu i lobei ni halak sipanukangi ai. [42]

⁶Tapi inunut hanami do pajongjongkon tembok ai, anjaha domma mardomu ganup tembok ai satongah gijang. Ai sada do uhur ni bangsa ai marhorja.”

⁷Dob ibogei si Sanballat, si Tobia, halak Arab ai, halak Amon pakon halak Asdod, na manjadi do pangumbanon ni tembok ni Jerusalem, anjaha mamungkah tutup bungbungni, marah tumang ma sidea;

⁸jadi marbulawan ma sidea haganup roh laho mamorang Jerusalem, anjaha mambahen hageoron ijai.

⁹Tapi martonggo ma hanami hubani Naibatanami, anjaha iadongkon hanami ma parjaga mangimbang sidea, arian borngin, laho mandingdingi hanami dompak sidea.

¹⁰Tapi nini halak Jahudi ma, “Domma surut gogoh ni halak sipanarui, anjaha buei ope junjunan; seng tolap be hanami mandobkon tembok ai.” [43]

¹¹Anjaha munsuh mangkatahon, “Seng bulih botohon ni sidea, anjaha seng bulih idahon ni sidea, paima das hita hu tongah-tongah ni sidea, laho manraseihon sidea anjaha manlanglangi horja ni sidea.

¹²Sanggah roh halak Jahudi, na marianan i lambung ni munsuh ni sidea ai, ihatahon sidea do bennami, domma pala sapuluh hali. Humbani ganup ianan, na niianan ni sidea, sihol roh sidea mangimbang hita.”

¹³Jadi ipajongjong hanami ma bangsa ai mangihutkon margani bani ianan sitoruhan i pudi ni tembok ai pajolom-jolom podang, tanja pakon panah.

¹⁴Jadi dob hutulimati, jongjong ma ahu, anjaha ningku ma dompak halak na sangap pakon dompak kopala ampa simasima ni bangsa ai, “Ulang ma nasiam mabiar mangidah sidea. Dingat nasiam ma Jahowa, na banggal anjaha na majombut, anjaha marporang ma nasiam mangkopkop sanina nasiam, anak nasiam, boru nasiam, parinangon nasiam ampa rumah nasiam.” [44]

¹⁵Dob tarburintik bani munsuhnami, na dob ibotoh hanami ganupan ai, anjaha na dob isundati Naibata tahi-tahi ni sidea ai, mulak ma hanami ganup hu tembok ai, ganup hu horjani bei. [45]

¹⁶Olat ni ari ai, satongah humbani juakjuakkai mangkorjai horja ai, anjaha na satongah nari pajolom-jolom tanja, gantar, panah, ampa baju bosi, anjaha kopala-kopala ai jongjong i pudi ni ganup ginompar ni Juda.

¹⁷marhorja i atas ni tembok ai. Anjaha halak sipanarui sonon ma pangkorjani, tanganni sada ipakei mangkorja, tanganni na sada nari manjolom sinjatani. [46]

¹⁸Tapi sagala siparhorja ai mangkalhal podangni bani binongeini sanggah na marhorja ai. Anjaha dalahi sisompul tarompit i lambungku.

¹⁹Ningku ma dompak halak na sangap, dompak kopala ampa dompak simasima ni bangsa ai, “Buei do horja ai anjaha bolag, anjaha merap do hita i atas tembok ai, padaoh-daoh bei.

²⁰Barang hun ianan ja ibogei nasiam sora ni tarompit, maningon roh ma nasiam manjumpahkon hanami martumpu hujai. Naibatanta do marporang mangkopkop hita.” [47]

²¹Jadi ihorjai hanami ma horja ai, anjaha satongah humbani sidea pajolom-jolom tanja humbani girah sogod nari das ronsi na mulgap bintang.

²²Ambah ni ai ningku ma dompak bangsa ai bani panorang ai, “Maningon ganup do rap pakon juakjuakni bei marborngin i Jerusalem, ase marjaga hita borngin anjaha marhorja arian.”

²³Tapi age ahu, age saninangku, age juakjuakku, age halak siparjaga na mangirikkon ahu, seng ongga itanggali hanami pakeiannami; ganup do manjolom sinjatani ibagas tanganni. [48]