Read Batak Simalungun ESTER 6 Bible Online

ESTER 6 - Batak Simalungun bible

ESTER 6

¹Bornginni ai seng tarpodom raja ai; jadi ihatahon ma boanon buku pardingatan pasal na masa ari-ari, anjaha ibasa ma ai i lobei ni raja ai.

²Jadi jumpah ma tarsurat parpalumba ni si Mordahai pasal si Bigtan pakon si Teres, ai ma juakjuak ni raja sidua halak ai, sijaga labah ai, na dob mansurahon sihol mambunuh Raja Ahasveros. [50]

³Dob ai nini raja ai ma, “Hasangapon atap habanggalon aha do na dob hubahen hubani si Mordahai balasni ai?” Nini juakjuak siparugas ai ma mambalosi, “Aha pe seng ongga nabahen bani.”

⁴Dob ai nini raja ai ma, “Ise do na i alaman ai?” Tudu do si Haman masuk hu alaman pardarat ni rumah ni raja ai, sihol mangkatahon hubani raja ai, ase igantungkon namin si Mordahai bani hayu, na dob pinajongjong bani. [51]

⁵Nini juakjuak ni raja ai ma dompaksi, “Tonggor ma, si Haman do na jongjong i alaman pardarat ai.” Nini raja ai ma, “Hatahon ma masuk ia!”

⁶Masukkonsi si Haman, nini raja ai ma dompaksi, “Aha do na talup bahenon hubani dalahi harosuh ni uhurhu, laho pasangapkonsi?” Marpingkir ma si Haman ibagas uhurni, “Mintor ise ma nani halak harosuh ni raja in, na sihol pasangaponni lobih humbangku?”

⁷Dob ai nini si Haman ma dompak raja ai, “Ia dalahi, na hinarosuhkon ni raja in sihol pasangapkonsi,

⁸bobanon ma namin bani pakeian harajaon, na dob somal ipakei raja in, ampa huda na dob somal ihunduli raja in, anjaha nahkonon ma namin sortali harajaon hu atas ni uluni. [52]

⁹Anjaha bereon ma namin pakeian ampa huda ai hu tangan ni sahalak humbani kopala-kopala ni raja in, humbani halak sisangapan, ase isorungkon pakeian ai hubani jolma harosuh ni uhur ni raja in, na sihol pasangaponni ai, anjaha ipahundul ma ia hu atas ni huda ai, anjaha itingtingkon i lobeini, ʻSonon do talup bahenon hubani jolma, na hinarosuhkon ni raja in laho pasangapkonsi.ʼ ” [53]

¹⁰Dob ai ihatahon raja ai ma hubani si Haman, “Papodas ma, buat ma pakeian ampa huda songon na hinatahonmai, dob ai bahen ma sonai dompak si Mordahai, halak Jahudi ai, na hundul-hundul i horbangan ni rumah ni raja in, anjaha ulang hurangi age otik humbani na dob hinatahonmai.” [54]

¹¹Jadi ibuat si Haman ma pakeian ampa huda ai, anjaha isorungkon ma ai hubani si Mordahai, ipahundul ma ia hu atas huda ai, anjaha itingtingkon ma i lobeini, “Sonon do talup bahenon hubani jolma na hinarosuhkon ni raja in, laho pasangapkonsi.”

¹²Dob ai mulak ma si Mordahai hu horbangan ni rumah ni raja ai. Tapi tarolos ma si Haman mulak hu rumahni, pusok tumang uhurni anjaha martudung-tudung. [55]

¹³Dob ai ibaritahon si Haman ma hubani si Seres, parinangonni ai ampa hubani ganup huan-kuanni ai, haganup na masa hu bani. Jadi nini huan-kuanni na maruhur ai ampa si Seres, parinangonni ai ma dompaksi, “Anggo halak Jahudi do si Mordahai, parbingkasanni mulai madabuh ma ham, seng anjai monang be ham marimbangsi, tapi maningon dabuh mando ham i lobeini.” [56]

¹⁴Sanggah na marsahap ai ope sidea pakonsi, das ma juakjuak ni raja ai, anjaha mangolos ma sidea mamboan si Haman hu pesta na dob pinasirsir ni si Ester. [57]