Read Batak Simalungun ESTER 1 Bible Online

ESTER 1 - Batak Simalungun bible

ESTER 1

¹Dob ai masa ma bani panorang ni si Ahasveros, ai ma si Ahasveros na manrajai olat ni India das hu Etiopia, saratus dua puluh pitu propinsi, [1]

²bani panorang ai, sanggah na hundul Raja Ahasveros bani hotak harajaonni, i huta Pamatang Susan, [2]

³patolu-tahunkon dob manrajai ia, ibahen raja ai ma sada pesta mangan-mangan bani haganup kopala ampa juakjuakni; martumpu ma hu lobei ni kopala ni bala ni Persia pakon Madai ampa na sangap-sangap pakon panrajai ni propinsi-propinsi ai, [3]

⁴anjaha ipatidak ma bani panorang ai hinabuei ni habayakon ampa hamuliaon ni harajaonni ampa hajagaron ni hatimbulonni, piga-piga dokah, ai ma saratus ualuh puluh ari.

⁵Jadi dob salpu ari ai, ibahen raja ai ma use pesta mangan-mangan bani haganup halak simbuei, na marianan i huta Pamatang Susan, halak na magodang ampa na etek, pala pitu ari dokahni i alaman na i pohon ai, dohorhon rumah ni raja ai.

⁶Ipanggantungkon do ijai tirei silopak, sijolang ampa na mahonda, ilongkotkon marhitei tali linnen na alus ampa hiou na tinubar hubani golang pirak ampa hubani tiang marmar; podom-podoman humbani omas ampa pirak pe ipajongjong do bani dasor, na pinauli humbani alabaster, marmar silopak, batu mutiara ampa marmar na birong.

⁷Siinumon iidangkon bani panginuman omas, panginuman omas na palegan-legan tompani, anjaha buei tumang do anggur humbani gudang ni raja ai, domu hubani hinalayak ni raja ai.

⁸Parminumonkon pe maraturan do, seng dong paksaan; ai domma iaturhon raja ai hinan hubani kopala-kopala na i rumahni ai, ase ibahen romban hubani rosuh ni ganup halak.

⁹Si Vasti pe, puangbolon ai, ibahen do pesta mangan-mangan bani naboru-naboru i rumah bolon ni Raja Ahasveros.

¹⁰Bani ari papituhon, sanggah na marmegah-megah raja ai binahen ni anggur ai, iparentahkon raja ai ma hubani si Mehuman, si Bista, si Harbona, si Bigta, si Abagta, si Setar pakon si Karkas, juakjuak sipitu halak, na dob pinaborsih ai, siparugas i lobei ni Raja Ahasveros, [4]

¹¹ase iboan sidea Puangbolon Vasti marsortali harajaon hu lobei ni raja ai, laho patuduhkon hajengesonni hubani bangsa ai ampa kopala-kopala; ai jenges tumang do tongon rupani.

¹²Tapi mangengkar do Puangbolon Vasti mambalosi hata ni raja ai, halani ai gajag ma pala ringisni ibagas uhurni.

¹³Dob ai nini raja ai ma dompak halak paruhur, na mambotoh manjujur ari (ai sonai hinan do hasomalan ni raja ai, iarihkon do parkarani hubani halak na pandei marundang-undang ampa manguhum, [5]

¹⁴anjaha halak sidohoran bani, ai ma si Karsena, si Satar, si Admata, si Tarsis, si Neres, si Marsena pakon si Memukan, ai ma kopala-kopala ni halak Persia ampa Madai sipitu halak ai, ai ma halak na bolas masuk hubani raja ai, ai ma halak sipalobeion ibagas harajaon ai), [6]

¹⁵“Mangihutkon undang-undang, aha do na patut sibahenon hubani Puangbolon Vasti, ai iengkar do parentah ni Raja Ahasveros, na pinadasni ai bani marhitei juakjuakni ai?”

¹⁶Jadi nini si Memukan na mambalosi i lobei ni raja ai ampa kopala-kopala ai, “Seng pitah dompak raja ai tumang marsalah Puang bolon Vasti, dihut do dompak ganup kopala-kopala ampa ganup bangsa, na marianan bani ganup nagori, na ginomgoman ni Raja Ahasveros.

¹⁷Ai sar ma pambahenan ni puangbolon ai holi bani ganup naboru, gabe pis ma holi mata ni sidea dompak paramangonni, ai hatahonon ni sidea ma, ʻIparentahkon Raja Ahasveros do mamboan si Vasti hu lobeini, tapi seng ra roh ia.ʼ

¹⁸Mulai sadari on pag ma parinangon ni kopala-kopala ni Persia ampa Madai, dob ibogei parlahou ni puangbolon, mangengkar ganup kopala-kopala, siirikkon raja in, gabe masa ma buei pangapasion ampa ringis.

¹⁹Anggo dear nini uhur ni raja in, ipadalan raja in ma sada paraturan harajaon, sipamasukon hubani undang-undang ni halak Persia ampa Madai, na so bulih paubahon, paboa na so bulih be roh si Vasti hu lobei ni Raja Ahasveros, anjaha pangkat hapuangbolononni ai ondoskonon ni raja in ma ai bani halak na legan, na dearan parlahouni hun bani. [7]

²⁰Anggo sar ma holi parentah ai, na binahen ni raja in, i sab harajaonni na bolag in, gabe hormat ma sagala naboru dompak paramangonni, na banggal age na etek.”

²¹Jadi rosuh ma raja ai mambogei hata ai, sonai homa kopala-kopala ai, gabe ibahen raja ai ma romban hubani hata ni si Memukan ai.

²²Dob ai ipantongoskon ma surat hu ganup nagori ginomgoman ni raja ai, hubani ganup nagori ibagas suratni, hubani ganup bangsa ibagas sahapni, mangkatahon, “Ganup dalahi, ia do tuan ibagas rumahni,“ anjaha imungmungkon ma ai ibagas sahap ni bangsani bei. [8]