Read Batak Simalungun NEHEMIA 6 Bible Online

NEHEMIA 6 - Batak Simalungun bible

NEHEMIA 6

¹Jadi dob tarburintik hubani si Sanballat, si Tobia, pakon si Gesem, halak Arab ai, ampa hubani munsuh na legan, na dob siap hupauli tembok ai, anjaha seng dong be bungbungni na tading age sada ijai, tapi tongon seng ope marlabah hubahen horbanganni ronsi panorang ai, [61]

²isuruh si Sanballat ampa si Gesem ma na mangkatahon hu bangku, “Roh ma ham, anjaha marjumpah bani huta na i habungan on ma hita.” Tapi sihol mambahen na jahat do sidea hu bangku. [62]

³Jadi husuruh ma suruhanku hubani sidea mangkatahon, “Borat tumang do nuan horjangku, halani ai seng tarbahen ahu tuad. Mase ma rahanan maronti horja on, halani na hutadingkon on marayak nasiam?”

⁴Anjaha pala do ompat hali sonai isuruh sidea suruhanni hu bangku, tapi sonai do balosku bani sidea.

⁵Dob ai isuruh si Sanballat ma palimahalihon sonai hu bangku suruhanni mamboan surat na buha ibagas tanganni.

⁶Tarsurat do ibagas sonon, “Sar do barita i tongah-tongah ni bangsa sipajuh begu-begu, anjaha si Gesem pe ihatahon do sonai, ia ham pakon halak Jahudi sihol marbalik do, halani ai do gan, ase ipajongjong ham tembok in; anjaha ham marsura-sura gabe raja ni sidea, nini barita ai. [63]

⁷Domma pala ipabangkit ham nabi laho maningtingkon pasal ham i Jerusalem, paboa domma adong sada raja i Juda. Ai pe sai na das do barita on holi hubani rajanta ai, halani ai roh ma ham, ase rap manriah hita.”

⁸Tapi husuruh ma hubani na mangkatahon, “Seng tongon masa songon na hinatahonmu ai, tukas-tukasmu do in, tubuh humbagas uhurmu tumang.”

⁹Ai ganup do sidea mambibiari hanami, ninuhur ni sidea, “Parontihonon ni tangan ni sidea ma horja ai, gabe sundat ma. Halani ai, Ham Naibata, sai lambin pargogohi ham ma tanganku!” [64]

¹⁰Jadi sanggah laho ahu hu rumah ni si Semaya, anak ni si Delaya, anak ni si Mehetabel, hape na pinapulig do ia, nini ma, “Martumpu ma hita hu rumah ni Naibata, hubagas rumah panumbahan ai, anjaha tutup hita ma rumah panumbahan ai; ai na laho roh do sidea sihol mambunuh ham, borngin on tene sihol roh sidea mambunuh ham.”

¹¹Tapi ningku ma, “Mintor ra ma maporus dalahi na songon ahu on? Anjaha ise ma na songon ahu on masuk hu rumah panumbahan lanjar boi manggoluh? Seng ra ahu masuk hujai. [65]

¹²Ai torang do ididah uhurhu, sedo Naibata na marsuruhsi ai, ihatahon pe panjahaionni ai palumbahon ahu, halani na dob iupahi si Tobia pakon si Sanballat do ia, [66]

¹³ase mabiar ahu namin ninuhurni, gabe hubahen sonai, ase mardousa ahu, gabe boi pasambor-samboron ni sidea goranku, laho pabadorhon ahu. [67]

¹⁴Ham Naibatangku, dingat Ham ma pambahenan, na binahen ni si Tobia ampa si Sanballat on, sonai homa nabi naboru, si Noaja, ampa nabi na legan, na sihol mambibiari ahu.” [68]

¹⁵Jadi dob ma tembok ai ari dua puluh lima bulan Elul, ibagas lima puluh dua ari.

¹⁶Dob ibogei haganup munsuhnami barita ai, gabe mabiar ma ganup bangsa sipajuh begu-begu na inggot bennami, anjaha gobir ma sidea, iahap sidea Naibatanta do na manumpak mambahen saud horja on. [69]

¹⁷Manongos surat do homa ijia buei halak na sangap i Juda hubani si Tobia, anjaha humbani si Tobia pe roh do surat hubani sidea,

¹⁸ai buei do i Juda na saparbulawanan pakonsi, halani na marsimatua do ia hubani si Sekanya, anak ni si Arak, anjaha si Johanan, anakni ai, mambuat boru ni si Mesulam, anak ni si Berekia.

¹⁹Ambah ni ai ipatugah-tugah sidea do pambahenanni na madear i lobeihu, anjaha hatangku ipadas hu bani. Itongos si Tobia do surat bangku sihol mambibiari ahu.