Read Batak Simalungun ESTER 8 Bible Online

ESTER 8 - Batak Simalungun bible

ESTER 8

¹Lanjar bani ari na sasada ai ibere Raja Ahasveros ma hubani Puangbolon Ester rumah ni si Haman, munsuh ni halak Jahudi ai. Si Mordahai pe bulih ma masuk hu lobei ni raja ai, ai domma ipatugah si Ester, naha partuturan ni si Mordahai hu bani. [66]

²Dob ai ibuat raja ai ma tintin tokanni, na binuatni humbani si Haman, gabe ibere ma ai hubani si Mordahai, lanjar iangkat si Ester ma si Mordahai, mangopalai rumah ni si Haman. [67]

³Dob ai iulaki si Ester ma use mangkatahon hatani hubani raja ai; manrogop ma ia hubani naheini anjaha ielek-elek ma ia marhasoman iluh, ase isundati raja ai partahi-tahion na jahat na binahen ni si Haman, halak Agagi ai, dompak halak Jahudi.

⁴Jadi isurdukkon raja ai ma tungkot omas harajaon ai hubani si Ester, gabe jongjong ma si Ester i lobei ni raja ai, [68]

⁵anjaha nini ma, “Anggo dear ninuhur ni raja in, anjaha anggo jumpahan idop ni uhur ahu i lobeini, anjaha anggo bonar homa hata on bani raja in, anjaha rosuh uhur ni raja in mangidah ahu, mahua ibahen ma namin surat, manulak hata ni surat ni si Haman, anak ni si Hamedata, halak Agagi ai, na sinuratni ai laho mangagou halak Jahudi, na adong i sab nagori ni raja in. [69]

⁶Ai sonaha ma panaronkonku paidah-idah hamagouan, na mangonai hubani bangsangku? Sonaha ma panaronkonku paidah-idah parbois ni bangsangku?” [70]

⁷Dob ai nini Raja Ahasveros ma dompak Puangbolon Ester ampa dompak si Mordahai, halak Jahudi ai, “Tonggor ma, domma pala hubere rumah ni si Haman hubani si Ester, anjaha si Haman domma igantungkon bani hayu ai, halani sihol mardastangan ia bani halak Jahudi.

⁸Bulih do hanima mambahen surat pasal halak Jahudi barang sonaha na madear ninuhurnima ibagas goran ni raja in, anjaha itokan ma ai bani tintin ni raja in; ai surat, na dob sinurat ibagas goran ni raja in, anjaha itokan marhitei tintin tokan ni raja in, seng bulih mubah.” [71]

⁹Jadi tarpio ma ijia juru tulis ni raja ai bulan tolu, ai ma bulan Siwan, ari dua puluh tolu. Jadi isurat sidea ma haganup romban hubani pangaturhon ni si Mordahai pasal halak Jahudi hubani kopala-kopala, panrajai ampa pambobai ni nagori-nagori hun India das hu Etiopia, saratus dua puluh pitu propinsi, bani ganup propinsi ibagas suratni ampa bani ganup bangsa ibagas sahapni, sonai homa hubani halak Jahudi ibagas suratni ampa sahapni. [72]

¹⁰Isurat sidea ma ai ibagas goran ni Raja Ahasveros, lanjar itokan bani tintin tokan ni raja ai. Dob ai ipantongoskon ma surat ai marhitei suruhan siajak huda na lingkat-lingkat, na somal pinakei bani raja ai, na dob niajar humbani ianan ni huda ni raja ai hinan. [73]

¹¹Marhitei ai ilopas raja ai ma halak Jahudi, na adong bani ganup huta martumpu, laho martahankon hosah ni sidea, homa mansedahon, mamunuh ampa mangagou ganup hulanan parsinjata ni ganup bangsa atap nagori, na sihol mandorab sidea rap pakon dakdanak ampa parinangon ni sidea, sonai homa manrampas ugas-ugas ni sidea, [74]

¹²bani sada ari bani sab nagori ni Raja Ahasveros, ai ma ari sapuluh tolu bulan sapuluh dua, bani bulan Adar. [75]

¹³Salinan ni surat ai, na tinotapkon gabe paraturan bani ganup nagori ai, maningon tingtingkononkon do ai bani ganup bangsa, ase sirsir halak Jahudi bani ari na dob tinotapkon ai, laho manlawan munsuh ni sidea. [76]

¹⁴Ia suruhan ai, na mangajak huda na lingkat-lingkat ai, na somal pinakei bani horja ni raja ai, mangolos ma sidea bingkat, iparentahkon raja ai, anjaha i huta Pamatang Susan do iluarhon parentah ai. [77]

¹⁵Luar ma anggo si Mordahai hun lobei ni raja ai marpakeian harajaon humbani sitora na mahonda ampa kain linen alus, marsortali omas na banggal ampa marmantel kain linen na alus pakon sitora na gerger, anjaha ganup pangisi ni huta Susan marolob-olob anjaha marmalas ni uhur. [78]

¹⁶Poltak ma anggo bani halak Jahudi haliharon, malas ni uhur, hasonangan ampa hamuliaon. [79]

¹⁷Jadi bani ganup nagori ampa bani ganup huta hadasan ni hata ampa parentah ni raja ai, masa ma malas ni uhur ampa olob-olob i tongah-tongah ni halak Jahudi, pesta ampa ari malas ni uhur. Anjaha buei halak humbani bangsa na i nagori ai masuk Jahudi, ai sogop do biar dompak Jahudi bani sidea. [80]