Read Batak Simalungun ESTER 4 Bible Online

ESTER 4 - Batak Simalungun bible

ESTER 4

¹Dob tarbotoh si Mordahai ganup na masa ai, irigati si Mordahai ma hiouni, inahkon ma bani baju guni pakon abuan, anjaha luar ma ia hu tongah-tongah ni huta ai, mandoruh gogoh anjaha tangis-tangis. [33]

²Jadi das ma ia hu labah ni horbangan ni rumah ni raja ai, tapi seng bulih masuk atap ise hu horbangan ni rumah ni raja ai marbaju guni. [34]

³Age bani ganup nagori, hadasan ni hata ampa paraturan ni raja ai, masa do doruh banggal i tongah-tongah ni halak Jahudi pakon parpuasaon, partangison pakon doruh-doruh, anjaha buei halak na patibalhon dirini bani abuan marpakeian baju guni.

⁴Jadi dob roh naboru-naboru pangkasomani ni si Ester ampa juakjuakni patugahkon ai bani, gabe pusok tumang ma uhur ni puangbolon ai; itongos ma pakeian sisorungkonon ni si Mordahai, ase itanggali baju guni ai, tapi seng ra ia manjalo ai.

⁵Dob ai idilo si Ester ma si Hatah, sada humbani juakjuak ni raja ai, na hinatahonni marugas i lobeini, anjaha isuruh ma ia marayak si Mordahai, ase ibotoh atap aha do na masa, anjaha aha do halani ai.

⁶Jadi luar ma si Hatah manjumpahkon si Mordahai hu alaman ni huta na i lobei ni rumah ni raja ai.

⁷Jadi ipatugah si Mordahai ma hubani si Hatah ganup na masa hubani ampa buei ni pirak, na pinarbagah ni si Haman bereonni hu parartaan ni raja ai, anggo bulih sedahononni halak Jahudi. [35]

⁸Ibere si Mordahai ma homa hubani salinan ni paraturan, na dob pinadalan i Susan laho mansedahon sidea, ase ipatuduh ai hubani si Ester anjaha ipatorang ai hu bani, anjaha mangkatahonsi laho hubani raja ai, mangindohon idop ni uhurni, anjaha mangelek-eleksi mangkopkop bangsani ai. [36]

⁹Dob ai laho ma si Hatah, patugahkon hubani si Ester hata ni si Mordahai ai.

¹⁰Dob ai marsahap ma si Ester dompak si Hatah, anjaha ipadas ma hubani tonah sipadason hubani si Mordahai.

¹¹Ganup juakjuak ni raja ampa pangisi ni nagori-nagori ginomgoman ni raja ai torang do mambotoh, barang ise dalahi atap naboru na masuk hu lobei ni raja ai i alaman parbagas ai, na so nidiloni, sada do titahni, ai ma marutang hosah, legan ma anggo isurdukkon raja ai tungkot harajaon omas ai bani. Anjaha ahu domma pala tolu puluh ari lang tardilo hu lobei ni raja in. [37]

¹²Jadi ipadas sidea ma hata ni si Ester ai hubani si Mordahai.

¹³Dob ai roh ma use balos ni si Mordahai hubani si Ester, “Ulang ma ninuhurmu boi ho maluah humbani halak Jahudi, halani na marianan ho i rumah ni raja in.

¹⁴Anggo sip ho bani panorang na sonon, sai roh do pangurupion ampa haluahon hubani halak Jahudi humbani ianan na legan, tapi anggo ho ampa ginompar ni bapamu magou ma. Ambahni ai, ise mambotoh ai, atap halani panorang on do, ase das harajaon in bam?” [38]

¹⁵Dob ai itonahkon si Ester ma hubani si Mordahai,

¹⁶“Laho ma ham patumpuhon haganup halak Jahudi, na adong i huta Susan, anjaha marpuasa ma nasiam manonggohon ahu, anjaha ulang nasiam mangan pakon minum tolu ari on, arian pakon borngin. Ahu pe pakon naboru-naboru pangkasomaningku marpuasa do songon nasiam. Dob ai pe ase laho ahu hubani raja in, age pe marlawanan namin ai dompak undang-undang; anjaha anggo matei ahu, matei ma hape.” [39]

¹⁷Dob ai laho ma si Mordahai anjaha ibahen ma romban hubani haganup na dob tinonahkon ni si Ester hu bani.