Read Batak Simalungun ESTER 3 Bible Online

ESTER 3 - Batak Simalungun bible

ESTER 3

¹Dob na masa ai ipasangap Raja Ahasveros ma si Haman, anak ni si Hamedata, halak Agagi ai, ipatimbul ma ia, anjaha gijangan ibahen hundulanni humbani ganup kopala-kopala, hasomanni ai. [22]

²Anjaha ganup juakjuak ni raja ai, na i horbangan ni rumah ni raja ai, marsombah do hubani si Haman, manrogop i lobeini; ai sonai do parentah ni raja ai pasalsi, tapi anggo so Mordahai seng ra manowod, marsombah hu bani. [23]

³Dob ai nini juakjuak ni raja ai ma, na jongjong i horbangan ni rumah ni raja ai, dompak si Mordahai, “Mase ma langgaronmu parentah ni raja in?” [24]

⁴Jadi dob sai sonai ihatahon sidea piga-piga ari hu bani, hape seng itangihon hata ni sidea ai, ipatugah sidea ma ai hubani si Haman, laho mangidah, barang na tarpartahankon si Mordahai do pandapotni ai; ai ihatahon do hubani sidea, halak Jahudi do ia. [25]

⁵Jadi dob ididah si Haman, na so manowod anjaha marsombah si Mordahai hu bani, gabe manringis tumang ma si Haman.

⁶Tapi mahiritu, ninuhurni, anggo pitah hubani si Mordahai tumang ia mangonai tangan; ai domma ipatugah halak hinan hu bani, masuk bangsa ja si Mordahai, halani ai itahihon si Haman ma sihol mamboiskon ganup halak Jahudi na ibagas harajaon ni si Ahasveros rap pakon si Mordahai.

⁷Bani bulan sada, ai ma bulan Nisan, pasapuluhdua-tahunkon dob manrajai si Ahasveros, padalan ruji-ruji ma halak, ai ma Pur, i lobei ni si Haman, laho manjujur ari na madear, pala marbulan-bulan dokahni, gabe dapot ma bulan sapuluh dua, ai ma bulan Adar. [26]

⁸Dob ai nini si Haman ma dompak Raja Ahasveros, “Adong do sada bangsa, na marianan merap anjaha pulig-pulig i tongah-tongah ni bangsa-bangsa bani sab nagori gomgomanmu; legan do titah ni sidea humbani titah ni ganup bangsa na legan ai, anjaha titah ni raja in pe seng iihutkon sidea, halani ai seng patut paturuton ni raja in sidea sonai. [27]

⁹Anggo dear ninuhur ni raja in, mahua ma ibahen surat na mangkatahon, ase ibunuh sidea; hugalar pe sapuluh ribu talenta pirak hubani gamot-gamot ni raja in, ase inahkon sidea ai hubagas parartaan ni raja in.” [28]

¹⁰Dob ai ibuat raja ai ma tintin tokanni ai humbani tanganni, ibere ma ai hubani si Haman, anak ni si Hamedata, halak Agagi, imbang ni halak Jahudi ai. [29]

¹¹Dob ai nini raja ai ma dompak si Haman, “Ondos bam ma pirak in, sonai homa bangsa ai, anjaha bahen ma sonaha na dear ninuhurmu.”

¹²Jadi idilo ma jurutulis ni raja ai, ari sapuluh tolu bulan sada, gabe ibahen ma surat marguru hubani pangaturhon ni si Haman hubani pangintuai-pangintuai ni raja ai pakon hubani sipanrajai mar sasanagori ampa hubani kopala mar sasabangsa, hubani ganup nagori ibagas suratni bei ampa hubani ganup bangsa ibagas sahapni bei; tarsurat do ai ibagas goran ni Raja Ahasveros anjaha itokan bani tintin tokan ni raja ai. [30]

¹³Ipantongoskon ma surat ai marhitei suruhan hu ganup nagori ginomgoman ni raja ai, isini, ase iraseihon, ibunuh anjaha ilangkon ganup halak Jahudi, na maposo pakon na matua, dakdanak pakon naboru-naboru, ibagas sada ari, ai ma ari sapuluh tolu bulan sapuluh dua, ai ma bulan Adar, anjaha rampason do homa arta-arta ni sidea. [31]

¹⁴Salinan ni surat ai, gabe paraturan ma ai bani ganup nagori, anjaha tingtingkononkon ma bani ganup bangsa, ase sirsir bei ma bani ari na dob binuhul ai.

¹⁵Suruhan-suruhan ai pe tarolos bei ma laho, songon pangkatahon ni raja ai, tapi itingtingkon ma paraturan ai anggo i huta Pamatang Susan. Hundul ma raja ai ampa si Haman minum anggur, tapi songgotan do anggo parhuta Susan. [32]