Read Batak Simalungun NEHEMIA 5 Bible Online

NEHEMIA 5 - Batak Simalungun bible

NEHEMIA 5

¹Tapi masa ma doruh-doruh i tongah-tongah ni halak na miskin ampa parinangon ni sidea dompak sanina ni sidea, halak Jahudi.

²Adong do deba na mangkatahon, “Buei do hanami sapanganan, ai buei do anak pakon borunami; bere bennami gandum, ase mangan anjaha manggoluh hanami.”

³Adong do homa na mangkatahon, “Maningon gadeihononnami ma jumanami, pohon anggurnami pakon rumahnami ase dapotan gandum halani lohei.”

⁴Anjaha adong use na mangkatahon, “Domma ipinjam hanami duit bahen galar ni balasting ni jumanami pakon pohon anggurnami hubani raja in.

⁵Ai pe, ia sibuknami songon sibuk ni saninanami do, anaknami songon anak ni sidea; hape tonggor ma, maningon ondoskononnami ma hape anaknami ampa borunami gabe jabolon, anjaha deba humbani borunami domma gabe jabolon, tapi seng margogoh hanami mangkahua ai, ai halak na legan do simada jumanami ampa pohon anggurnami.” [49]

⁶Jadi manringis tumang ma ahu dob hubogei doruh-doruh ampa adu-aduan ni sidea ai.

⁷Jadi dob hutimbang-timbang ibagas uhurhu, huhata ma halak na sangap ampa kopala-kopala. Ningku ma dompak sidea, “Domma manjalo bunga ni duit hape nasiam humbani sanina nasiam?”Jadi hubahen ma sada tumpuan banggal mangimbang sidea, [50]

⁸anjaha ningku ma dompak sidea, “Hita do na dob manobus saninanta halak Jahudi, sagala na dob tarbuang hubani bangsa sipajuh begu-begu, romban hubani gogohta; tapi nasiam sandiri do nuan manjual sanina nasiam, anjaha hu banta do sidea tarjual.”Jadi sip ma sidea, seng tarbalosi sidea. [51]

⁹Dob ai ningku ma, “Seng dear na binahen nasiam in. Ai lang patut marhabiaran hubani Naibatanta nasiam namin marparlahou halani pangapasion ni bangsa sipajuh begu-begu, munsuhta ai? [52]

¹⁰Ahu pe, age saninangku ampa juakjuakku domma ipapinjamkon hanami pirak pakon omei bani sidea. Balihon hita ma utang ai.

¹¹Paulak nasiam ma hubani sidea sadari on juma ni sidea, pohon anggur ni sidea, pohon jetun ni sidea ampa rumah ni sidea, ronsi bunga ni duit, sonai homa gandum, anggur ampa minak, na pinainjamkon nasiam hubani sidea.”

¹²Dob ai nini sidea ma, “Ra pe hanami paulakkon ai, anjaha aha pe lang tungguonnami humbani sidea. Ra do hanami mambahen songon na hinatahonmu ai.” Dob ai hudilo ma malim lanjar hupabija ma sidea, ase ibahen sidea romban hubani hata ai. [53]

¹³Hupaspas ma partontonan ni bajungku. Ningku ma, “Sai sonin ma paspason ni Naibata ganup halak hun rumahni ampa humbani artani na so mandalankon hata on. Sai hona paspas ma ia anjaha buangon.” Dob ai nini ganup tumpuan ai ma, “Amen,” anjaha ipuji sidea ma Naibata. Ibahen bangsa ai ma songon na binagahkon ai. [54]

¹⁴Ambahni ai olat ni parbangkitku gabe panrajai bani sidea i tanoh Juda, olat ni tahun paduapuluhkon das hubani patolupuluh-tahunkon panrajaion ni Raja Artasasta, sapuluh dua tahun dokahni, seng ongga hupangan upah parbagianan ni panrajai, saninangku pe sonai do. [55]

¹⁵Ia panrajai na i lobeihu borat do ipaporsankon sidea hubani bangsa ai, ai itunggu do humbani sidea sipanganon pakon anggur, ambahni ai ompat puluh ompat sekel pirak; sonai homa juakjuak ni sidea patuan-tuankon do dompak bangsa ai. Tapi anggo ahu seng sonai hubahen, halani biar mangidah Naibata. [56]

¹⁶Sonai homa horja i tembok ai, ahu sandiri do manangani anjaha seng dong juma hudapot; anjaha ganup juakjuakku tumpu do bani horja ai. [57]

¹⁷Anjaha halak Jahudi pakon sagala kopala, saratus lima puluh halak bueini, ambahni ai halak na roh humbani bangsa sipajuh begu-begu, na inggot bennami, mangan i mejangku do. [58]

¹⁸Na maningon sipasirsiron ibagas sadari, ai ma sada lombu jonggi, onom biribiri na pinamombur; sonai homa manuk-manuk ipasirsir do bangku, anjaha ganup sapuluh ari marbagei-bagei anggur buei tumang; age sonai seng adong hutunggu sipanganon parbagianan ni sada panrajai, halani borat hinan do horja rodi bani bangsa ai. [59]

¹⁹“Dingat Ham ma ahu, Ham Naibatangku, balos ni haganup na hubahen ai hubani bangsa ai.” [60]