Read Batak Simalungun 2 MUSA 10 Bible Online

2 MUSA 10 - Batak Simalungun bible

2 MUSA 10

¹Dob ai nini Jahowa ma dompak si Musa, “Laho ma ho marayak Parao, ai domma Hupahengkeng uhurni pakon uhur ni juakjuakni ase boi Hubahen sagala tandangkon i tongah-tongah ni sidea,

²anjaha ase boi pajojoronmu hubani anak pakon pahompumu magira na Hubahen in hubani halak Masir pakon tandang-Ku na Hupajongjong in i tongah-tongah ni sidea, ase ibotoh hanima, Ahu do Jahowa.” [71]

³Jadi laho ma si Musa pakon si Aron marayak Parao, nini sidea ma dompaksi, “Sonon do hata ni Jahowa, Naibata ni halak Heber, ʻSadiha dokah on engkaronmu patoruhkon dirimu i lobei-Hu? Palopas ma laho bangsang-Ku ase isombah sidea Ahu. [72]

⁴Tapi anggo mangengkar ho manlopas bangsang-Ku laho, tonggor ma, parohon-Ku ma patar balang hu gomgomanmu,

⁵rungkubonni ma sisik ni tanoh in, gabe seng boi idahon tanoh in; panganonni ma teba-teba ni udan sira-sira in bannima, anjaha gagatonni ma sagala hayunima na dong tubuh i juma,

⁶gokanni ma rumahmu, rumah ni juakjuakmu pakon rumah ni ganup halak Masir, songon na so ongga ididah bapa pakon ompungnima olat ni na dob adong sidea i tanoh on ronsi nuan.ʼ ” Dob ai marhusor ma si Musa lanjar luar hun lobei ni Parao.

⁷Nini juakjuak ni Parao ma dompaksi, “Sadiha dokah nari gabe siding halak on banta? Lopas ham ma laho halak in, ase isombah sidea Jahowa, Naibata ni sidea in; seng ope iahap ham na dob seda tanoh Masir?”

⁸Iboan sidea ma si Musa pakon si Aron hu lobei ni Parao. Nini ma dompak sidea, “Laho ma hanima, sombah hanima ma Jahowa, Naibatanima; tapi ise do nani deba na laho in?”

⁹Nini si Musa ma, “Haganup do hanami sihol laho, na maposo pakon na matua, odor rap pakon anak ampa borunami, biribiri pakon lombunami, halani pesta ni Jahowa do sipestahononnami ai.” [73]

¹⁰Nini ma dompak sidea, “Jahowa ma tongon mangkasomani hanima, anggo hulopas hanima rap pakon dakdanaknima laho. Tonggor ma, atap na jahat do sura-suranima?

¹¹Lang sonai, hanima bagian dalahi ma laho marsombah hubani Jahowa, halani sonai do pangindoannima hinan.”Jadi ipalaho ma sidea hun lobei ni Parao.

¹²Dob ai nini Jahowa ma dompak si Musa, “Pagostong ma tanganmu hu babou ni tanoh Masir parohkon balang, ase naik sidea hu tanoh Masir, anjaha igagati sagala suan-suanan ni tanoh in, sagala teba-teba ni udan sira-sira ondi.” [74]

¹³Jadi ipagostong si Musa ma tungkotni hu babou ni tanoh Masir, gabe iparoh Jahowa ma logou hun hapoltakan hu tanoh ai layur sadari saborngin; patar ni ai iboban logou na hun hapoltakan ai ma balang ai.

¹⁴Jadi naik ma balang ai hu sab tanoh Masir anjaha sogop hu ganup gomgoman ni Masir, buei tumang, seng ongga ope masa balang na sonai i lobei ni ai, anjaha i pudi ni ai pe seng masa be sonai ai.

¹⁵Ai irongkob sidea do sisik ni ganup tanoh ai, pala golap tanoh ai ibahen, anjaha ipangan ma ganup suan-suanan ni tanoh ampa ganup buah ni hayu, sagala teba-teba ni udan sira-sira ondi; seng dong be na ratah tading bani hayu atap bani suan-suanan i sab tanoh Masir.

¹⁶Jadi tarolos ma Parao mandilo si Musa pakon si Aron, nini ma, “Domma mardousa ahu dompak Jahowa, Naibatanima pakon dompak hanima. [75]

¹⁷Ai pe, sasap ma dousangkin age sahali on, anjaha martonggo ma hanima hubani Jahowa, Naibatanima, ase ipadaoh humbangku pitah hamatean on gelah.” [76]

¹⁸Jadi luar ma si Musa hun lobei ni Parao, martonggo ma ia hubani Jahowa. [77]

¹⁹Jadi iparoh Jahowa ma logou hun hasundutan doras tumang gabe iluahon ma balang ai anjaha isampakkon hu Laut Sigerger; sada balang pe lang tading bani sab gomgoman ni Masir.

²⁰Tapi ipahengkeng Jahowa do uhur ni Parao gabe seng ipalopas laho halak Israel ai. [78]

²¹Dob ai nini Jahowa ma dompak si Musa, “Pagostong ma tanganmu dompak langit, ase masa na golap marimpot-impot bani tanoh Masir, ase dadap-dadap halak ibahen na golap ai.”

²²Jadi ipagostong si Musa ma tanganni dompak langit, gabe sogop ma na golap marimpot-impot hu sab tanoh Masir tolu ari dokahni.

²³Seng ididah atap ise hasomanni anjaha seng dong atap ise na mosor humbani iananni na tolu ari ai; tapi bani ganup halak Israel lihar do bani ianan ni sidea.

²⁴Jadi idilo Parao ma si Musa, nini ma, “Laho ma hanima, sombah hanima ma Jahowa; pitah biribiri pakon lombunima ma na tading, tapi anggo anaknima boi do homa laho rap pakon hanima.” [79]

²⁵Tapi nini si Musa ma, “Ham pe maningon bereonmu do homa hu tangannami galangan sisayaton pakon galangan situtungon, sigalangkononnami hubani Jahowa, Naibatanami.

²⁶Pinahannami pe maningon laho do rap pakon hanami; sada tambirik pe lang tading, ai hunjai do buatonnami sisombahkononnami hubani Jahowa, Naibatanami, anjaha seng ibotoh hanami barang aha sombahkononnami hubani Jahowa paima das hanami hujai.”

²⁷Tapi ipahengkeng Jahowa do uhur ni Parao, gabe seng ilopas sidea laho. [80]

²⁸Dob ai nini Parao ma dompaksi, “Laho ma ho hun lambungkon, jaga ho, seng boi idahonmu be bohingku; ai sadari ididah ho bohingku maningon matei ma ho.”

²⁹Nini si Musa ma, “Songon na hinatahonmu ai ma, seng idahonku be bohimu.”