Read Batak Simalungun NEHEMIA 8 Bible Online

NEHEMIA 8 - Batak Simalungun bible

NEHEMIA 8

¹Jadi dob jumpah bulan pitu das ma halak Israel hu huta ni sidea bei.

²Dob ai martumpu ma ganup bangsa ai marsada ni uhur hu alaman na i lobei ni Horbangan Bah; ihatahon sidea ma hubani si Esra, sibotoh titah ai, ase iboan buku titah ni si Musa, na binere ni Jahowa hubani halak Israel. [76]

³Jadi iboan Malim Esra ma titah ai hu lobei ni tumpuan ai, hu lobei ni dalahi ampa naboru pakon haganup halak na boi mangarusi ai, ai ma ari sada bulan pitu. [77]

⁴Jadi ibasa ma hunjai bani alaman ai i lobei ni Horbangan Bah ai humbani girah sogod nari das hu tongah ari i lobei ni dalahi ampa naboru pakon halak na boi mangarusi ai, anjaha tangi do haganup halak simbuei ai bani hata ni buku titah ai.

⁵Tapi anggo si Esra, sibotoh titah ai, jongjong do bani anjapanjap hayu, na dob pinasirsir hinan hubani horja ai, anjaha i lambungni jongjong do hampit siamun si Matitya, si Sema, si Anaya, si Uria, si Hilkia ampa si Maaseya; anjaha hampit sambilou, si Pedaya, si Misael, si Malkia, si Hasum, si Hasbadana, si Sakaria ampa si Mesulam.

⁶Dob ai ibuka si Esra ma buku ai i lobei ni panonggor ni ganup halak simbuei ai; anjaha sanggah na binuhani ai, jongjong ma ganup bangsa ai.

⁷Dob ai ipuji si Esra ma Jahowa, Naibata na banggal in, anjaha ganup bangsa ai mambalosi, “Amen, Amen,” anjaha gostong tangan ni sidea dompak datas; ipaunduk sidea ma dirini, manrogop ma sidea marsombah hubani Jahowa. [78]

⁸Sonai homa si Jesua, si Bani, si Serabya, si Jamin, si Akub, si Sabetai, si Hodia, si Maaseya, si Kelita, si Asarya, si Josabad, si Hanan, si Pelaya ampa halak Levi, iajarhon sidea do titah ai bani bangsa ai, anjaha soh bei do bangsa ai bani iananni. [79]

⁹Jojor do ibasa sidea humbani buku ai, humbani titah ni Jahowa, anjaha ipatorang sidea do ai, gabe iarusi bangsa ai ma. [80]

¹⁰Dob ai roh ma si Nehemia, sipanrajai ai, ampa si Esra, malim anjaha sibotoh surat ai, ampa halak Levi, siajari bangsa ai, nini sidea ma dompak ganup bangsa ai, “Na pansing do ari on bani Jahowa Naibata nasiam; ulang ma pusok uhur nasiam anjaha tangis nasiam!” Ai tangis-tangis do bangsa ai, dob itanggar sidea hata ni titah ai. [81]

¹¹Dob ai nini ma dompak sidea, “Laho ma nasiam, pangan nasiam ma na mantin-mantin, anjaha inum nasiam ma anggur na matobu, anjaha tongos nasiam ma parbagianan bani ganup na so dong ope pinasirsir bani, ai na pansing do ari on bani Tuhanta; anjaha ulang ma marhoru nasiam, ai malas ni uhur ibagas Jahowa, ai do gogoh bani nasiam.” [82]

¹²Sonai homa halak Levi ipasabou do ganup uhur ni bangsa ai, marhitei na mangkatahon, “Sip bei ma nasiam, ai na pansing do ari on, ulang ma marhoru nasiam!”

¹³Dob ai laho ma ganup bangsa ai, mangan ampa minum, anjaha manongoskon deba hunjai ampa marmalas ni uhur, halani iarusi sidea hata ai, na pinatorang bani sidea.

¹⁴Bani ari paduahon martumpu ma kopala ni mar sasaompung humbani ganup bangsa ai, rap pakon malim ampa halak Levi, hubani si Esra, sibotoh titah ai, laho mangguruhon hata ni titah ai.

¹⁵Jadi jumpah sidea ma tarsurat ibagas titah, na tinonahkon ni Jahowa marhitei si Musa, paboa maningon marianan do halak Israel ibagas lampolampo sadokah pesta bani bulan papituhon, [83]

¹⁶anjaha maningon patugahon ampa tingtingkonon ni sidea do bani ganup huta ni sidea ampa i Jerusalem, “Laho ma nasiam hu dolog, anjaha boan nasiam ma hunjai dangkah ni hayu jetun harangan, sampinur lambei ampa na legan na tabun, laho padearhon lampolampo, songon na tarsurat ai.”

¹⁷Jadi luar ma bangsa ai, iboan sidea ma ai, anjaha ipauli sidea ma ai, anjaha ipauli sidea ma lampolampo bani sidea, ganup i atas tayub ni rumahni, i alaman ampa i alaman ni rumah ni Naibata, ampa i alaman ni Horbangan Bah pakon i alaman ni Horbangan Efraim. [84]

¹⁸Jadi ganup tumpuan ni halak na mulak hun habuangan ai mambahen parlampolampoan, anjaha marianan ma sidea ibagas lampolampo ai; olat ni panorang ni si Josua, anak ni si Nun das ronsi ari ai, seng ongga ope sonai ibahen halak Israel. Jadi banggal tumang do malas ni uhur ai. [85]

¹⁹Anjaha ganup ari, humbani ari na parlobei das hubani ari parpudi, ibasa si Esra ma humbani buku titah ni Naibata. Pitu ari do sidea marpesta; anjaha bani ari na paualuhkon ma mata ni partumpuan ai, romban hubani titah ai. [86]